成语故事——守株待兔
沪语朗读：王晓红
朗读者
守株待兔
撰写：丁迪蒙
朗读：王晓红
勒拉春秋战国个辰光，宋国有一个农夫，伊每日天到田里向去做生活，做得邪气辛苦，老吃力个。伊早浪向老清老早就出去，一直要做到太阳落山，天暗下来了再回转去。伊个生活虽然勿大富裕，但日脚还是过得下去个。
有一日天，伊辣田里向拔野草，搿眼野草假使勿拔脱，种勒海个庄稼个营养就要拨分脱了。太阳老大，辣豁豁个晒勒伊个背浪向，伊个汗嗒嗒渧个流下来了。
就勒搿个辰光，伊看见有一只兔子突然从草丛里向跳出来，慌慌张张个从伊个身旁边奔过去了。迭只兔子奔得快得勿得了，一记头就撞到田旁边个一棵树浪向，掼倒勒地浪一动也勿动了。
农夫快点拿手里向个锄头放下来，奔过去看搿只兔子，兔子个头颈骨折断脱，已经死脱个。农夫搿记邪气开心：“今朝我个运道真是勿错，呒没费一眼眼力气就拾到了只兔子。哈哈，佮算个呀！兔子肉可以吃，兔子皮还可以去卖钞票，开心啊，真叫开心。”接下来，伊又想了：“为啥要一日到夜勒拉介毒个太阳下头辛苦做生活呢？假使我每日天侪可以拾到只兔子，葛末我就可以轻轻松松个过日脚唻！”
从此以后，伊还是每日天到田里向去，但是呢，伊勿去种田了，而是去守勒树个边头等，等兔子再来撞煞脱。
日脚就搿能样子一日天一日天个过去了，田里向个野草呢，越生越长，已经超过秧苗了。但是，兔子一直也呒没再来过。
没多少辰光，田里向个秧苗因为呒没人去收作、照顾侪枯煞脱了。
点以下文字即有精彩回放：
图片来自网络
赞 (0)