七十年前的“吴良材”
沪语朗读：李群
七十年前的“吴良材”
来源：新民晚报
作者：马蒋荣
沪语改写、朗读：李群
我平常对报纸浪向铺天盖地个广告勿大感兴趣，顶多是看看标题就算过去了。假使发觉有搭自家过日脚搭界个，再会花点辰光去关注一下里向个内容。不过，虽然阿拉屋里向人老早就侪配好了各自合适个眼镜，但是我对新民晚报浪每趟刊登个“吴良材”眼镜专页广告，总归要仔仔细细个看看叫。搿勿仅是因为“吴良材”眼镜老牌子个名气响，更加是为之我老爸留下来个一副70年前配个金丝边老花眼镜搭仔原配眼镜盒浪个“吴良材”老商标勒我手里收藏勒海！
我个爸爸马小毛是14岁经同乡人介绍，从绍兴乡下来到上海滩学“生意”个。吃了三年个“老卜干饭”，就是帮老板带小人、生炉子、汏衣裳、跑街兜生意、理货、剪零件毛刺咾啥个。后首来再拨允许跟牢师傅学手艺。老爸勤奋聪明又吃得起苦，勿到二十岁就成为了一名会操作车床、刨床、钻床、铣床等当时邪气吃香、邪气现代个“外国铜匠”！
没想到，我老爸40岁勿到个辰光，发觉眼睛看物事迷迷糊糊了。人家讲大概是“老花”了，搿要命唻，因为伊加工个侪是老板厂里最精密个零件，稍微有眼差错，葛是要吃排头个呀。伊辰光老爸个薪水就勿算低个，所以马上按照同事个介绍，去了当时名气老响个“吴良材”眼镜店配了迭副金丝边个老花眼镜。
不过当时迭副眼镜并呒没拨老爸带来好运。有一趟，老板看到我爸爸戴了迭副眼镜做生活，就半真半假个讲了一声：小毛师傅，眼睛勿来三了？我招个徒弟拨侬带带好伐？我爸爸末，平常是一个人称“三拳头打勿出一只闷屁”个人，性格内向，自尊心特别强，听了迭句闲话末，就认为老板是嫌比伊了。想想过两年，年纪再大一点，拨老板一脚踢开，乃末哪能办？哪能养活一家门呢？还是趁早凭自家有力气有技术，另起炉灶伐。
快来西个，爸爸辞职开了爿勿大个五金作坊，开始自家做小老板了。勿晓得搿记是运道好，还是爸爸老早就有打算，伊戴仔迭副金丝边眼镜，再配上得体个衣裳皮鞋，搿个为伊勒激烈竞争个生意场浪赢得了勿少得分。
后来，划阶级成分个辰光，伊拨归类成了小业主。勒勒上世纪70年代前，“小业主”是搭资本家差勿多个“剥削阶级”。就是因为爸爸技术好，勒公私合营个上海缝纫机零件九厂，让伊专门负责磨制一种特殊个铣刀，搿铣刀是用来加工万能搭仔半万能蝴蝶牌缝纫机浪个“针板”用个。重要个是，迭只牌子个缝纫机是专门出口创外汇个。
搿技术生活，爸爸一做就做到了1974年，搿一年伊65岁。等培养出了能够独立接班个徒弟之后，伊再退休个。迭副用了介许多年数个眼镜也随牢伊一道“退休”了。
退休以后，爸爸因为眼睛老花度数增加，又重新配了副新个眼镜。乃末迭副金丝边眼镜搭眼镜盒子浪留下来个“吴良材”老商标，成了我个珍藏，也成为了我对爸爸永远个念想！
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，恳请留言指正。
感谢您的支持转发，欢迎关注本公众号