又见陈皮 / 开普饭

沪语朗读：王敏

朗读者

又见陈皮

作者：林筱瑾

来源：朝花时文

改编：郭莉

朗读：王敏

推薦：丁迪蒙

跟从美国回来个表妹一道去游览珠三角，我一看行程单浪个景点有：广东新会陈皮村，心里蛮欢喜个。我个旅行背包搭仔手拎个袋袋里，是常备“九制陈皮”个，平常拿个三两片摆勒茶杯里，陈皮香气馥郁解油腻。搭话梅、八仙果咾啥相比，伊个价钿永远是蜜饯里向个白菜价，我从小就欢喜伊，也记牢了包装装袋浪向个“潮州庵埠”搿只地理课浪呒没出现过个南国地名……

百度地图显示，潮州庵埠跟江门新会相距有470多公里。两地个陈皮风格是完全勿同，大相径庭个：庵埠九制陈皮甘酸香甜，所谓“九制”就是用柑橘皮原料，经过选料、处理、盐腌、晒胚、糖渍、晒制、拌料、烘干、调香九道工艺精制而成，伊是规模化生产线制作个凉果蜜饯，价廉物美，各地个超市侪是上架热销。

但是新会伊面呢？新会人种柑取皮从宋朝就开始了，新会陈皮用当地个特产芸香科植物“茶枝柑”做原料，沿用古法手工制作，也拨人家称作“广皮”，已经有八百多年个历史，还曾经是清朝皇帝钦定个贡品。

阿拉搿趟就直奔新会五邑侨乡陈皮村，只看见水泥道路边头㫰晒勒黄白正反两面个柑桔皮，赛过北方农村晒珍珠米、红辣椒个腔势，新会陈皮村简直就是用一场视觉惊艳勒欢迎阿拉。

我是第一趟看见茶枝柑，伊表皮紧实油亮，深青颜色带眼眼黄，因为更加值铜钿个是皮，所以呢，饱满个果瓤反倒成了下脚料，没人注意关心了。拿起一块半干个柚子皮，对牢仔阳光细细叫看，皮浪向个一只只圆孔要比常规个柑桔大了交关，迭个物事富含天然挥发性油脂，搭仔黄酮类物质，所以也就成为了药食同源、食养俱佳个中药材。川贝陈皮、蛇胆陈皮、甘草陈皮咾啥，侪是天下华人侪晓得个化痰理气、消滞健脾个上好药品。

走进陈皮村口牌坊大门，金黄季节里家家户户侪晒制陈皮，马路浪向发散出一阵阵药材清香。茶枝柑个果实先要风干两到四天之后，用“二刀丁字法”划成对称个三瓣花朵个样子去果留皮，勒通风个地方摆一夜天，皮就会得自然干缩了，随后，白颜色内皮朝外翻过来㫰晒，勿可以添加任何色香辅料，只保持原味，等到柚皮干了，温度也散脱了，拣优质柚皮到装袋里去保存就可以了。迭个制作工艺，已经拨列入省级非物质文化遗产了。

侬覅小看迭个物事其貌勿扬，倒是广东三宝第一名。伊身家勿凡，越陈越香、年份越高价值越高。“一两陈皮一两金，百年陈皮赛黄金”。勒勒当地个展览馆里，阿拉了解到一款1903年个新会“陈皮之宝”，伊是宋庆龄女士上世纪赠送拨广州陈李济成药厂个镇厂之宝。抗战期间，陈李济员工带勒迭份陈皮去了香港，总算是拿伊保留下来了。后首来又经历了种种波折，乃末再从香港过来物归原主。2011年，新会举办第一届中国陈皮文化节，陈李济药厂为表达对新会个敬意，就拿迭份珍贵个百年礼物回赠拨了新会地方政府。

“千年人参，百年陈皮”。人参可以熬汤滋补，陈皮除脱做药，也好摆勒菜里向个，既增鲜又调味。广东民间有“秋收谷金黄，柑皮煨咸汤”个讲法，现在新会人研究出来个陈皮宴中式料理更是享誉南国。到了餐厅，侬光看菜单就目不暇接：“陈皮煲水鸭”“陈皮羊肚菌煲猪骨”“陈皮丝牛肉丸”“陈皮丝焗鸡”“陈皮丝南乳骨”“陈皮丝焗鱼头”，反正是煲汤炖粥、煎炒煠炸，简直是无“陈皮”勿成席，让外地人到了此地“味蕾一新”。当陈皮水饺、陈皮西米粽最后上桌个辰光，南北吃客侪开心得抢来品尝。

陈皮经销商阿全告诉我，当地经营陈皮个企业有百来家，伊拉对陈皮个研究是从药文化到饮食文化、旅游文化，还延伸到生物科技健康经济产业链。趁港珠澳大桥通车带来个商机，当地企业搭澳门联合开发新经济合作项目，新会陈皮就是“粤港澳手信”个大文章。我勒新会个街市浪向随便荡荡，廿八年个陈皮今年要2500块一两，四十年收藏级个陈皮，一斤价格已经超过5万块，去年新会陈皮创造个市场份额已经超过了60亿。　

哦哟！我原来搿种白菜价钿个陈皮观念，实在应该推陈出新了！再看展览馆玻璃密封瓶里向一朵朵花开勿败个“陈皮皇”藏品，先让我定定神，再压一压惊伐！