来源：新民晚报
作者：金洪远
沪语改写：高仁
诵读：刘时医
过年前头，屋里向人搭我老同事一道聚会，回转去个辰光我还带回去一袋鱼圆。迭个鱼圆洁白细腻，玲珑晶亮，卖相挺刮。根据我以往多年制作鱼圆个经验，搿趟鱼圆一定是精心制作个佳品。屋里向人告诉我，搿个鱼圆是同事个丈夫特地从湖北老家探亲带得来个。吃夜饭个辰光，搿只鱼圆汤，我配眼火腿片、菠菜勒里向，迭个赏心悦目个菜式，一记头吊足了所有人个胃口。孙女涵涵搛起一粒鱼圆摆到嘴巴里，马上就叫起来了：“味道好，好吃个！”搿只吃得老刁个小嘴巴里讲“好吃”末，看来是勿会得有啥龙头须个了。
大家侪吃了，真个。鱼肉细嫩鲜美，蛮有嚼劲，外加入口就有淡丝丝个鱼香味道从嘴巴里飘出来，勿愧为真材实料个好产品！
就像看到朋友个好文章欢喜勒几只群里“共享”一样，我自作多情个迫勿及待拿购物“信息”搭“鱼圆汤”个情况发布到群里向，引起群里吃货朋友个点赞搭购买欲。几日天以后，亲家第一个通风报信：味道老好个！伊还讲，近腔把闷勒屋里，有了搿能鲜美个鱼圆来解解馋，调调口味，绝对是最佳个选择。老同事平君是鱼圆个老吃客了，马上从网浪下单，一买就是十袋，是阿拉群里向说出手就出手个大户。按照伊个讲法：鲜香满口，一定是从新鲜活鱼浪向削下来个肉！哎——真勿愧是识货朋友。搭我一样，平君年轻辰光勒海滨小城居住，伊个辰光就欢喜动手做鱼圆，迭位识货朋友个评语，肯定是经验之谈。老同事平君下单买鱼圆个消息到后来大家侪晓得了。屋里向人搭我打朋讲，勿明真相个人还以为侬是湖北鱼圆个“敲边麻子”唻。讲句心里闲话，为受到疫情影响个湖北水产品尽一点微薄之力，拉动消费，难道勿是阿拉消费者个责任搭仔义务吗？再讲，对一般居民来讲，做鱼圆毕竟是费心费神个技术生活，现在有现成个美味鱼圆，吃吃鲜美、营养丰富个鱼圆汤，勿仅小囡欢喜，就是阿拉搿种牙齿勿灵光个老头、老太吃多了也用勿着担心消化勿良个。有眼性急个吃货迫勿及待个勒微信里向晒出一张张鱼圆汤个照片。大海碗里碧绿生青个菜叶，汤水上氽勒交关洁白个鱼圆，清新淡雅，就像江南个风景，让人禁勿住吟诵唐代白居易个《忆江南》：“江南好，风景旧曾谙。日出江花红胜火，春来江水绿如蓝。能不忆江南？”年轻辰光，学诗写诗认得个诗人阿林，还别出心裁个拿“扬州八怪”之一郑板桥当年品尝兴化特产沙沟大鱼圆写个一首诗来助兴：“溪上青鱼鲜，今朝尝的君家味，一只鱼圆值万钱。”素有“千湖之省”个湖北，烟波浩渺，用心个制作者拿活蹦乱跳个鱼鲜烹制成人见人爱个鱼圆，岂有不鲜不爽之理？！洁白个鱼圆凝深情。鱼圆，寓意“年年有余”搭“万事圆满”个双重好兆头。每当品尝鲜美个鱼圆汤，我搭屋里向人侪欢喜听手机里下载个一首久违个老歌：“高天上流云，有晴也有阴，地面上人群，有合也有分。南来北往，论什么远和近，一条道儿你和我，都是同路人。莫道风尘苦，独木难成林，一人栽下一棵苗，沙漠也能披绿荫。莫怨人情冷，将心来比心，一人添上一根柴，顽石也能炼成金。”
往期回顾：
我欢喜出发
买裙记
真想去看看你
沪语民谣——风雨
十日谈 | 云间超商购物忙
農曆廿四節氣詩詞誦讀 小滿——五絕·小滿
沪语民谣——小口罩
图：网络 / 编辑：渺渺
