告化子吃死蟹——只只好
沪语朗读：洪瑛
朗读者
告化子吃死蟹——只只好
作者：薛理勇
改编：郭莉
朗读：洪瑛
推荐：丁迪蒙
眼门前是张最近勒勒网浪向传得闹猛来西个照片，画面浪一个衣衫褴褛个男小人，身边还有一个衣裳打了交关补丁个大人，坐勒露天里吃大闸蟹，破台子浪至少堆勒十几只块头邪气大，每只估计总要有四两重个大闸蟹。据说迭张照片是一个美国水兵1945年勒上海拍个，照片背后有文字说明，写个是“Boy eating crab”，也就是“男小人勒吃蟹”。上海人所谓“大闸蟹”，正式学名叫做“中华绒毛蟹”，顾名思义就是中国个特产，迭个外国摄影师对照片个解读并没有错。但是，中国人倒是看勿懂了。
众所周知，大闸蟹又叫做“湖蟹”，主要活动勒长江下游个江、河、湖泊当中，产量并勿高，价钿倒勿低。野生个大闸蟹块头勿大，三两以上个大闸蟹价钿会得更贵眼，一般人家侪买勿起、吃勿起。乃末，现在个上海人对搿张历史照片就勿理解了，有人讲，当年大闸蟹丰产，价钿便宜，平民吃蟹，真是大快朵颐；也有人讲，饥民食不果腹，饥肠辘辘，只好拿大闸蟹充饥。
上海人有一句俗话叫“秋风起，蟹脚痒”，我觉着搿句言话应该是“秋风起，蟹脚硬”个误读。辰光到了孟秋九月，大闸蟹成熟了，蟹斗里向长足了满满个蟹膏蟹黃，蟹脚也硬扎了，一只只蟹勒勒爬行辰光，蟹脚跟蟹脚碰着，或者蟹脚跟石头撞着，侪会发出索索索个响声，所以大闸蟹还有一个名字叫“郭索”。当然，一般人家侪是通过掐捏蟹脚，来判断大闸蟹个好坏个。勒上海个蟹摊头浪，家庭主妇个手节甲勒勒蟹脚浪掐掐捏捏，摊头个主人就一定会得讲：“侬捏得轻眼，蟹会得拨侬捏煞脱个！”
大闸蟹主要出产勒太湖流域个苏州、无锡、太仓一带，经过长途贩运，总算到了上海。湖蟹含有大量个蛋白质，伊死脱之后老容易变质腐烂，吃死蟹就会得发生食物中毒，所以，上海人是勿吃已经死脱个大闸蟹个，摊头主人会得拿要死勿死个“撑脚蟹”搭仔已经死脱个蟹一道掼勒边头，穷人家买勿起大闸蟹，不过也会得用顶顶便宜个价钿买“撑脚蟹”，但是告化子连买“撑脚蟹”个铜钿也呒没，索介跟摊头主人要两只死蟹。搿辰光，摊头主人会对伊发出忠告：“死蟹勿好吃个，要吃坏肚皮个”，告化子就讲：“覅要紧个，迭只蟹还呒没死透，侬看，伊个脚还勒勒动”。搿能一来，上海就流传了“告化子吃死蟹——只只好”个歇后语了。
从前，江南一带拿长勒江、河、湖泊里向个蟹，统统侪叫“湖蟹”，大闸蟹是湖蟹当中块头最大个。吴方言讲“用水烧物事”叫“煠”，迭个字交关人写勿来，以为是只有读音，呒没文字个，其实就是迭个“煠”，写起来是拿“蝴蝶”个“蝶”字，虫字旁改成火字旁。搿种湖蟹块头大，一般侪是拿整只蟹放到开水里煠熟，再蘸了姜醋一道吃，所以叫做“煠蟹”。一直到现在，有“蟹大王、酒祖宗”美名个王宝和酒家，仍旧保持传统，用水煠个方式烹饪大闸蟹。
清朝辰光苏州人顾禄勒勒伊个《清嘉录·卷十·煠蟹》里向搿能写：
湖蟹乘勒潮水涌上来，渔民用家什捉蟹，挑到城里向，居民侪买来送礼请客过老酒。吃蟹还有“九雌十雄”个讲法，就是九月份是吃团脐个雌蟹好，十月份就要吃尖脐个雄蟹好了。用清水煠了吃，所以叫“煠蟹”。
问题是迭个“煠”尽管是一个口语常用词，偏偏写起来是一个冷僻字，认得迭个字个人勿多，再讲水煠个“煠”，跟水闸、闸门个“闸”，勒勒吴方言里向读音是完全一样个，乃末，“煠蟹”就拨同音字“闸蟹”代替了。吃湖蟹讲究个是块头要大、蟹脚跟蟹斗里向要饱满，葛末商家为了摆噱头，勒名字前头又加上一个“大”字，乃末变成“大闸蟹”了。结果弄得现在个人望文生义，误以为搿种蟹是长勒水闸边头个，要么是勒勒水闸边头捉着个，所以叫伊“大闸蟹”了。
随便侬是水煠还是清蒸，活个大闸蟹必须“五花大绑”，要勿然大闸蟹拨水一烫或者拨蒸汽一烘，当然就会犟，一犟，蟹脚蟹钳就会从身浪断落下来，变得一眼呒没卖相，看上去邪气勿适意，当然也卖勿出价钱。
回过头阿拉再来讲搿张照片，上头个大闸蟹显然呒没捆扎过，蟹脚蟹钳跟蟹身是连勒一道个，葛末毫无疑问，迭眼蟹本来就是“死蟹一只”！大概就是告化子从蟹摊头浪向讨来个死蟹。所以，用“告化子吃死蟹——只只好”来搭搿张照片定名，倒真是顶顶妥当、顶顶合适个了。
点以下文字即有精彩回放：
评弹票友写个淮海路（下）
评弹票友写个淮海路（中）
评弹票友写个淮海路（上）
我听“无线电”
我是海洋
微信群和咖啡馆
我是土地
我是花
我是水
潘家姆妈
图片来自网络