不如讲真话 / 开普饭

沪语朗读：沈玉麟

不如说真话

来源：夜光杯

作者：羊郎

改编：丁迪蒙

朗读：沈玉麟

现实生活当中，每个人侪希望活勒一个纯朴、真实而勿虚伪个世界里，侪希望自家听到个每句言话侪是真个，侪勿愿意拨欺骗。但是，理想真个是邪气丰满，现实又常庄是邪气骨感个。

希望生活勒一个讲真话个环境里个想法可以理解，勒搿能个环境里向个人，之所以活得勿吃力，原因是少了猜忌、揣摩。反过来，就总归要人去辨别对方个是假意还是真心，去猜想阿里句是真个，阿里句是假个，阿里句是真心赞美侬，阿里句是假意奉承，阿里句是实话，阿里句是空话，阿里句是知己话，阿里句是客套话，阿里句是自家心里个言话，阿里句是迎合别人家个言话……同样是嘴巴里出来个言话，其中个寓意却是千变万化个，话里有话，话外有话。搿能样子个费人思量，岂勿是要吃力煞脱个！

生活勒假话横行个环境里，听个人吃力，讲个人也勿会轻松个。讲个人要去掂量听个人个喜好，勿敢直截了当讲。该明讲个要绕道讲，该直白个要试探勒讲，该一言而尽个变成半遮半掩，该一吐为快个变成虚与委蛇。讲假话，还要面部表情个配合，勿论是喜形于色还是怒形于色，再或者是邪气镇定，侪要去“装”。更何况，讲了一句假言话，过后有辰光还要用十句假言话来想办法圆场。讲假话个吃力，是勒违背良心，勒私下头个勿认可自家，勒心理浪个扭曲。当然，也有眼人可能是个例外，搿能介个人心里想个搭仔嘴巴浪讲个已经形成两套可以屏蔽个系统，讲假话是张口即来，得来全勿费功夫。日长时久，讲假话就成了习惯，连得自家有辰光也勿能清晰个分清爽阿里句是真个阿里句是假个，甚至可以拨自家个假话所感动。

假使发现自家身处一个讲假话个环境里，就应当扪心自问，去究其原因了。有人从老祖宗伊面去寻依据，比方《增广贤文》当中有“逢人只说三分话，未可全抛一片心”，但是，搿搭并呒没让人讲假话个意思。而“防人之心不可无”个古训，确实是让人常常勿敢直抒胸臆。因为讲真话容易得罪人，所以就有人要明哲保身；因为讲真话常常拨人认为是勿合时宜个戆大，所以就蛮少有人甘愿拨“斩冲头”；再讲，因为讲真话个常庄遭人记恨，讲假话个反倒让人欢喜，所以呢，存在决定意识，就让原本习惯于讲假话个讲得更加顺溜，原本欢喜讲真话个却是顾忌重重。所以讲，与其有讲真话环境个美好愿望，勿如身体力行，共同去创造讲真话个环境。勒搿搭，每个人侪勿能只是个理想者，而应该是个践行者，怀有一份坦诚之心，让自家领略到讲真话个愉悦，带一份谦卑之情，鼓励人侪讲真话，让讲言话个人侪享受到一吐真言个快感。

人之初，性本善，阿拉每个人侪是从童言无忌当中走过来个，为啥涉世越深顾忌就越多呢？可能是欲望使然伐。人走出本源容易，回归本源就难，比较现实个是尽可能个守牢本真。阿拉勒言谈辰光个口头语：“其实伐……”“老实讲……”“讲句心里言话……”搿眼过度性个插入语，实际浪向侪是各自个本源勒心里冒泡。

说真话是回归自我个自然生态，从中可以体会到啥个是“得大自在”。说真话必定会拨阿拉所处个生活环境带来正能量，同时也会让阿拉自家常常能够听到来自于灵魂深处个声音。

与人相处，谈吐之间大家勿如说说真话。