西站看火车
沪语朗读：洪瑛
朗读者
西站看火车
作者：俞鸿虎
来源：新民晚报
滬語改寫：郭莉
朗讀指导：丁迪蒙
朗讀：洪瑛
我欢喜看火车，顶早可以追溯到一个甲子以前。
欸歇辰光期末考试刚刚结束，临战状态放下来了，心情邪气轻松。上海火车西站传来了一阵阵火车汽笛声，对一个少年就充满了诱惑力。我跟姆妈讲，要带弟弟妹妹去看火车，姆妈搭我交代了几句，就让阿拉一道出发了。
一路浪向，大家讲个侪是火车啊、西站啊，还有铁路桥，弟弟妹妹侪老兴奋个！走出西新街弹硌路，来到长宁路，远远叫就看见长宁路凯旋路口搿座碉堡式建筑，铁道口已经拦好木挡子了，黑压压一片人群侪堵勒铁道两边，公交车、卡车一埭路里排到了西新街。阿拉几个朝前轧到木挡子边头，西站个三条铁轨整整齐齐排勒眼前。弟弟妹妹兴奋个勒边头猜测：“火车从阿里一面过来個？”有个讲是从南面过来；有个讲是从北面过来。我看了看车站两边个信号灯，正想开口，弟弟抢先回答：“火车从苏州河伊面过来個。”我存心问伊：“为啥？”伊回答讲：“因为南面信号灯是绿个。”弟弟欸歇辰光还呒没读书唻，倒是有了迭份机灵聪明。
阿拉巴望火车快点过来。火车偏生一眼也勿急，远远叫冒勒烟，拉嚮了汽笛，终于，机车经过了道口。只看见火车司机瞭望前方，搿副腔势交关神气：就是伊驾驶介长个铁龙，拉勒介许多车厢，跑遍了全国城乡大地！我心里对火车司机佩服得五体投地，也羡慕伊可以一路美景纵情观赏，几化自豪啊！机车司炉工，是拿乌黑煤炭用铁锹送进火红炉膛里个。阿拉还来勿及细看，“刺啦——”只看见一道白色蒸汽朝阿拉冲过来，顿时眼前白茫茫一片，啥个也看勿到了。等到蒸汽散脱再看，原来迭个是一列货式车，有个车皮装个是木头；有个装个是拖拉机，闷罐车押车人立勒车门边，看牢木挡子外头个人群，好像阿拉侪成了伊眼睛里向个风景。弟弟妹妹一节一节数了开过去个车厢，吵吵闹闹。最后一节车厢好像特别短，搿是列车长个专用个地方，列车长迭个辰光立勒在车厢口栏杆后头，手里拿了一面绿颜色小旗子，搭道口值班员手里向个绿颜色小旗子一道互相摇动致意。
阿拉兄弟姐妹几家头又上到铁路桥，过路人侪勒勒小桥狭窄个水泥板浪向匆匆经过，推脚踏车个擦身交会，双方侪要侧过身体再好通过。看看桥下头又黑又臭个苏州河，一只小火轮拖了一长埭满载货物个驳船，朝黄浦江开过去。要是齐巧有火车呼啸而过，铁桥也會跟勒晃动個，我來煞勿及关照弟弟妹妹拉好栏杆，等搿部客车一阵风能介，朝北站奔过去。
勒西站个候车室里向，有几排木头椅子磨得蹭亮，几个绍兴农民伯伯坐勒椅子浪向等车子，面前擺勒海两只空箩筐，一根扁担横勒上头，我猜伊拉是卖“绍兴霉干菜”个，准备乘慢车回轉去。
售票窗口上头有全国铁路里程表，我从上到下一眼一眼看过去，北京到上海居然有介许多车站，数也数勿过来！心里想，我啥辰光好去北京看看天安门呢？
现在，我最小个阿弟也已经退休两年了。我个外孙囡也已经上幼儿园了，每日天经过何家湾铁路道口，外孙囡跟我小辰光一样，也邪气欢喜看火车。
往期回顾：
图片来自网络