故里春秋（二十八）
作者：朱海洪
沪语改写：边秦翌
沪语讲述：薛南平
山西汾酒是名酒。爸爸平常辰光肯定是舍勿得吃个，只有吃面拖黄鱼个辰光，伊再会得倒上一小杯。汾酒个瓶子邪气漂亮，是乳白颜色个，扁长圆弧个瓶面浪，有幅水墨丹青：垂髫小囡骑勒勒牛背浪向，伸手指牢仔远方，旁边还用行书写了一首古诗《清明》：
清明时节雨纷纷，路上行人欲断魂；
借问酒家何处有，牧童遥指杏花村。
汾酒是中国白酒个老祖宗，已经有得4000年个历史了。汾酒最开始勒勒山西省汾阳市杏花村出来个，所以又叫做“杏花村酒”。最最老底子，还是南北朝个辰光，搿只酒叫做“汾清”。“汾清”其实是一种黄酒，因为挨个辰光中国还呒没蒸馏设备。一直到北齐武成帝高湛拿“汾清”作为宫廷御酒，汾酒由此载入二十四史，成为最早个国酒了。杏花村个“汾清”一直到宋代以后再演变为白酒，也就是后首来海内外侪邪气有名个山西汾酒。
山西汾酒莹澈透明，酒气馥郁，入口香绵，回味悠长。迭个酒个醇香味道全部要靠杏花村优质个泉水。只要是名酒产地，必定有得好泉好水。杏花村“古井亭”地下水资源丰富，水质优良，岩层里向“锶、钙、钼、镁、锌、铁元素含量高，自然酿出好酒”。
二百多年之前，山西盐商到偏远个贵州去经商。因为交通困难，盐商带汾酒勿方便，乃末，就勒勒贵州当地，用当地个玉米搭仔大麦，采用当地水，用酿制汾酒个办法造酒。呒没想到哦，贵州此地个泉水邪气独特，生产出来个酒别有风味，从此之后，茅台酒就成了山西盐商个私酿酒。
当然咾，如今个茅台已经是“青出于蓝胜于蓝”，名扬海内外，独步天下了。
又到了送别爸爸个日脚。出门之前个一顿饭还是蛮正宗个，当然还是有面拖黄鱼咾。爸爸还是老规矩，拿出汾酒，倒了满满个一小杯，一口头咽下去。
搀勒姆妈个手，我也跟到北站去送爸爸。
北站，上海人侪叫伊老北站，就是搿歇个天目东路200号。伊蛮有历史个，是1908年建成功个。迭个车站是由英国工程师设计个，红绿相间个站房有得四层楼搿能高。南大门个大屋顶采用个是中式琉璃瓦，看上去相当气派；中西合璧之中总归迓迓叫有眼海派个味道。
乘18路无轨电车到老北站。爸爸揹只包，手里拎只旅行袋，勒勒站台浪，搭仔姆妈讲闲话。
篜气火车头叫发叫发，慢慢叫个启动了，火车越开越快，爸爸挥手个身影越来越小，终于看勿到了。我呆呆叫个看勒海，觉着迭个铁轨哪能介长个啦，然后再想，迭个铁轨个末节头到底是啥个地方啦，埃面到底是啥个样子个啦，但是就算是想破了脑袋，我也想勿出呀。
交关年之后，经历了“革命大串联”搭仔“上山下乡”，我再懂得，所谓远方，就是个侬蹲个辰光一长，就巴勿得快点回来个地方。也是因为自家有了经历，再越加理解李叔同个传世佳作《送别》：
长亭外，古道边，芳草碧连天。晚风拂柳笛声残，夕阳山外山。
天之涯，地之角，知交半零落。一壶浊酒尽余欢，今宵别梦寒。
长亭外，古道边，芳草碧连天。问君此去几时还，来时莫徘徊。
天之涯，地之角，知交半零落。人生难得是欢聚，唯有别离多。
想想李叔同临终个辰光写个“悲欣交集”搿四个字，真正是耐人寻味。
空门大师个境界忒高深，而我呢，只必过是一个红尘当中个凡夫俗子，送别爸爸之后，心里向想个是：再会，盼望快点，真个再会。
往期回顾：
图：网络 / 编辑：渺渺