葛明铭个养生经 / 开普饭

沪语朗读：杨敏芳

朗读者

葛明铭个养生经

作者：周成树

改编：丁迪蒙

朗读：杨敏芳

凡是有点岁数个人,侪晓得当年上海人民广播电台个一档《滑稽王小毛》节目久经勿衰，红遍大江南北，搿也是改革开放当中，上海文艺界个一朵艳丽个鲜花。2012年葛明铭退休。“夕阳无限好，只是近黄昏。”葛明铭宝刀未老，勒上海民间文艺家协会、上海群众文艺馆个大力支持下头，伊从幕后走到了前台，创办了上海故事汇。6年以来，听故事个观众达到10万以上人次，成了上海群众文艺个品牌节目。

葛明铭开设个8只故事汇场子，每次要将近二个小时个主持，谈笑风生，潇洒自如，伊完全勿象个老人，而是“花样老顽童。”

葛末，伊是啥地方来个搿种朝气蓬勃个精神呢？原来啊，伊个养生经是邪气独特个，是“善良”搭仔“好心态”支撑勒伊生命个全部。

葛明铭讲过搿能一只真实故事：1960年代初，国内有得严重个自然灾害。一日天，屋里门口头有位从安徽过来个老头，昏倒勒地上向。伊个爸爸看见搿能样子，马上扶起老人，晓得伊是饿昏脱个。就没讲啥言话，奔到自由市场去买了一眼熟山芋，邪气亲切个搭素勿相识个老人说：“侬慢慢叫吃噢，勿要噎牢……”爸爸个举动打动了葛明铭个少年心。从此，“善良”就成了葛明铭立人做事个标杆之一。

葛明铭个父亲健康长寿，勒百岁寿宴浪，伊邪气幽默个讲；“我心底善良，吃喝甜香，行眼善事，睏得更加香。所以，一个人能够活两个人个寿命，”最终伊活到103岁，再平静个离去个。

可能是遗传因子个作用，也可能是葛家个好家规，现在个葛明铭红光满面，看上去比伊个实际年龄要年轻交关。伊个座右铭是：“以善待人，以诚处人，以德为人，以乐取人”。善良个人，清澈而透明，可亲、可近、又可敬。君子坦荡荡，愉悦留心堂，健康伴随郎。

葛明铭善待观众，热心为大众服务。勿管严寒、酷暑还是刮风、落雨，伊坚持故事汇个活动，以魅力赢得观众。伊采用海派清口秀个形式，结合时事，串插小故事，有声有色、曲折动人，引人入胜，讲述老百姓自家个故事，博得全场观众热烈个掌声。每次故事汇结束，总归有勿少观众久久勿离场子，要求葛明铭签名、拍照、留念。伊呒没一眼名人个架子，有求必应，满足伊拉个要求。

身教重于言教。跟牢葛明铭个，有一支从小听伊故事长大个“王小毛志愿者”队伍。伊拉是一群有志个青年，勒勒葛明铭个指导、关心下头，热心于社会公益活动，活跃勒故事汇个现场。每一次活动，志愿者侪到车站、地铁口等地方，接送年纪大个观众，对一眼孤老，伊拉还经常打电话问候，关心老年人个生活，解决伊拉个实际困难。“王小毛志愿者”，成了搿座城市个一道亮丽个风景线。

葛明铭养了只八哥，细心调教以后，学会了讲言话，看到人，伊就叫：“侬好！”“侬吃过了伐？”“侬好去汏浴唻”。引得屋里向个人哈哈笑，一日天个吃力也就侪没了。

除了读书、写作、演讲之外，葛明铭最欢喜收藏小石头，也欢喜养各种个鸣虫、小金鱼、小乌龟……搭伊谈到搿眼“小精灵”，伊就马上笑逐颜开，头头是道，一套又一套、津津有味个讲伊拉拨自家带来个乐趣。比方讲：伊晓得老虫个心跳每分钟是340次以上，上蹿下跳，一直处于紧张状态，存活率只有二年左右。而乌龟呢，慢悠悠，“心态好”、心跳每分钟只有8次左右，慢节奏个生活，竟然能够存活百年以上。因此，葛明铭得出了科学个结论：心态好、慢节奏，就能够健康长寿，反过来就是要短命个。

葛明铭个养生经，是勒勒平凡当中显出真情。伊热爱自身个价值，勒善良、平和当中为百姓创造更加多个伊拉喜闻乐见个精神财富。