评弹票友写个淮海路（下）
沪语朗读：肖德生
评弹票友写个淮海路（下）
来源：网 络
改编：丁迪蒙
朗读：肖德生
老底子勒淮海路，可以吃得到香喷喷甜蜜蜜个水果羹。伊是拿水果烂个搭仔碰坏脱个地方挖脱，切成块烧甜羹，再摆眼一粒粒像鱼眼睛一样、吃勒嘴巴里邪气有咬头个大西米。我在长春食品店吃过好几次。水果羹对于小囡来讲有个额外个收入，可以一边吃一边认得水果；搿能介和直观教学比看图识字更加有效果。
水果羹做起来勿难。既然是羹，葛就要勒水里向加点起稠个物事；上海人称之为“着腻”，正宗个讲法是“勾芡”。比较多个是摆藕粉，也有摆百合粉、地梨粉，或者用烧菜个淀粉、菱粉。用温开水调开，再慢慢叫倒进去，一边倒一边慢慢叫搅拌。
做水果羹属于勤俭节约，也可以做升级版个。取材当令个水果，增加花色品种；还可以勒羹里向摆酒酿摆实心圆子。假使再加眼上海人叫做“白木耳”个银耳，葛绝对是上档子个了。
我觉着，水果羹展现了上海人“螺蛳壳里做道场”个精神，拿资源利用到了极致。而且是勿怨天勿怨地，积极开动脑筋，与时俱进；用自家个两只手，拿生活变得美好起来。文学大师萧伯纳讲得好：“经济是充分利用人生个艺术。”上海人对搿门人生艺术，有蛮充分个利用搭仔漂亮个发挥。
同样邪气出彩个还有什锦果。伊个辰光，食品店一只只大个铁皮箱里装勒海各种饼干，卖到最后总归有得剩余。伊眼饼干或者是勿足顾客所需要个斤两，或者是破损、破相了；聪明个上海人就拿各种个剩余饼干倒勒一起，变成一只新品种——什锦果。
我最欢喜吃其中个油枣搭仔猫耳朵，搿眼单买是蛮贵个。譬如，油枣就要七角两分一斤，一般个饼干只有伊一半个价钿。我勿欢喜个是方糕，干乎乎，勿好吃。
搭水果羹、什锦果一道消失个，还有淮海路浪向一早一夜个热面包。1965年，从我住个茂名南路往西走，哈尔滨食品厂，伊拉每日天老清早5点钟开始卖热面包。往东走，前身为俄罗斯个普尔契克良个海燕食品厂，每日天夜到8点钟热面包上市。
现在看电影，吃零食是学美国人，捧牢仔炒米花。老底子，淮海路浪向个电影院，隔壁头有食品店，卖个零食勿仅花式多，味道也勿晓得好比炒米花好多少倍！
国泰电影院隔壁头个上海食品商店，走上台阶买鸭肫肝。一包包小个纸头袋袋，切成一片片个鸭肫装勒里向。经过腌渍、风干、蒸烧、周边个颜色黯而里圈暗红个，咬一小口勒嘴巴里，味道邪气鲜，稍微带点咸。再买豆腐干搭仔素火腿。从营养角度来排队，搿两位勒零食里向是名列前茅个，属于零食向个战斗机。豆腐干有一本白一酱色两样，白咸酱甜。
本白个豆腐干方方正正，约三四公分长短。味道鲜美，讲是有虾米加勒里向个。伊个包装也是朴素个。白颜色个袋口开勒海，像呒没封口个信壳。整整齐齐、一排挨牢一排睏勒大个蓝边长方形个白搪瓷盆里。伊是龙华生产个，龙华个素斋是有名气个。而酱色个卤汁豆腐干，块头要比白豆腐干小交关，一公分个正方形。伊是甜咪咪个，一咬一口汁水，咬上去比白豆腐干更加糯、更加软。置身勒四分之一A4纸大小个盒头里，还配好仔牙签。
相比豆腐干，素火腿个价钿要稍微贵一点个。伊是素个，但是傍了大款；属于素斋里个仿肉类食品，葛就勿是吃素个。原料是素个，却要吃出荤菜个味道。素火腿个模仿对象是火腿，勿晓得是否搭金华个雪舫蒋腿看齐。伊皮皱、形状像是袖珍火腿，大小就像把调羹。黄灿灿、油滋滋，连搭装伊个袋袋也是油滋滋个。透明个包装袋袋个正中，有一个椭圆形个红颜色衬底，上头有三个黑颜色个隶书：素火腿。
素火腿是由豆腐衣层层叠叠做出来个。看伊伊副样子，我总归认为勒油里向氽过。但是行家讲NO，是豆腐衣勒加料加调味个汤里向浸好以后，再蒸出来个。搭白豆腐干一样，伊也是龙华生产个。做素斋个厂也勒龙华古寺里向，龙华寺院个素斋，已经做了1700多年了。
勒淮海电影院个隔壁，也有家食品商店，叫野荸荠。到伊面去看电影，会得到店里向买伊个苏式糖果当中最出名个松子粽子糖或者薄荷粽子糖。
粽子糖是因糖个形体而得名个，像只赤膊个袖珍三角粽。据说原创出自明末苏州一个叫谢云山个人，因次也叫过“谢家糖”。一粒粒粽子糖是用剪刀剪出来个。乘条糖还软、没硬个辰光，举起剪刀“喀嚓”“喀嚓”，一边剪一边转，让剪出来个糖呈现出三角形来，好比是切菜个滚刀块切法。据说，熟练个技师一日天要剪两万粒粽子糖，而且颗颗勿走样。
有人讲伊是世界浪最美丽个糖。颜色棕黄，晶莹剔透，邪气光亮，搭琥珀一样；包裹勒看得到个惊喜，一粒粒小巧个松子。咬上去硬脆、一口清香。
除脱仔松子粽子糖，薄荷粽子糖我也欢喜个。伊是乳白色个，勿透明，外头包一层薄荷味个糖粉。牙齿一咬，糖粉就像墙粉伊能介剥落到嘴巴里去了。
点以下文字即有精彩回放：
评弹票友写个淮海路（中）
评弹票友写个淮海路（上）
我听“无线电”
我是海洋
微信群和咖啡馆
我是土地
我是花
我是水
潘家姆妈
图片来自网络