当年，代购上海货
沪语朗读：胡剑慧
当年，代购上海货
来源：夜光杯
作者：周钰栋
沪语改写：郭莉
朗读：胡劍慧
推薦：丁迪蒙
勒从前一段辰光，上海个产品，小到蛤蛎油、百雀羚、香肥皂，中到服装鞋帽、床单毛毯，大到手表、收音机、脚踏车缝纫机，每一样侪可以讲是全国人民顶顶欢喜个。
国家实行计划经济个统购统销政策，对于皖南山区小县城里个百货公司来讲，一年到头也难得调配到一两件上海货。搿个辰光，县城里有交关像我一样，是学堂分配到搿搭工作个上海人，乃末阿拉个一眼同事、邻居赛过是近水楼台，每到年底，一个个侪来求我，回上海探亲辰光帮伊拉代购上海生产个日用品。
开头辰光，代购只限于勿需要凭票购买个雪花膏、百雀羚、药水肥皂、女式个半高帮套靴、解放鞋搭仔假领头咾啥；还有啊，一块两角一斤个什锦水果糖也是大家欢迎个。后来晓得，上海牙膏是可以用牙膏壳子调个，乃末大家就勒平常辰光拿牙膏壳子侪囥勒海，等我要回上海了，就侪交拨我去调。再后来，又打听到皖南山区搭仔江浙两省交界地方个几只小镇浪向，安徽粮票、布票是可以搭江浙粮票、布票通用个，而江苏粮票搭仔浙江布票又可以勒上海用，乃末大家就想足办法，到两省交界个小镇浪向去调票证，好让我到上海去搭伊拉代购糕点、服装、布料、床单咾啥。
因为每趟托我代购个人实在是忒多了，物事又是五花八门，为了防止出错，我拿每个人个名字、商品名称、数量咾啥侪记勒笔记本浪，代购辰光就可以按图索骥；买物事个辰光，还要拿货品个单价一笔笔记下来，交差个辰光就可以银货两讫。不过，代购数量忒多个辰光，就勿可避免会得碰着麻烦。有趟我连牢几日天勒弄堂口个食品店里买什锦糖，搿种什锦糖勿凭票，但伊限购，营业员怀疑我投机倒把，要报告派出所。要紧关头，碰到了几个来买物事个老邻居，伊拉证明，我买糖是招待乡下头来个亲眷，总算让我脱险。为了避免麻烦，我后来学乖了，每趟勒一家店里少点买物事，再调家商店去买。
但是啊，回去个路浪同样会得碰到想勿到个事体。
有一年，我带勒两只装满代购物事个大号旅行袋回皖南，中途要勒江苏溧阳转车。因为呒没赶上长途汽车，身边呢，又呒没单位开个住旅馆介绍信，乃末只好勒候车室里过夜了。半夜里，突然之间来了一帮纠察队员。伊拉头浪戴了柳条帽、手里向还有长个铁棍。伊拉查验我个工作证，还拿眼睛盯牢仔我带个两只旅行袋，命令我打开。搿记还了得啊！伊拉看见个是小县城里根本看勿到个上海货，再讲，数量是多得简直可以开家小个百货商店了。当然断定我是“投机倒把分子”，拿我带到指挥部接受调查。
我拨伊拉关勒间小办公室里。天亮辰光，一个纠察队员进来，拨我几张纸头一支笔，要我写悔过书。为了蒙混过关，尽早脱身，我“狠狠叫”拿自家“痛骂”一顿，并“发誓”要“改过自新”。纠察队员颠过来倒过去看了，其中一个突然发言话：“念侬是初犯，又真心坦白了，所以决定对侬从宽处理，放侬出去，但物事全部没收。”搿记僵脱了！我只头“嗡”一记大起来了，立勒海一动也勿动。一个队员走过来叫一声：“哪能？勿想走啊！”我只好慢慢叫转身，一声勿响朝门外走出去。
走到马路浪，只觉着冷天介个阳光哪能也会得介刺眼，眼睛也睁勿开了。我怕看到人家个异样目光，更加勿晓得哪能面对同事、邻居。还算好，大家侪是通情达理个，一道分担了物事没收带来个经济损失。
迭桩事体以后，我下决心，再也勿做搿种吃力勿讨好个事体了，但是每趟呢，又总归挡勿牢人家个软磨硬泡，最后勿得勿妥协，当然，为了防止重韬覆辙，我还是采取了“限购”措施，。
搿种辛苦个代购生活，一直到改革开放再彻底停歇。
现在，只要坐勒屋里向动动手节头，就有快递送货上门了。但是老同事、老邻居只要一讲到当年托我代购个事体，还是有讲勿光个言话，还要津津乐道伊拉当时用上海货个辰光个欸种“扎台型”，搭仔上海老字号品牌个质量。前一枪，有个老同事还指勒床上向个毛毯讲：“搿条凤凰牌羊毛毯，是侬当年搭我从上海买回来个，一直用到乃，质量好啊！”言话里向，有对上海老字号品牌个赞美，也有对我当年勿辞辛苦“冒险”代购个感谢。当然也少勿了对上海品牌个祝愿——希望上海产品还像当年一样，成为时尚标志，成为大家心目中个向往。
唉！想想，真是感慨万千呀！
往期回顾：
图片来自网络