装满故事的樟木箱
沪语朗读：史素瑛
朗读者
装满故事的樟木箱
来源：看懂上海 2019.5.16
上海話改寫：郭莉
朗讀：史素瑛
推荐：丁迪蒙
提起樟木箱，老辈里個人侪勿陌生。樟木箱曾经是小姑娘出嫁辰光必备個嫁妆。小姑娘到了一定個年齡，爷娘板要请木匠师傅做两只樟木箱，先勿上油漆，等到寻好对象，定好婚期，再拿白坯個木箱子打磨上漆，乃末看上去煞煞新、锃锃亮，正好作为陪嫁。
老底子大户人家喜添千金，就要种一棵樟树，到囡儿成年出嫁個辰光，迭棵树也正好成材了，齐巧可以做箱子。周庄沈万山个沈厅外头，就有迭能一棵百年树龄个香樟。
樟木箱最适合放贵重個物事。羊毛、羊绒、丝绸、羽绒咾啥高档料作放到樟木箱裡保存，就勿会得有虫蛀；收藏个邮票、字画、书籍咾啥也好放进去，一眼需要小心保存个地契、银票，当然也侪是要放进去个。
樟木箱勿一定就是老上海生活个代表，但是讲到上个世纪老上海、讲到石库门房子、讲到弄堂，迭眼闹闹猛猛、烟火市井个生活场景里，还是勿好呒没一只装勒一个家庭、甚至一个家族几十年里向起起伏伏故事个樟木箱。
樟木箱勒勒上海人家生活背景里，勿声勿响，但是一定勿好呒没伊个。
当年，上海知青个行李里向，也有樟木箱个。对迭个上海知青来讲，箱子勿仅是用来装物事个，还有家人個陪伴、家庭個气息勒里向，每个人侪有自家个一段“樟木箱故事”。
有一个知青搿能讲：1968年底，因为马上要离开上海去插队落户了。姆妈搭伊准备行李個辰光，拿出了八十块洋钿，伊晓得屋里向困难，只要了四十元。姆妈拿一只雕花樟木箱腾出来，拨伊带出去。伊开始辰光勿肯要，姆妈讲：“侬要跑到边疆介远个地方，总归要有样像样点个物事跟勒自家身边，就当是只念想也好個呀。再讲侬一去千里万里，也勿晓得还能勿能回轉来，要是叫侬拿只旧箱子出去，姆妈是讲勿过去个。”
出发搿日天，明明晓得姆妈勒勒后头落眼泪，伊勿敢回头看，只轻轻叫讲了一句：“姆妈，侬放心好了。”啥人晓得，姆妈听仔搿句言话，索介放声大哭起来。
勒勒插队落户漫长個日脚里，有趟，伊生毛病了，写信搭屋里向诉苦，姆妈马上就寄了白糖，还回信讲：“勒樟木箱個底部，有只白布头做个小袋袋，是用橡皮膏搭牢个，里向有四十块洋钿，拨侬应急个。侬生毛病就拿出来用，身体要紧，迭个辰光勿要省钞票！”伊打开樟木箱，看到勒箱子個底部，真个贴了一只袋袋，里向是姆妈为伊准备个，四张赤括辣新个十块头票子，眼泪实在是止勿牢了呀！
当伊退休以后回到上海個辰光，历经“磨难”个樟木箱，撥烟熏过，撥水泡过，黑黜黜個，完全呒没当年个光彩了，所有个金属配件也侪生锈发黑了。是個呀，樟木箱跟牢仔伊，历经了四十年，转了十二个省市，行程有得两万多里。可惜回来個辰光，姆妈已经走了，老太太最终呒没亲眼看见千里万里帶回來個搿只赛过“陪嫁”能介个樟木箱。
蒋阿姨個屋里，有只用了八十年个樟木箱，迭个是蒋阿姨屋里两代人用过个结婚嫁妆。当年是外婆留拨蒋阿姨姆妈个陪嫁，后首来，蒋阿姨出嫁個辰光，姆妈又留拨了伊。现在，迭只樟木箱旧了，配件坏得差勿多了，但是蒋阿姨舍勿得厾脱，想寻人修一修，因为“箱子里装个侪是回忆搭仔感情”。但是，寻了交关厂家店家，侪拨回头了。认为勿好修：一是修了以后还是会得落漆个，两是箱子配件根本是配勿到了。最后，有一家勒青浦个家具厂，老板看了箱子，又听了蒋阿姨屋里向个故事，总算接下了迭只生活。
三日天过去，樟木箱修好了，恢复了原来个样子，配件也侪换了新个，可以正常使用了。家具厂工人介绍了修复個过程：“铰链、铜件儕换脱，油漆也补过了，但是呒没焕然一新，而是修旧如旧。希望蒋阿姨一家门对迭只箱子满意，再拿迭個里向八十年个情感延续下去。”
推上海言话叙身边事体
究吴侬细语吟诗词歌赋
往期回顾：
图片来自网络