手背上的一撮cok盐（上）
沪语朗读：牛美华
朗读者
手背上的一撮cok盐（上）
来源：文汇笔会
作者：沈嘉禄
改编：郭莉
朗读：牛美华
改革开放四十年了，对于老百姓个日常生活来讲，感受最深刻、最真切、也最有戏剧性个变化，是吃饭台子浪向个变化。国门刚刚打开个辰光，还是票证时代末脚个老百姓，做梦也勿会想到，现在食品供应有得介充足，简直就像滔滔洪水奔到眼门前来，叫人眼花缭乱，勿晓得哪能桩事体，可能还会得因为亢奋、紧张、困惑、急躁，而导致一个人肾上腺素飙升。
先讲只笑话，上世纪八十年代末，我欸歇辰光是单位里向搞工会工作个，同时还兼文宣搭仔美工。有一日天，领导交拨我只任务：去搭家西餐馆做只广告灯箱。欸歇辰光还呒没喷绘、电脑刻字咾啥个新技术，侪是凭了一种愚公移山个精神，再加上一把钢丝锯（gá）子，拿彩色有机玻璃锯成功美术字。文字显示了“菲力牛排”、“西冷牛排”两只菜品，我搞勿懂，就搭西餐馆个经理打电话：迭个两道菜应该是“菲力浦牛排”“西泠牛排”伐？菲力浦大概是一位亲王，伊欢喜吃搿种牛排，所以嘛……用名人来搭一道菜做广告，勒欧洲是有传统个。西冷牛排大概应该叫西泠牛排，杭州有一家西泠印社，搿道菜大概是为了迎合中国人个喜好，所以发明个伐？”
店经理勒电话里向结结巴巴，大概拨我理直气壮个言话吓懵脱了：“阿拉一直是迭能叫个呀，侬讲个大概是真个……葛末就照侬讲个去改好唻。”灯箱做好以后挂勒勒店门口，一通电，市场经济刚刚启动辰光搿种大红大绿个艳俗光芒，就马上闪起来了。我呢，当时已经发表过几篇小说了，勒搿件“作品”浪向也实现了一趟勘误搭仔传播个使命，心里向是有眼小得意个。三、四年之后，我从一本食品杂志里向看到，菲力、西冷，侪是特指牛身浪向个某只部位，搭亲王、印社实在是浑身勿搭界个呀。我拿杂志卷起来狠狠叫抽自家，面孔烫得唻像只烘山芋。唉！真是无知者无畏，迭个玩笑开得实在忒大了呀。静下来再一想，迭家西餐馆就勒南京西路，老克勒顾客有的是，难道就没人看出问题来啊？
一直到乃，我要是去吃西餐，眼睛拿菜单一扫，出现菲力或者西冷两个字，我还是会想起老早搿桩事体，看来是要为迭个羞愧一辈子了。尽管后首来我发现，类似搿种指鹿为马个笑话，勒交关人身浪侪发生过个。中国跟世界疏隔实在是忒长辰光了，勒食品流通方面也是迭能。
其实，勒上海人个平常讲个言话里向，经常会跳出“沙司”“白脱”“起士”“布丁”“曲奇”“别士奇”“忌廉”“太妃”咾啥带仔洋味道个名词，搿眼侪是一百多年前头，魔都引进外来食品个历史痕迹。所以阿拉勿难理解，肯德基、麦当劳先后勒上海登陆，中山东路、淮海中路黄金地段开出来第一家具有样板意义门店个辰光，哪能会得成功，成了轰动全上海个新闻。我到现在还记得，阿拉一家门第一趟到从前上海总会、国际海员俱乐部，就是现在个华尔道夫个底楼，吃一顿鸡腿薯条汉堡包辰光，用脱了一个号头个工钿，窗口外头是轧满了涎唾水嗒嗒渧个看客呀。
改革开放个脚步越来越快，也越来越坚定有力，勒食品搭仔食品技术引进搿档事体浪，大家个见识常庄是跟勿上形势个。有一年上海派出一只厨师代表团到欧洲去参加国际烹饪奥林匹克大赛，点心师到主办城市个超市去采买原材料，想勿到光面粉居然就有几十种！啥个高筋、中筋、低筋、无筋咾啥，啥个增钙、富铁、全脂、脱脂、全麦咾啥，名堂多得看也看勿懂。阿拉搿眼师傅勒国内做仔几十年了，可以选择个只有两种：标准粉搭仔富强粉。弄到后来，师傅伊拉只好每种买一眼，揉（肉）勒一道倒是歪打正着，拿着只大奖。还有一趟勒只重要会议浪向，我听讲有交关人写信拨市政府，要求严格控制合资企业生产可口可乐，理由是：做饮料罐头要消耗交关邪气金贵个铝材，迭能下去会影响阿拉个国防建设。搿封信是有分量个，可口可乐真个就减产了，饭店里向也呒没供应了。不过蛮快事体就反弹了，而且产量成倍增加，连得百事可乐也来分一块奶酪了。
看来搿就是大趋势，就是市场需求了。
往期回顾：
图片来自网络