手背上的一撮盐（中）
沪语朗读：牛美华
手背上的一撮盐（中）
来源：文汇笔会
作者：沈嘉禄
改编：郭莉
朗读：牛美华
再朝后去，阿拉侪晓得雀巢咖啡个“味道好极了”，相信“人头马一开，好事自然来”，也开开心心个叫费列罗巧克力勒婚庆辰光，让新郎官“把最好的送给最爱的”。侬看，就是外公小辰光吃过个“荷兰水”也重返大上海了，不过现在迭只物事叫“七喜”。至于轩尼诗、蓝罐曲奇咾啥；马卡龙、依云水、哈根达斯、三文鱼、金枪鱼咾啥；必胜客、星巴克咾啥，侪勒侬齐巧需要个辰光，轧进了侬个寿庆、升学就职、买房买车、领年终奖、旅游度假……还有，一家门团圆个吉日良辰，真是叫“今夜万家灯火时，或许隔窗望，梦中佳境在！”
进入新世纪，为扩大开放，满足市场需求，上海勒浦东新国际博览中心举办进口食品博览会，一年一趟，迭个真叫是万舸争流啊。我以记者身份去过两趟，还以美食评论家身份去过两趟。每趟去侪要擦破脱眼皮，但实在是惊喜连连啊。
中国是世界公认个美食大国，历史浪出过伊尹、易牙、太和公、膳祖搿能个名厨，出现了宋五嫂、董小宛、萧美人、芸娘搿能个素手做汤羹个绝世佳人，还有谢讽、苏轼是、倪云林、袁枚、李渔、朱彝尊咾啥一帮会吃、懂吃个文化人，但是阿，阿拉还真是勿好自高自大个。世界浪个美味实在是忒多了，有交关物事，阿拉根本还呒没机会尝一尝个。
进口食品博览会展览个辰光，来自世界各国个供应商一个个摆出摊头，一家家大别苗头，风味美食是琳琅满目呀，展出个食品也是千奇百怪，可以让观众搭仔采购商试吃个食品，勒长台子浪拗出各种各样个造型，再加上边头个美女像唱歌剧咏叹调搿能勒叫卖自家个美食，简直让侬一听就食指大动。欸歇辰光，精明个家庭妇女还呒没想到去迭个地方，头颈里挂勒吊牌个各位爷叔拉侪是文质彬彬、浅尝辄止，举止得体个。
有一趟，我拨个老外叫牢，伊拿过来一小杯酒叫我试试味道。酒个颜色赛过月光，香气四溢。我咪仔一小口，全身上下简直就像拨熊熊个烈火包牢了！打听以后再晓得，迭个就是墨西哥鼎鼎大名个龙舌兰酒。想勿到勒搿趟展览会浪向，总算搭伊碰面问候了。
还有一趟，我经过韩国客商个展台，供应商花了勿小钞票，请了演员着好民族服装，勒一只模仿宫殿个场景里向“开琼筵以坐花，飞羽觞以醉月”，用电视剧《大长今》里向个人物造型来搭中国观众近距离接触。一位“大长今”笑咪咪个，捧牢刻花青瓷个小酒杯请我品尝，我咪了一口，金黄色个液体也让我一记头有了血液奔流个快感。通过翻译我再晓得，搿就是杜松子酒。对了，勒美国或者西班牙个小说里向，搿种烈性酒是经常出现勒嘈杂个酒吧里个，作者用杜松子酒为畸形个感情或者凶杀咾啥情节做铺垫。葛末，哪能会得出现勒韩国人个展区呢？看了说明书再晓得，原来，杜松子酒本名叫金酒，勒阿拉台湾也叫琴酒，最早是荷兰人发明酿造个，勒英国形成产量，后首来就勒世界浪有名了，是世界公认个第一大类烈酒。因为搿种酒有种杜松子特殊香味，所以也叫做杜松子酒。金酒个度数搭仔品性，特别适宜调制鸡尾酒，乃末，伊也有“鸡尾酒心脏”个美名。韩国金酒产量是世界第一，北京也有专门个金酒厂。
又有一趟，我勒一只俄罗斯客商伊面看到一种深红颜色个果子酒，边浪还有酿造搿种酒个浆果，搿种浆果跟平常看见过个桑葚老像个，身浪向也侪是一粒粒凸出来个小豆豆。但是，伊个颜色红艳艳个，一只只看上去玲珑剔透。一道去个朋友懂点外语，伊一面斟酌考虑、一面搭我讲：“搿是种必须长勒盆子底下头个果实。”“哦！一定是覆盆子酒了！”我有眼激动了，勒左拉、莫泊桑、屠格涅夫、托尔斯泰个小说里向，我老里八早就晓得“覆盆子”了，伊总归出现勒女主人公迷茫、忧伤个诗意场景里，但是，我从来呒没正式看见过伊个真身啊！我真个是要陶醉了。
往期回顾：
图片来自网络