南昌路“赛因斯”的星光 / 开普饭

沪语朗读：刘时医

朗读者

南昌路“赛因斯”的星光

来源：夜光杯

作者：沈琦华

文字改写：郭莉

诵读：刘时医

推荐：丁迪蒙

坐勒南昌路科学会堂个阳台浪向，吃吃下午茶、读读王尔德，身后是科学会堂独有个、长达一百多米个东西走廊，走廊后头是院士风采墙，上头有上海籍个、或者勒上海工作个两院院士介绍，总共有两百多位，真个是星光灿烂呀。

南昌路47号个科学会堂，是历经了百年个风雨个。现在伊是上海市科协所在地，是上海“科技工作者之家”。科学会堂门口头有一块“优秀历史建筑”铭牌，写得清清爽爽：“科学会堂原为法国学堂、法童学校，万茨·舍伦设计，姚新记营造厂承建，砖混结构，建于1917年，1926年竣工。”

搿只建筑个主体，带有眼法国文艺复兴特征，还结合一眼新艺术运动个装饰，南面有一条通场外走廊，还有阳台。当中呢，是盔式四坡顶，外窗，屋檐侪是明显个西方风格。特别是搿条通场外走廊，有得113米，据说是上海所有单体别墅里向走廊长度顶顶结棍个。

南昌路倒是并勿长，1690米，不过伊横跨黄浦、徐汇两只行政区，东起重庆南路，西到襄阳南路。南昌路以雁荡路为界，东段是1902年开始修建个，老底子叫做“陶而斐司”路。雁荡路以西，是1912年开始建造个，开头叫环龙路。1943年，两条小路合两为一，改名南昌路，一直叫到现在。

科学会堂可以讲是南昌路浪顶顶有名个建筑。1954年，是科学家任鸿隽建议，拿伊改成科学家集中活动个场所。当时个上海市长陈毅还题写了“科学会堂”四个大字。

阿拉要讲一讲任鸿隽先生了。伊是中国科学社个发起人之一。1915年1月，中国科学社办个《科学》杂志，勒上海发刊，呼唤科学精神。同样就是迭个一年，1915年9月，陈独秀勒上海创办了月刊《青年杂志》（后首来改名叫《新青年》），伊拉为中国请来了“德莫克拉西”（民主）搭仔“赛因斯”（科学）两位先生，新文化运动也就由此兴起了。

历史，有辰光可以发生巧妙个剪辑效果，好像伊熟练个运用蒙太奇，拿一眼看上去毫无关联个事件串连到某一个空间，叫人产生无穷遐想。侬看，离开科学会堂搿只地理坐标仅仅过去50米，南昌路100弄2号，一座老式个两层楼石库门建筑，就是当年《新青年》编辑部。

勒勒科学会堂里想走走、看看，发现1957年度个诺贝尔物理学奖获得者杨振宁搭仔李政道，侪曾经拜访过此地。我记得杨振宁有一本《论文选集》，笔调清丽，一眼呒没一般论文个枯涩艰深。作者勒书里向讲，伊自家对物理学个鉴赏品位，是当年勒勒秉持新文化运动传统个西南联大养成个。作者特意勒书个扉页，印上了四个中国字：“献给母亲”。

我突然想起王尔德邪气欢喜引用个一句言话：“我们都处在沟渠中，但是其中一些人在仰望着天空中的星星。”