老上海的茶馆（中）
沪语朗读：渺渺
老上海的茶馆（中）
来源：老有上海味道
作者：沈嘉禄
推荐：丁迪蒙
朗读：渺渺
提起上海个茶馆，青莲阁是勿能勿讲个。因为迭只茶馆个沧桑变化，印证了旧上海茶馆个发展历史。上个世纪二十年代，如今个福州路，当时叫四马路个地方，真个是比南京路（当时叫大马路）还闹猛，勒搿条路顶顶闹热个中心，就是现在个外文书店搿搭，叫“昼锦里”，青莲阁就勒此地块。
迭家茶馆原来是华众会会址。小说《海上花列传》一直会提到华众会个，伊是文人骚客雅集个好地方，里向有茶食，店堂陈设也蛮考究，差勿多有了茶馆个原始样子，可以看成是青莲阁前身。我买到过本由近代海上画家吴友如画个《晚清社会风俗百图》影印本，搿个里向就有一幅《华众会啜茗品艳》，画出来个场景就是上海洋场景色。而戴教邦个《新绘旧上海百多图》画册里，也有两幅可以说明问题，一幅是“青莲阁多野鸡”，还有一幅是“昼锦里多女鞋店、香粉店”。搿搭画里向个青莲阁勿单单指茶馆，是泛指搿一带地方，而茶馆跟女鞋店、香粉店相邻而立，实在也叫人想象当时青莲阁个闹猛气派，跟伊眼青楼女子个鬓影衣香，一道构成了老上海泛黄个风情。
青莲阁勿仅仅吃茶，要是睏了，还可以隑了茶桌浪向打只瞌“目+充”，假使肚皮饿了，还可以买到各种点心，像生煎馒头、蟹壳黄，或者豆腐干、茶叶蛋咾啥，侪有个。后首来，青莲阁又进一步拓宽经营范围，勒楼下搞起了弹子房，甚至还有哈哈镜、西洋镜搿能个游艺项目，使得客人大开眼界，目迷五色，勿肯离开。近代上海小说家包天笑写个《钏影楼回忆录》，老作家郑逸梅写个《三十年来之上海》，也侪谈到过青莲阁，认为青莲阁勒上海确实有“耐人逗留依恋”个特色。
后来，青莲阁年久失修，茶馆老板就拿伊盘拨了世界书局个沈知方。搿是1932年个事体了。葛末青莲阁到啥地方去了呢？老板选中了现在湖北路福州路口个转弯角子搿搭，造了一幢三层楼个新建筑，二楼是米行搭仔茶室，三楼就开辟成“小广寒宫游艺场”。“小广寒”里向游艺项目勿少，老板又暗中经营娼妓生意，兜揽狎客，一时浪向乌烟瘴气，茶客也是鱼龙混杂，新青莲阁成了富商巨贾搭仔地痞流氓寻欢作乐、放浪形骸个场所。游艺场收入当然超过了二楼个茶馆。但是老茶客觉着从此青莲阁个茶就勿好吃了，有眼茶客就改换门庭，转移到新雅、大三元、清一色、羊城、金陵、岭南、东亚咾啥一眼广东人开个茶馆去了。抗战以后，青莲阁茶馆始终呒没恢复从前个生意气派，早期个闹猛也就成了前尘往事了。
南京路浪个五云日升楼也曾经风光得勿得了，迭家茶馆是清朝末年开张个，位置就勒南京路浙江中路口。光绪三十四年，上海第一条有轨电车从静安寺路经过南京路到外滩，就从五云日升楼下头经过。通车搿日天，日升楼就是最佳观景制高点，座无虚席，阳台窗口，轧得呒没立脚个地方。
老上海讲起迭个黄金地段个茶楼，总归要津津有味个讲一讲山东马永贞个故事。清朝末年，马永贞到上海来卖拳头，号称“脚踢黄河两岸，拳打南北两京”，跟伊上过手个，呒没一个勿是拨打翻勒地浪爬勿起来个，一记头名声大振，中外拳手侪服帖个。啥人晓得迭个马永贞倒有点神野无知了，动脑筋勒马贩子身浪向捞铜钿。马贩子从北方贩马到上海，先要孝敬伊，否则伊就以相马为名，随手勒马屁股浪一拍，搿匹马就受了内伤，再也卖不出去了。马永贞个“马屁工夫”真是勿得了啊。马贩子对迭个山东老乡恨之入骨，板要除脱伊再称心。伊拉就推举一个绰号叫“白癞痢”个人，担当起迭个使命。通过侦察，了解到马永贞每天早浪板定要到五云日升楼汏汏揩揩，再吃茶吃早点，一年四季勿变。白癞痢就准备了一包石灰，挑选了十几个强壮个马贩子埋伏勒茶楼个楼梯边浪，等马永贞弯腰揩面个辰光，杀手拿石灰当肥皂送拨了老马。马永贞两只眼睛拨石灰蒙脱，一眼睁勿开，马贩子就一哄而上，拳脚刀枪一道上，一歇歇辰光，一代拳王就一命呜呼了。
搿桩事体勒上海滩引起了老大轰动，一眼小报又趁机有声有色大肆渲染增加销路，乃末家喻户晓了。茶馆里出了人命案子，迭个对五云日升楼个声誉是一大损失，有眼茶客从此就再也勿登门了。
上世纪三十年代，五云日升楼终于日落西山，关门大吉了。
本公众号最近发布的原创：
图片来自网络