神奇个 “哎、安、凹、欧”
沪语朗读：丁迪蒙
朗读者
来源：新民晚报
作者：丁迪蒙
新上海人讲勿好上海闲话，是因为有勿少上海闲话里个音大家发勿来。其实，只要会得发“哎、安、凹、欧”搿四个上海闲话里个音，上海闲话就可以读准确一半了。
“哎”
搿个字个发音其实普通话里是有个。就是“夜ie” “月üe”中个音素e。但是伊勿单独发音。假使侬会得读英文，葛末“desk”、“table”里向e发音也是一样个。
搿个“哎”上海人常庄要用个。比方：
1．哎，侬到啥地方去啊？
2．哎，侬去搭我拿菜拣拣伊，米淘淘伊好伐？
一是熟人之间用来打招呼个。因为熟悉了，就直接用“哎”。用勿着再叫伊名字，
二是夫妻之间对话。上海人用勿着叫老公、老婆，直接用“哎”引起对方注意就可以讲闲话了。
“哎”是没声母个，阿拉可以拿伊直接拚到声母里去。凡是普通话里韵母是ai、ei，还有少量an个音辣上海闲话里侪（音才）读“哎”。比方：b、p、m、f、d、t、n、l、g、k、h、z、c、s，辣声母后头加“哎”就读就“班、襻、慢、反、对、推、难、来、该、开、海、再、斩、菜、产、三、山”了。“推板”“来三”“难板”，侪是搿能读个。
用下头的顺口溜多读读伊，就会得读了：
来来来，侬来伊来大家来，侪到阿拉屋里来。
“安”
搿是上海闲话里“安”“碗”“暗”个发音。搿个音稍微有眼难个。普通话里向呒没个，法语里倒有个，所以江浙一带个人学习法语侪邪气便当。
哪能读呢？教侬一个方法。“哎”个嘴巴是扁个，拿伊收成圆个就对了。注意，勿好读o。读o舌头就到后头去了。搿两个音勿一样个。s安zi,so zi,前头是“扇子”，后头是“沙子”。普通话里个an、uan，大部分侪是读搿个音个。
“安”是没声母个，阿拉可以拿伊直接拼到声母里去。比方：b、p、m、d、t、n、l、g、k、h、jü、qü、xü、z、c、s，辣声母后头加个“安”就读成“搬、盼、满、端、贪、男、乱、敢、看、汉、卷、劝、选、钻、穿、算”了。
大家用下头的顺口溜多读读伊，就会得读了：
衣裳穿穿，电影看看，钞票算算，饭碗端端。
记牢：一定要注意舌头个位置，舌头个位子是辣前头个。假使侬摆到后头去，“钞票算算”就变成“钞票晒晒”了。
“凹”
搿个音普通话里也没个。但是英文里向有个。现在中国人侪要读英文个，会得读英文也就勿难了。“good”，“door”，里向就有搿个“凹”音个。
搿个“凹”也是上海人常庄用个。比方：
1．甲：侬搭我一道去好伐？
乙：凹。
2．甲：侬去搭我拿菜拣拣伊，米淘淘伊好伐？
乙：凹。
征询意见后，对方假使同意了就可以讲“凹”。用一个 “凹” 就解决问题。意思就是“好个”。
“凹”是没声母个，阿拉可以拿伊直接拚到声母里去。凡是普通话里韵母是“ao”个，上海闲话里侪是用“凹”。比方：b、p、m、d、t、n、l、g、k、h、ji、qi、xi、z、c、s，声母后头加“凹”就读“包、泡、猫、刀、套、脑、老、高、靠、好、交、巧、小、早、朝、草、超、少、扫”了。
用下头个儿歌可以帮助侬读好搿个音：
摇啊摇，摇到外婆桥，外婆叫我好宝宝。
“欧”
搿个“欧”，上海人也常庄要用个。比方：
欧，阿拉赢喽，伊拉输脱喽！
欧，伊拨伊拉姆妈打脱一顿喽。
用来表达一种开心个，小人看人家好戏个感觉。
搿个音普通话里也没个。哪能读呢？教侬一个方法。“凹”个嘴巴是圆个，拿伊拉开变成功扁个就对了。“欧”是没声母个，阿拉可以拿伊直接拚到声母里去。搿个音对应个是普通话里个“ou”，凡是普通话里韵母读“ou”个，辣上海闲话里侪是“欧”。比方：m、f、d、t、n、l、g、k、h、ji、qi、xi、z、c、s，声母个后头加“欧”个音就读“谋、否、斗、偷、楼、狗、扣、后、九、秋、修、走、周、凑、臭、馊、手”了。
记牢，嘴巴勿是圆个，一定要扁个。
用下头个儿歌可以帮助侬读好搿个音：
落雨喽，打烊喽，小八腊子开会喽！
所以讲，搿个四个汉字个上海闲话发音是邪气神奇个。只要“哎”“安”“凹”“欧”会得讲，上海闲话发音就会得变得老便当了。
上海言话叙身边事体
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号