归去来（一）
讲述：边秦翌
作者：欧阳德彬
来源：渡十娘
沪语改写、讲述：边秦翌
推荐：丁迪蒙
台风路过鸟城个辰光，文化路浪一棵大榕树像老人一样躺勒海死脱了。伊巨大裸露个树根，像猛禽一样抓紧大地，假使要拿伊拔出来，路面讲勿定就要坍塌了。市政部门邪气当心，剪脱了挡牢仔人行道个枝叶搭仔气根，就势赋形，拿树干做成功了人行道搭仔机动车道之间个护栏。张潮伊天仔路过个辰光，看到横躺个树干浪还长出了几簇油绿个嫩芽。
林莉搭张潮讲自家要辞职，就是勒伊天仔伊拉两个人吃过夜饭之后，到莲花山去散步个路浪向讲个。搿句闲话真个吓了伊一跳。勒勒伊个眼睛里，迭位干瘦文弱个女同事是最勿可能辞职个人。伊勒大厦已经工作了十八年。大厦搿几年一直勒勒改革，计划经济时代残余个编制、职称也勿再搭工资挂钩了，基本浪算是实现了按劳分配伐，待遇勿高但是旱涝保收呀。伊哪能也想勿通伊哪能会得辞职。十八年只做一份工作，对张潮来讲是勿可想象个，伊迄今做过最长个工作只必过持续了一年半。
莲花山路口人行道浪红灯亮了，正好照勒林莉个面孔浪，伊眼角个鱼尾纹看得邪气明显。十八年，对一个女人来讲，意味着啥个呢。一毕业就参加工作，结了婚，离了婚，一个人带小囡过日脚。
大厦里个生活，是温水煮青蛙。我假使现在勿辞职，就再也呒没机会了。林莉看起来已经是深思熟虑，下了决心了。
侬稳定工作也勿要了？辞职之后，侬要到啥地方去呢？
无所谓了，先拨自家放只长假，旅行一抢。我想沿牢仔小说个足迹旅行。第一站就是塞尔维亚，伊面有得写《哈扎尔辞典》搭仔《君士坦丁堡最后之恋》个帕维奇。伊单薄个嘴唇弯起一抹笑，搭伊天夜到个月牙老老像个。莲花山浪向有得月光，洒勒伊有眼眼泛黄个面孔浪向。月亮旁边有一颗明亮个星星，林莉问张潮伊颗星星叫啥个名字，张潮如实回答，自家也勿晓得。
帕维奇老里八早就去世了呀。
无所谓个呀，我就是想去看看伊个地方，去看看伊常庄去个贝尔格兰德大桥，还要去看看伊笔下废弃个教堂，破旧个工厂，生锈个火车头咾啥。我甚至还想住到伊拉屋里，勒勒伊睏过个床浪向睏一歇。林莉讲。
一个疯狂个逃跑计划，我欢喜。我从北方逃到迭个鸟城也有得五年多了，还好搿搭有得月光。张潮讲。
勿久个将来，搿搭也呒没月光了。今朝个天气按照欧美个标准，已经算是轻度污染了。搿搭已经是大陆最最南端了，看侬到辰光还好逃到阿里去。林莉笑勒海讲。
葛末就拿工作辞脱，寻一个山清水秀个小镇去蹲勒海，反正勿会一直蹲勒一个地方个。
葛末侬勿告伊个还勒勒读大学个小女朋友结婚啦？
解决勿了房子问题，告人家爷娘开勿了口呀。
葛末侬就慢慢叫存钞票伐。
我假使存到钞票，肯定勿会得蹲勒搿搭了。
葛末侬要到阿里去呢？
去寻只安静个地方呀。假使讲搿份工作对侬来讲是温水煮青蛙，对我来讲就是开水煮癞蛤巴。
哈哈，搿句闲话是啥个意思啊？
我觉着自家勒大厦里向已经开始腐烂了。用勿了多少辰光，上下班成了习惯，日脚就开始变得毫无意义了。
往期回顾：
图：摄友 / 编辑：渺渺