“苏北人”搭仔“江北人”勒语气浪有差异
沪语朗读：与人为善
“苏北人”搭仔“江北人”
作者：丁迪蒙
苏北人，指个是江苏以北个人，是相对苏南（包括苏州、无锡、常州）人而讲个；江北人，指个是长江以北个人，也是相对江南人而言个。两者所包含个意思应该是一样个。
但勒以往个上海，当人讲到“搿个人是苏北人”个辰光，伊是勿带任何感情色彩个；但是当人讲“伊是江北人”个辰光，侪会有种微妙个心理状况：或者会得会心一笑、或者面孔浪向露出某种勿屑。
“苏北人”、“江北人”只有一字之差，为啥会得有介大个区别呢？
搿搭就牵涉到了一种地域文化现象。
上个世纪三四十年代，移民到上海个人全国各地侪有，但比较多个是江浙一带或者是苏北地区个人。江浙一带个人到上海，主要是乌镇、同里、海宁、宁波等地个人。搿些人原本勒当地就生活比较富裕，是到上海来投资开厂或者开大小商店个生意人。譬方，勒上海个宁波人主要从事个是商业活动，即使是做手工艺个，也侪是些顶级裁缝，专门做西装、旗袍个，生活侪过得邪气好。
苏北，原来是出人才个地方，历史浪有名个文化名人当中，籍贯是苏北个邪气多个。葛末，上海人为啥会得看勿起苏北人呢？
原来啊，到上海来讨生活个苏北人原本勒勒家乡已经是活勿下去了，是逃难到上海来个。因此，读勿起书，文化底子差是搿些人个共同特征。到了上海以后，身无分文、举目无亲，活下去，就是当时个第一需要。于是，理发店、马路清洁工、码头搬运工、澡堂里扦脚、搓背、收破烂咾啥所谓个下等工作，便是伊拉个首选了。
苏北人勒上海个生活状况是邪气糟糕个，连得亭子间伊拉也租勿起。于是，伊拉就自家去寻些材料来随便搭建简易个棚子，夜里向钻进去睏觉，日里向出去谋生，伊个就是“草棚棚、滚地龙”了。呒没钞票买衣裳，也呒没地方去汏浴，因此，常庄是衣衫褴褛，比较龌龊。素来欢喜清爽个上海人看见了当然是避之勿及了。
由于生存已经是勿容易，温饱又是无法保证，葛末，投资教育就更加是属于奢望了。因此，伊拉勒生活习性浪就搭有文化个人勿一样：讲闲话勿够温文尔雅；生气个辰光要拿小囡吊起来用皮带去抽，搿一切侪让上海人有一种苏北人就是野蛮、粗鲁个代名词个感觉了。
搿能一来，搭苏北人通婚就成了上海人邪气大个忌讳：苏北籍姑娘是勿能要来做妻子、新妇个；也勿会拿囡儿去嫁拨苏北籍个男青年了。
现在，第一代苏北人侪老了，去世了，第二代、第三代呢，则是早已融入了上海，因此，上海闲话当中“江北人”，搿个说法已逐渐淡化了。上海人也勿再讲小囡勿好嫁拨苏北人、勿好讨来做新妇了。
往期回顾：
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号