夫妻双双把书教 / 开普饭

沪语朗读：田耘

朗读者

夫妻双双把书教

作者：南妮

来源：新民晚报

改写：浥薇

指导、推荐：丁迪蒙

朗读：田耘

我个爷廿几岁就做了一个乡村小学个校长，顺便讨了个大眼睛、邪气漂亮个老婆——我个娘。娘是爷个同事，也是老师。伊拉两家头侪教语文。后首来，伊拉勒好几只勿同个学堂之间任教，既是同道，又是对手。

感觉娘更加用功一眼，学历也要比爷过硬；但是呢，爷获得个荣誉好像更加多。勒教师节之类个节日来看爷个学生，总归要超过来看娘个学生，阿拉常庄感叹，人生勿会得像1加1等于2介简单。

我个爷叔也是老师，教中学语文个。婶娘是伊个同行，勿晓得教啥，反正勿是教数学。爷叔是几个兄妹当中最小个，伊搭婶婶结缘，是阿拉亲眼所见个。婶婶个父母也侪是老师，笑眯眯个看好仔自家女婿加入教师个队伍。

大孃孃、小孃孃也是教师。不过伊拉呒没寻教师做配偶。大姑夫是空军高级军官，口才邪气好，伊讲闲话带有福建口音，每一句侪邪气有剧场效果，阿拉一边勒捧牢肚皮笑，一边想：大孃孃语文教学骨干，搿是熏陶出来个呀！小姑夫呢，是造船厂厂长，口才也勿输拨连襟。阿拉假使有做勿出个数学题、物理题，就常庄去寻伊，伊会得邪气得意个教阿拉哪能解方程。随便啥个问题侪难勿倒伊，伊个邪气动听个山西口音、热情而孜孜勿倦个态度，让阿拉觉着伊搿位“家庭教师”胜过学堂里个老师了。

同行做夫妻，想必有勿少优点：彼此理解，彼此默契。老师夫妻，大概是同行夫妻当中概率最高个。老师个离婚率也好像比别个行业少。

侬可以勿要纠结哪能称呼班主任个配偶了，叫“某某老师”就可以了。不过呢，勒学业浪，侬好像就拥有了两双“审视”侬个眼睛。侬是优秀生还是皮大王，老里八早就进入了老师“哀位”个法眼了。

有辰光，勒屋里向听爷娘嘎山湖，啥人哪能、啥人又哪能……哎呀，侪是我从小认得个教师夫妻，根本是嚼勿出啥个新鲜面孔来个。

爷娘是老师，小囡可能会得对老师搿个行业缺少眼别个小囡所拥有个伊种神圣感个伐？——爷懒扑，拨外婆骂，娘粗心，忘记脱几个子女个生日。

顶顶让人头痛个是，勿关是小学还是中学，班主任侪是爷娘认得个教师朋友，勿单是一个，还可能是一双——搿就是讲，有四个人可以管牢侬。要是侬拨评上优秀了，人家会得怀疑，是爷娘个同行勒刻意帮忙伐？所以呢，自家是绝对勿可以没出息个，否则爷娘要勿好意思再教人家了。

曾经带仔小囡去补课。目标是教化学个，不过呢，拨老师个太太，一位优秀个语文老师吸引牢了，几个蛮长蛮大个男生勒老老实实记笔记。化学搭语文两个阵地，两片世界，同时存在，却又是相安无事，老师之间也极其恭敬，彼此以某老师戏称。突然介觉着，所谓隔行如隔山，敬意来自距离。就气氛个自由、和乐来讲，教勿同科目个老师比教同一科目个做夫妻更加合适。

结婚50年，桃李满天下，搿一行搭其他行业勿同个是，伊收获人心。勒职业生涯当中，一个教师对好仔另外一个教师个职业人生：伊眼有才有德个人，侬见识了伊个初心。即使侬忘记了，我还帮侬记勒海。我是侬辛苦耕耘人生个见证。