故里春秋（二十三）
作者：朱海洪
沪语改写：边秦翌
沪语讲述：岑然周
陈医生欢喜讲眼“痛则勿通、勿通则痛”搿种绕来绕去个闲话，反正我是听勿懂，毛估估么，大约摸是讲经脉通了，关节就勿痛；关节痛就是因为经脉勿通。
后首来想想蛮有道理个呀。
人活勒海，勿就是靠气血运转么？气血顺畅，人就健康；气血阻滞，病痛上身。针灸从穴位入手，疏通经脉，使得气血运转勿受阻碍，消除病痛。这搭仔大自然个环境治理、生态保护个道理是一样个，健康个人体勿就是一只绿意盎然个小宇宙啊？
姆妈搭仔陈医生邪气谈得来，勿但聊病痛、聊医理，也讲讲日常生活。有辰光一进门，陈医生就会得笑盈盈个打招呼：“天气蛮好，今朝买了眼啥个小菜啊？”再摸摸我个头：“小朋友读几年级啦？读书成绩好伐？”
宽敞个厅堂里向，阳光特别温暖。
不晓得是针灸个效果还是因为聊得开心，每趟从诊所回来，姆妈总归是开开心心个样子。
但是，风湿性关节炎是慢性病，邪气难根除。过脱一段时间，姆妈个关节痛又会得发作，我又要陪伊去看陈医生，哎呀，看陈医生真个有眼像走亲访友个味道了，必过，走得也忒密切了伐。
姆妈搭陈医生个亲近，对我来讲未必是桩好事体。只要我有眼头痛发热咾啥，陈医生就会得看勒姆妈个面子浪，免费拨我打金针，大多数伊就打勒我个太阳穴浪向。
吓人伐？人身浪有得两只重要个地方，心脏搭仔太阳穴。一想到亮晶晶个金针要从太阳穴搿搭钻进去，我就吓煞唻。但是勿管我怎样抗拒，金针还是毫勿客气个扎进了我个太阳穴。
还好我命大，太阳穴浪好像拨一只小蚊子叮了一记，我浑身一抖，呒没死脱，也呒没昏过去。头痛脑热倒真个慢慢叫好了。
陈医生是个好医生。
唐代“医圣”孙思邈勒勒《备急千金要方》里向有“大医精诚”个讲法，“凡大医治病，必当安神定志，无欲无求，先法大慈恻隐之心，誓愿普救含灵之苦。”
精者，医术高超；诚者，宅心仁厚。“精诚”迭二个字实在是传统中医悬壶济世之精华。勒勒我个心里向，陈医生就配得上“大医精诚”搿四个字。
姆妈搭仔陈医生两个人心灵相通，越来越要好，要好到要一道拍一张照片。有一天，陈医生为姆妈搭脉个辰光，陈医生个阿姐为伊拉两个人拍了一张照片：陈医生穿仔白大褂，伸指搭勒姆妈个手腕浪向，两个人个面孔侪邪气安宁平和，与世无争。
这是我姆妈拍得最好个一张照片。
后首来，搿张照片还派了大用场。姆妈个头像另外裁下来，放大，再镶嵌勒勒伊个墓碑浪。每年清明去扫墓，看到姆妈慈祥个面孔，我总归要心痛，也会得想起陈医生，想起姆妈搭仔陈医生见面聊天，开开心心个样子。
每日天个早浪向，天还蒙蒙亮，沿街个商铺就开始“的粒笃落”卸“排门板”了，整条新昌路也就慢慢叫个醒过来了。
“排门板”是老上海店铺个门面，相当于搿歇商场超市个卷帘门。
老底子，新昌路浪个烟纸店、南货店、酱油店、煤球店、理发店、老虎灶个门面，侪是用一块块长方形个木板拼拢而成个，迭个木板宽一尺半，宁波人叫伊“排门板”，苏州人叫伊“栅板门”。
卸排门板是开门做生意，上排门板就是关门打烊了。
《二十年目睹之怪现状》里向写到：“我店里个排门板，是天亮就开，卸下来就直接隑勒街浪；我又呒没倒了店，阿里会得拿门常庄关勒海。”一般来讲，排门板卸比关好，早卸比晏卸吉利。假使讲排门板卸得晏了，第一笔生意是顾客敲排门板再成交，就有眼触霉头。因为勒勒上海闲话里向“敲排门板”有打上门来个意思。就像还人家铜钿，一定要送上门去；否则债主就会发调头了：“哪能啦？侬勿送过来，还要我去敲侬个排门板啊？”迭个闲话就难听了呀。
卸排门板、上排门板一般侪是“学生意”个生活。学徒一进门，师傅必定会关照：上排门板只许叫“打烊”，勿许叫“关门”。如果徒弟一面上排门板一面讲“阿拉要关门了噢”，拨老板晓得，立马三刻就要叫伊到账房间结账，卷铺盖滚蛋。因为“关门”有生意做勿下去个意思，听上去忒勿吉利。所以要叫“打烊”，意思是生意烊得来一塌糊涂，歇一歇再开张。
往期回顾：
图：网络 / 编辑：渺渺