上海人个住房（下）
沪语朗读：张正风
上海人个住房（下）
作者：王汉梁
改编：丁迪蒙
朗读：张正风
大多数上海人，侪住勒各种各样个，新老石库门房子里向。上海人拿搿种房子，就叫做弄堂房子。
五十年代以后，尽管上海，一直执行严厉个户籍制度，勿准外省市，或者农村人口流进来，难板来个外地人，也侪要到派出所，去报只临时户口个。但是呢，上海人生育后代个速度啊，邪气惊人，市区人口，勒勒十多年里向，就膨胀起来了。
原先就已经紧巴巴个住房，现在是更加捉襟见肘了。家家户户个小囡侪变成大人了。原来，兄弟、姐妹可以睏上下铺个，只要有一个要谈婚论嫁，住房就马上发生了问题。假使有两个要结婚，葛一家老小就只好瞪眼睛了。当时有交关热心人，搭朋友介绍对象，对方首先要问清爽：“房子有伐？”假使呒没，就只好免谈。于是，有勿少人，拿希望寄托勒勒单位分房浪。但是，效益差个小厂家，除了几个有权个头头之外，下头个人根本就覅想做搿个梦。即使是有条件分房个单位，也要看各人个本事哪能了。
迭个本事，当然勿是指，伊拉个业务能力啦，而是指，会勿会搭有权个领导搞好关系，会勿会拎勒大包小包，夜里向，去敲领导屋里个后门，会勿会勿顾一切个，冲到办公室去揪牢领导个领头，拍台子骂山门、要死要活，搞得领导头痛只好认输。至于伊眼自命清高、只晓得埋头做好自家本分工作个老实头，葛就勿晓得到啥辰光再能够吉星高照了。
搿种现象几乎勒每个单位里侪多多少少会得存在一眼个。交关血气方刚、自视清高个人，忍勿下迭一口气，假使勒评职称之类个事体浪，再受到勿公正个待遇，葛末就老容易，成为当时出国潮流当中个一份子了，抛妻、别子到异国他乡去伸展自家个抱负。
更加多个人，就勒勒勿知勿觉当中，逐渐也学会了鉴貌辨色、曲迎上峰、吹牛拍马，以扭曲个个性、降低人格作为代价，来换得当权者个欢心。从而，施舍拨伊一套无偿个福利住房。搿一点，可能也是上海人个性格，长期以来勿知勿觉，受到了环境影响个，客观因素之一。
在上海平民百姓个生活当中，为了迭个住房问题，弄得六亲勿认个情况，也叫关多。有个，爷娘拿儿子告上法庭；有个，到乡下头去插队个弟弟妹妹，回来了，要报户口，阿哥阿嫂勿答应。还有，晓得要动迁了，赶勒户口冻结之前，多报进几只户口，以便拆脱房子以后，可以多分眼面积。还有，拿老人个户口报到子女屋里向，以便勒勒分房个辰光可以多一条理由。搿能样子个小聪明，勒乐上海人当中，侪是用勿着教就会个公开秘密。
住在弄堂房子个人家，日里向，房间里还收作得蛮整齐个，到夜里向睏睡个辰光，就呈现出千姿百态了：有个，老娘还勒海，儿子就已经拿新妇讨进来了。葛末到夜到，姆妈只好睏勒楼梯底下，外头拉幅塑料帘子，到了夜里向，就像煞是剧场里舞台闭幕了；有个人家，兄弟姊妹多，一间房间里，摆勿落好几只床，到了夜里，就只好摊席子睏地铺了；有个人家呢，搭只阁楼，睏觉辰光呢，小路梯一搁，手脚并用爬上去。阁楼浪向，人是立勿直的，不过平睏下来是呒没问题的；有个人家，有天井，葛就勒天井里搭间小间，儿子就可以早点结婚了。上海人对住房面积个敏感搭仔渴望，可以讲是到了难以想像个程度啊。
八、九十年代，因为市政动迁，搬到新建个小区个人家，几乎是勿约而同个，要拿阳台用铝合金个窗封煞脱，搿能一来，房间就好扩大勿少。晒衣裳？就晒到阳台外头去！可以增加四、五平方米，比啥侪实惠。
近十年来，越来越多个石库门房子，勒勒推土机个隆隆声当中轰然倒塌，越来越多个上海人，搬进了新式居民小区去住了。各种各样新楼盘像雨后春笋一样冒出来。房子越来越漂亮，装修越来越讲究，居住面积也越住越大。难得保存下来个，几个石库门弄堂，已经成了上海人怀旧个时尚招牌。
上海人，老底子勒勒住房浪个小肚鸡肠，闹出来个一眼悲喜剧已经成为了历史。后来个上海人，假使晓得搿眼往事，一定会觉得奇怪得来勿得了。
精彩回顾：
图片来自网络