上海女人老早侪会结绒线
沪语朗读：丁薇
朗读者
上海女人老早侪会结绒线
来源：看懂上海
沪语改写：郭莉
朗读：丁薇
推荐：丁迪蒙
上海人老底子冬天侪搿能着衣裳：棉毛衫，假领头，绒线衫。绒线衫还有粗细之分，细绒线衫穿勒里向，粗绒线衫着勒外头。着好绒线衫，下头还有绒线裤，外头还有绒线手套绒线帽。迭眼绒线生活侪是家庭主妇一针一棒结出来个。
绒线传进中国，大概是清朝光绪二十年，1894年。当初只用来扎头发，所以又叫毛头绳。后来为了推销绒线，西方人开始传授简单个编结技术，无所谓花式花样，用绒线编结个只有帽子、手套、围巾咾啥，绒线马甲编结也是后首来再有个，大家觉着绒线马甲又轻又软又好看，一记头流行出来了。绒线传到上海，上海人叫伊“洋线”，又因为伊有毛，还可以御寒，所以也叫伊“冷毛”。当年八仙桥一带有一条兴圣街，街浪就开了交关“冷毛店”。
有一个江苏吴县人叫沈莱舟，是上海一家洋行个跑街，伊看见“冷毛”有销路，就想办法开了“恒源祥绒线号”，做到“人无我有，人有我齐”，保证质量，还举办时装展销，推广绒线编结，买一磅绒线侪赠送一本绒线编结书。乃末买绒线一定要到“恒源祥”，成了当时个流行。程乃珊就勒勒文章里迭能写：“要讲啥个是最具海派特性个上海女人形象，我想，是结绒线。”
从前，评论一个上海女人是勿是能干，总有一句“一手绒线生活漂亮得勿得了”。弄堂里王家姆妈张家阿姨，对女小囡个评价，就是看伊“阿有心相结绒线”。“连绒线也勿会结”是一句邪气重个贬义词，意思是迭个女小囡实在笨到家了，要拨人家看勿起：“我看伊勿是笨，是懒！连结件绒线衫、绒线马甲也勿会……”
除了实用，结绒线还具备了社交、休闲个功能。女人做家务之余，每人拿一只绒线生活，勒弄堂里向互相学习、互相评比，邻里感情也加深了。绒线生活有伊个可塑性搭仔再生性：小囡长大了、花色过时了、袖口磨坏了，侪好拆脱重新开始，邪气符合上海女人个时髦实惠过日脚个心向。就是勒勒“36块万岁”辰光，女朋友也要结件绒线衫作为定情之物送拨男方。成家个男人，勿关经济条件，着得有头有脸，侪靠屋里女人个“绒线生活”。
结绒线个洋工艺变成了上海女人针线生活，专家也就应运而生。当时，冯秋萍、黄培英、鲍国芳并称绒线编结设计三大家。
冯秋萍出生于1911年，毕业于上海求德女中。伊积极倡导符合时代潮流个新女红（红gong），1948年专为上海时髦小姐、少奶奶设计绒线编结旗袍。三十年代，冯秋萍拨人家邀请到绒线行或者广播电台讲解、传播绒线编织技术。1936年，伊出版了《秋萍毛织刺绣编织法》，1948年又出版了《秋萍绒线编结法》，当年从花园洋房太太到弄堂口烟纸店小姑娘，几乎人手一册。
黄培英出生于1913年，毕业于民立女中。又东渡日本拜师，专攻绒线编结技艺。1928年回国发明台针机，创办培英编结传习所，还参加上海市工商部举办的中华国货展览，展品获得大奖，得到金、银质奖章。1933年，伊编写《培英丝毛线编结法》一书，发行量高达三十万册，打破当时出版记录。不过，伊虽然是编结专家，自己身上却呒没半根绒线，伊对朋友讲：“我懒得要死，别人要我结一件还可以，自家就算了吧。”
上世纪二十年代月份牌有一张是迭能个：女人剀勒沙发浪结绒线，沙发边一只落地“飞歌”无线电，白白胖胖儿子勒边头白相，一派天上人间祥和安乐个样子。
结绒线是手工定做个单件生产，有老大个自主性，所以勒勒毫无时尚可言个辰光，伊是有举足轻重作用个。聪明个上海女人看一张西哈努克夫人出访个照片，看一场阿尔巴尼亚电影，不出一个礼拜，淮海路上就会出现西哈努克夫人个毛领头，或者是欧洲风个黑白粗花呢大衣——搿眼侪是用绒线结出来个。
上海女人对“绒线生活”情有独钟，无论走到啥地方，两根针一团绒线，用一块男式大绢头一包就可以随身带，见缝插针结绒线。所以当时辰光，公交车浪板有一块“乘车勿准结绒线”个安全告知牌呢。
哪能？侬，会得结绒线伐？
往期回顾：
图片来自网络