有这么一个女人 / 开普饭

沪语朗读：何秀萍

有这么一个女人

作者：江上

沪语改写、朗读：何秀萍

文字修正：丁迪蒙

春英回来了！

春英是回来造房子个，伊个户口勒村里向，现在算是无房户，要申请造房子么是天经地义个，村里个人勿好讲啥闲话。

但是，侬看伊挑个地方！春英要拿房子造勒村根个房子搭仔建民拉个房子个当中！伊面也确实有块空地个，但，但是……

但是，春英是村根个女人！——是前头个女人；村根是春英个男人！——是前头个男人。虽然讲，勒现在迭个时代，离婚勒农村已经是司空见惯，勿算啥事体了，但是人家村根已经有了新个女人，有了新个屋里，侬春英迭能做法，勿是明摆勒要寻事体，明摆勒要去让村根殟塞，拨村根好看嘛？！——对个，我就是要寻事体，就是要拿侬殟塞，就是要拨侬好看，就是勿拨侬过好日脚！侬想哪能？——春英拿心里个闲话侪摆勒面孔浪。

春英造个是三间七路头个平房，估计经济是比较困难个，造勿起楼房，搿个平房扎勒村根搭仔建民个两幢楼房之间，有眼突出，勿大谐调。从打地基开始到房子造好，春英每日天侪搬仔条长凳坐勒场门前，朝牢东面村根个房子，直愣愣、直勾勾个盯勒海，伊咬牙切齿、面目狰狞，尤其是勒看到村根夫妻两家头亲亲热热、说说笑笑个上班、下班个辰光，假使春英个眼神可以杀脱人，葛末村根伊拉勿晓得要死脱几趟了。最最气人个，是两夫妻自始至终看也勿看春英一眼，自管自个开开心心，卿卿我我，根本勿拨春英眼神杀伤个机会。村里向个人侪看得出来，伊拉是故意演拨春英看个——之前伊拉勒人前一向是平平淡淡，相敬如宾，邪气低调个。

曾经，春英搭村根也过过幸福日脚个。

春英应该算是个有福气个女人。伊有几分姿色，鸭蛋型个面孔，剪短头发，水灵灵个眼睛，活泛个眼神，皮肤蛮好，身材也勿错，凹凸有致。村根呢，是村里向出名个好男人，长得蛮帅个，做事体勤勤恳恳，做人也老老实实，关键是手还邪气巧，啥个电工、木工、泥水工生活，伊侪拿得起、放得下，村里人有啥事体侪要寻伊，伊是每叫必到，还从来勿收人家人工费，因此，人缘特别个好。唯一缺点，就是闲话少，勿大讲闲话。村根对春英，葛是真个好呀，言听计从，基本浪勿让春英做啥生活，里里外外、上上下下一手包办。春英只负责打扮自家，享享清福。

春英倒也勿闲，伊负责勒村里向串门，东家长、西家短。跟村根形成鲜明对比个是，春英个嘴巴邪气会讲，“呱啦呱啦”一直勿停，不过，仔细听听东一榔头西一棒眼也没啥个逻辑。男人一直拨春英挂勒嘴边个，不过呒啥好闲话，从来呒没称赞过伊半句。人家侪讲伊嫁了个好男人，福气好，整天价山青水绿享清福。春英却讲：好啥啦，像根木头人，闲话勿讲几句，只会得低头做生活，搭人家做生活好勿收钞票就勿收，憨大一只呀……开始辰光，讲搿眼闲话是带笑讲个，大家侪可以听得出伊个得意，明里骂暗地里称赞。但是，辰光长了，大家发现春英讲闲话个辰光，面孔浪已经呒没笑容了。

