青红帮火并石库门
沪语朗读：何秀萍
作者：申涛
朗读：何秀萍
指导：丁迪蒙
解放前，我住勒北京西路个一条石库门弄堂里。有一日，弄堂里个小朋友搭我讲，后弄堂里搬来了一家叫“红枪会”个人家，勿晓得啥个名堂，阿拉快点去看看。跑到后弄堂，看见有两个黑衣人勒辣一幢石库门个大门口站岗，门口有交关人朝大门里向看啥个西洋镜。阿拉小囡一个个从人堆里钻过去，只看见客堂间电灯开得锃锃亮，墙壁浪贴勒一张关老爷个像。关老爷像个前头还有一张供桌，上头放勒香炉搭仔蜡烛台。房间里烛光闪闪，烟雾腾腾。供桌两旁边还有插刀枪个木头架子，架子上头插满刀枪剑戟等十八般武器，弄得象唱戏个舞台一样。后来我当老师了，查了资料才晓得迭个地方就是“红枪会”个老窠，是解放前上海滩个流氓帮会。
“红枪会”一来，整条弄堂个居民就倒霉了！阿拉个弄堂原来有三个出入口，二个弄堂口大，一个弄堂口小。“红枪会”弄来几根粗壮个圆木头，拿小弄堂口封脱，搿能一来，居民进进出出就勿方便了。一打听，原来是“红枪会”同另外一个叫“薄刀党”个流氓帮会结怨了，伊拉怕“薄刀党”来个突然袭击，就想出迭个封弄堂口个办法。
有一日，我勒阳台浪乘风凉，突然觉着下头弄堂里哪能清静起来了？只有红枪会迭帮黑衣人勒辣弄堂里窜来窜去。我就迓勒阳台浪偷看。看见一个女人手里提了篮头勒辣弄堂里走来走去，起先我以为是啥人家个阿姨买菜回来了，后来我看迭个女人哪能老是走来走去，好象勒辣等人。过脱一歇，来了个黑衣人，女人就从篮头里拿出一包用纸头包个三角包拨伊。每来一个黑衣人，伊就拨一包。我觉着老奇怪，搿勒辣做啥？后来，我看见迭个女人拿散开个三角包重新包包好，搿记我看清爽了，原来是石灰包！喔唷，今朝有好戏看了，看来薄刀党要来冲红枪会了！啥人个面孔要是拨石灰包厾着，啥人个眼睛马上就瞎脱！我看得心口别别跳。正勒辣紧张个辰光，有个穿纺绸衫裤个男人走过来了，伊手里居然还有把手枪，路过个黑衣人看见伊侪朝伊鞠躬。伊也从迭个女人手里接过一包石灰包，迓到弄堂大铁门后头。我猜想迭个人肯定是流氓头子，吓得我连忙逃到房间里。
搿辰光，我个父亲偏偏叫我搭伊一道到外头去买棕绷。买好棕绷，两个人就一前一后抬回来。老远就看到弄堂口停了一部卡车，车子浪空荡荡个，好像勒辣等人。突然，弄堂里冲出一群人，个个杀气腾腾。有个手里舞仔大刀，有个拿仔救火用个太平斧，有个扛仔撬棒，有个挥舞双节棍，统统爬到卡车浪。后来再晓得，搿群流氓就是薄刀党，伊拉已经拿红枪会个老窠敲脱了！等到红枪会一帮黑衣人装腔作势拿了家什大呼小叫赶出来，薄刀党个卡车老早已经呼拉拉开走了。吓得我双脚乱抖，硬了头皮抬仔棕绷走到弄堂里，看见好几个红枪会黑衣人浑身是血。过了几日，弄堂里个红枪会就再也勿看见了。
搿场黑帮火并个好戏是我勒解放前亲眼看见个。可见老里八早个石库门弄堂真是千奇百怪，搿也算是一怪。
往期回顾：
图：网络 / 编辑：渺渺