到“淮国旧”去觅宝个日脚，老上海人难忘个回忆 / 开普饭

沪语朗读：渺渺如胭

朗读者

到“淮国旧”去觅宝个日脚，

老上海人难忘个回忆

来源：上海发布

沪语改写：丁迪蒙

朗读：渺渺如胭

“淮国旧”三个字，点明了伊个地址——淮海路浪，所有制性质——国营商店，经营范围——卖旧货为主。高度概括，口口相传。其实，伊最初工商登记个大名叫作“国营上海市贸易信托公司旧货商店”，后首来又先后改名为“淮海贸易信托商场”搭仔“五星公司”，不过，上海人还是叫伊“淮国旧”。

翻阅旧报纸，1954年9月29日出版个解放日报浪登载了一则开业广告：国营上海市贸易信托公司旧货商店将于1954年9月29日开业。

“淮国旧”前门是淮海路，后门是长乐路，店邪气大，有得1000多平方米。

“淮国旧”是当时仅有个“奢侈品店”——店内陈列中外知名品牌个奢侈品，并可以供普通市民进行买卖。

上个世纪五六十年代基本浪是一个物资比较短缺、商品比较匮乏个年代，交关生活日用商品还要凭票、凭证供应，不过买旧货是用勿着票证个，“淮国旧”是上海旧货个集大成之地。老古董、旧钟表、长衫、皮袍、皮大衣……还有交关世界名牌商品，徕卡相机、劳力士手表、欧米茄手表、派克金笔。里象虽然比较多个是旧货，但是也是伊个年代上海人了解国外商品个少数几只窗口之一，伊个辰光像友谊商店、华侨商店虽然也有洋货，但是要用外币或者外汇券购买个。

当大多数人侪还只能买120块个上海牌手表时，“淮国旧”就有好几百块洋钿个劳力士搭仔欧米茄，不过交关人还是买勿起个。所以伊面个手表柜台，每日天侪会有交交关关人轧勒海，开开眼界，长长见识。

交关上海个中老年人对“淮国旧”难以忘记还有一个理由，葛就是伊虽然卖旧货，但是绝对勿卖假货，而货真价实个背后是因为搿搭交关店员侪是邪气有专业水准搭仔职业操守个鉴定家。

伊些老法师，用上海闲话讲就叫老鬼，指搿个人邪气专业也邪气精明。勒“淮国旧”，勿管啥物事，侬是骗勿过伊拉个眼睛个。譬如讲一只手表。卖出去个人一定会讲，搿只手表多少多少好。伊会搭侬讲，搿只手表个牌子值几钿，侬搿只表带了多少年了，其中有啥个零件已经有得小毛病了。讲得侬口服心服，连连点头。“淮国旧”信誉邪气好，估价合理公道，到搿家店来，勿管侬是买进还是卖出，侪是邪气放心个。

当年，各种名贵皮货、呢绒丝绸服装、手表搭仔钢琴、乐器等等高档旧货也是“淮国旧”商品当中个主角，搿是有别于当年上海交关小型旧货商店个。

还有交关上海老百姓难忘“淮国旧”个理由是，当年伊拉勒里向买到了交关价廉物美、而且是市场浪邪气紧俏个日常生活用品。改革开放以前个伊些年是票证年代，交关生活用品侪要凭票供应。工厂里一些勿合格个产品就当成了等外品、处理品勒“淮国旧”里销售，勿需要票证，还会打点折，也勿影响使用。所以每天早浪向一开门，顾客就像潮水一样翁进去。比方工业品，当时买工业品侪要工业券，像缝纫机、脚踏车侪要凭票供应个，“淮国旧”里有等外品、处理品，质量也是蛮好个，侪是敞开供应，勿用票证个。

上个世纪90年代初，上海进入了大建设个时期，兴建个南北高架立体交通干道个规划正好穿越“淮国旧”，于是“淮国旧”就让道了。勒后来个廿多年里，“淮国旧”几度搬迁，最后成为顺昌路浪一家老勿起眼个旧货店，慢慢叫消失勒现在上海人个视野里。