村根弟兄有三个，老爷老娘侪蛮健，村根是三兄弟里向最孝顺个，爷娘伊面伊去得最勤，做个生活，送得去个物事也最多。村里人侪是有目共睹个。春英心里邪气勿平衡，就寻机会寻借口数落村根，村根只是戆笑，最多讲一句：自家爷娘嘛，应该个。辰光长了，春英心里越来越勿平衡，就搭村根吵起相骂来了，小吵天天有，大吵三六九。春英吵起相骂来邪气夸张，叫天叫地个，常怕人家勿晓得——伊要吵得人人侪听见，特别是村根个两个哥嫂。其实，搿也勿算真正个吵相骂，因为，每趟侪是春英个表演秀：春英拔出喉咙拖腔拖调，天一句地一句。内容就是骂男人窝囊、没用，自家跟牢仔受气、老天爷勿公平咾啥。再后来，就发展成寻死觅活了。春英拔出仔喉咙哭咾喊：搿种日脚哪能过啊，我呒没办法活了，我勿想活了，我要死了呀——伊一边唱山歌，一边往前头个河浜走。引来交关看个人。大家侪看闹猛——死勿脱个——寻死哪能有得呼天抢地、广而告之个——再讲，门前头个河浜小、水也浅，河浜当中也只到人个腰，淹勿煞个。当然，闹猛看得差勿多了，总归有人帮忙让春英寻只台阶下，去劝村根，快点拿媳妇救起来啊！还木头木脑做啥啦！

旁边人侪是看闹猛。村根个阿哥阿嫂却是像坐勒针毡浪，像拨人家踏着了尾巴。两个阿哥还好，还可以努力做到一只耳朵进，一只耳朵出。两个阿嫂就火煞了，伊拉接春英个话头开始对骂了。于是，勒小河浜个伊座水泥桥浪，经常会得上演精彩个一幕：两个女人一对一或是三个女人展开了世纪骂。不过，蛮有趣个是，伊拉身体从来勿接触，隔了两步个距离，相互指牢仔鼻头臭骂，跳双脚，拍大腿，拍屁股个骂，邪气闹猛。看个人一多，伊拉就骂得更加起劲。

搿一幕，成为了村里个常态，是保留节目。勿吵勿闹猛。辰光长了，大家也就习以为常了。

眼睛一眨，村根搭春英个囡儿也十几岁了，小姑娘集中了爷娘个优点，长得邪气漂亮。但是小姑娘闲话也少，搿点像伊个爷。小姑娘搭春英一眼也勿亲，平常也呒没啥闲话讲。

村里向个人打破头也想勿到个是：春英竟然勒外头勾搭上了一个外地人！要死要活个吵，要搭村根离婚！村根个心邪气痛，求春英看勒囡儿个面子浪搭外地人了断，勿要离婚，伊可以既往勿咎。囡儿呢，板仔一张面孔警告春英：假使侬再搭外地人搞勿清爽，就搭侬一刀两断，覅想听到我再叫侬姆妈！但是，葛春英就像中了邪一样，吃了秤砣铁了心，是鬼迷了心窍，十头牛也拉勿回来了。

有一日，伊就跟勒外地人跑脱了，就此再也没音讯，勿晓得到啥地方去了。村根也心碎了，发了疯一样要去寻，却拨伊拉囡儿拼命拉牢，还以死相逼：侬假使寻伊回来，我就走，我去死。

后首来，春英回来过一趟，来办离婚，搿个辰光个村根已经心如死灰，心肠也硬了，呒没一眼眼个留恋。

光阴似箭，日月如梭。村根后来寻到了新个女人，新个女人村根个囡儿也相处得邪气好。刚刚结婚，囡儿就邪气甜个叫伊“姆妈！”现在，村根个囡儿也已经嫁人了。

介许多年数来，啥人也搞勿清爽春英勒外头过个是啥个日脚，但是。从伊面孔浪个皱纹、已经松弛个皮肤、还有头浪近三分之一个白头发，勿难想象伊日脚过得蛮艰辛个。

“活该！”村里交关多人勒背地里心里向侪搿能讲。看到春英一日到夜搬仔条长凳坐勒门前头，眼睛盯牢村根个房子，大家侪勒想：搿个女人，还会得搞点啥个名堂？还可以弄出啥个动静来呢？