牵记一只油墩子
沪语朗读：雅馨斋
牵记一只油墩子
作者：郭敏
修改：高 仁
诵读：雅馨斋
上海人过冷天个辰光，西北风辣弄堂里窜来窜去，上海各种弄堂邪气多，特别石库门弄堂比较阔，总感觉凉嗖嗖格，就是曾经勒勒靠近卖牛仔裤个青海路邪气闹猛地方，有一个阿婆摆起卖油墩子个摊头。
凡是氽油墩子个阿婆迭眼家什（生）装备侪差不勿多个，一只小矮登，一只煤球炉，一只铁镬子，跟普通屋里用个物事一样个，选只铁镬子浪多了一只铁丝个网架子，专门沥油个，脚跟头就是一面盆拌好个萝卜丝，搭仔一面盆薄溏溏个面糊。
有一只长柄个勺子，勺子是白铁皮做个，椭圆形个底，比开口部位稍许小一眼，大约模两三厘米深。做个辰光先舀一勺子面糊衬底，再松松交堆一层萝卜丝辣上头，再淋一勺子面糊上去，封牢，连勺子一道摆进油镬子里氽，勺子柄顶端有个弯头，可以钩辣铁镬子沿口浪，然后阿婆可以腾出手来做下头一只。等油墩子表面被氽成功金黄色，拿铁勺子一翻油墩子从勺子里落到油里继续再氽，再用筷子辣油镬子里翻一歇，看上去脆了就搛到铁丝网浪向沥油，也可以稍许冷一冷，否则就算用纸头垫好，也因为太烫，根本呒没办法捏上去。
长远呒没吃了，总有奌牵记。前两天，到七宝老街去白相个辰光就碰着氽油墩子个摊头，5元洋钿一只，比从前贵交关，我问摊主小姑娘：阿好让我等一只刚刚从油镬子氽出来个好伐？小姑娘虎起仔面孔讲，侪是刚刚氽出来个！伊从铁丝网架子浪搛了一只油墩子拨我，手捏上去已经勿大烫了，咬一口，倒是热烘烘个，正好！味道也正正好。搭老早辰光喫个味道一式一样，再想想小姑娘脾气稍许大着一奌，做生意倒还是一眼也不推板个。
往期回顾：
图：网络 / 编辑：渺渺如胭
赞 (0)