我是上海港第一代女装卸工，我骄傲
沪语朗读：牛美华
朗读者
我是上海港第一代女装卸工，我骄傲
作者：陈惠芳
滬語改寫：郭莉
推荐：丁迪蒙
朗读：牛美华
我是六七届高中生，1968年11月分配到上海港务局张华浜。跟我一道个有120个女同学，大家侪是还勿满廿岁个小姑娘。
“到农村去，到边疆去，到祖国最需要個地方去”是当时整个国家形势，所以大家也勿好落后，要到上海港最艰苦个岗位去。就搿能，阿拉成了上海港第一代個女装卸工。
1969年初，解放日报曾经勒第一版重要位置报道：《第一代女装卸工在成长》，讲个就是阿拉搿批人。当时作为第一代女装卸工，大家侪觉着老老光荣、骄傲个，跑出来侪是神抖抖个。但是啥人晓得勒勒搿
份光荣个背后，我伲付出了几化艰辛血汗啊！
上海港务局张华浜公司，后首来叫“上港九区”。公司拿120个女装卸工分成4只班，每班侪有老码头老师傅带班，大部分工作侪是勒勒仓库里卸货。
八个钟头里，勿断有装满货色个大卡车开进来，女装卸工们会争先恐后轧到卡车边浪，背朝卡车立好，等卡车卸货师傅拿货箱放到伊拉背脊浪。迭个辰光一定要用出全身力气摒牢，再步履艰难个走上几十步路，拿背脊浪货箱用力掼到规定位置。
开始辰光，大家侪背勿动多少。经过老码头师傅现身说法，大家侪学会了巧用“搭肩布”。讲到搭肩布，可能㑚勿晓得是啥物事。顾名思义，就是搭勒肩胛浪个布。大约摸长130公分，宽60公分，披勒肩胛浪以后，用两只手拿布头卷紧，让伊固定勒背脊浪，搿能就是利用了力个分散原理，货箱个重量，分散到整个背部，勿再集中勒一只点浪了。想勿到搭肩布作用介大，否则介重个箱子哪能背得起来呀？迭个搭肩布肯定是最底层劳动人民发明个，因为呒没做过迭个苦生活，是绝对想勿出来个。
勒勒老师傅指导下，我还懂得了一个奇怪个道理：背木箱辰光，要背小个一面。木箱不可能侪是正方形的，有大面搭仔小面。假使背大个一面，肯定背勿起来，但是背小个一面就比较轻松了。迭个当然也是实践出真知，是老师傅长年累月摸索出来个窍门。所以老师傅尽管呒没文化，但是阿拉大家侪邪气敬佩搿些老师傅个。
我当时身高只有一米五十四，体重90斤左右。我背过个最重木箱是115公斤，里向装了五部脚踏车。是115公斤哦！侬覅勿相信！当然迭个也是要归功于搭肩布个。
箱子勿仅要背起来，难度最大个是要拿背浪个木箱一记头掼到规定位置，还要堆放整齐。迭个就勿是简单个体力生活，好划到技术生活里向了！
再来讲讲背皮蛋甏、咸菜甏个故事：大家侪晓得，背圆滚滚个甏，分量是呒没木箱重，但是难度是交关大個。
有一年热天介，来了一卡车咸菜甏，女装卸工们照样蜂拥而上。尽管有搭肩布保护，但是咸菜甏还是会勒勒背脊浪滚来滚去。我背了几甏以后，背脊浪个皮也磨破脱了。齐巧碰到一只咸菜甏个封口烂泥裂开来了，咸菜水从裂缝流了出来，顺牢衣裳领头正好流到背脊磨破脱个地方！㑚想想看，迭个是啥个滋味啊？我欸歇辰光痛得唻浑身发抖，眼泪水溚溚渧。大家开头还勿晓得我为啥背發背發哭起来了，后首来晓得了，有人就开玩笑讲：迭个简直是腌咸肉了！乃末大家侪捧腹大笑，我当时摒勿牢也跟牢仔伊拉一道笑了起来。有一句言话叫“勒勒伤口浪撒盐”，搿种滋味我是深有体会啊！
现在回想起来，当时搿能艰苦个工作，居然呒没一个女生后退，工作中大家侪抢勒背，抢勒做。背勿动也坚持摇摇晃晃朝前走，老师傅看到了就会勒边头扶侬一把。搿种场面，现在想想还是老感动个，伊歇辰光个年轻人，几化纯真啊！
往期回顾：
图片来自网络