白相了一趟直播 / 开普饭

沪语朗读：俞颖

白相了一趟直播

来源：新民晚报

作者：金洪远

沪语改写、朗读：俞颖

指导、推荐：丁迪蒙

英语班几个同学搭我发微信：“金班长，虹口公园今朝开门了，侬阿好辛苦一趟，到里向去来个现场直播，让阿拉饱饱眼福，过过春光漫游个念头。”

搿个主意是勿错，但对我从来呒没尝试过当今流行个“直播”个菜鸟来讲，来三伐？

伊拉像煞晓得我七上八落个心情，安慰我讲：“侬可以试试呀。”更何况伊拉勒微信里还一直表扬我是个热心人哩。恭敬不如从命，当即回应：let me try。

春光里个公园邪气漂亮！迎面假山下头五颜六色个花真是夺人眼球，一片片黄澄澄个迎春花，一蓬蓬血血红个杜鹃花，还有像六月雪一样个盆栽，争奇斗艳，馨香缭绕，让人屏勿牢停下脚步观赏。直播需要“出声”，假使像老底子个哑子电影一样，搿就要打脱交关折扣了，所以我现场发声：公园春光无限美，姹紫嫣红扑面来。

勒我个感觉里，春天个河浜旁边一棵棵随风起舞个柳树是最漂亮最有味道个，毫无疑问伊是公园个主角。虽然还呒没长出轻盈个柳叶，娇嫩个翠绿，但身姿轻盈，千娇百媚，身影倒映勒勒清澈个河浜里，让我勿由自主个吟唱唐朝诗人贺知章个咏柳诗：“碧玉妆成一树高，万条垂下绿丝绦。不知细叶谁裁出，二月春风似剪刀。”

公园里交关游客侪勒拍照留念。勒小石桥浪，有个女游客勒石头台阶浪踮起脚尖对牢粉红颜色个春梅聚精会神个聚焦，老长辰光也不看到伊揿快门。从伊个相机搭手端相机拗出个造型来看，一定是个专业摄影师。啥地方像我，随便看到啥侪“咔嚓咔嚓”，一看就是个摄影菜鸟。我屏勿牢赞叹了一声，托牢伊腰个先生老骄傲个回头一笑讲：阿拉老婆是吃“这口饭”个。吃“这口饭”个就是不一样，女士走下石头台阶拨我看伊拍个春梅照片，别出心裁个构图，最吸引人眼球个是，春梅个花瓣浪正停勒两只小蜜蜂勒海扇动翅膀，搿一动一静确实拨人美感。想起刚刚伊端起相机专心致志个忘我状态，勿得勿佩服，原来专业是搿能锻炼出来个！

最有意思个是勒公园个大草坪浪。绿莹莹个草坪里开勒一蓬蓬粉红个、金黄个、大红个、银白个撘仔紫颜色个郁金香，各显风骚，尽秀娇容。搿亭亭玉立个身姿，精气神十足，勒春风里轻轻地摇摆，远远叫望过去，像多彩个织锦段铺勒绿绒地毯浪，我个心情哪能会勿像五彩个花儿一样开放呢。赞个！假使勒搿春色逼人个地方直播，不讲几句英格里希，伊眼铆牢我个学姐学弟是勿会放过我个？葛末，张口第一句就是：0h，it is a sight. Flowers are in bloom.（多好的景色啊！鲜花盛开啦！）

我呒没想到，两位齐巧经过个外国女士会停下脚步，一位笑眯眯个跷起大拇指叽里咕噜讲了一通，语速邪气快，从伊拉略有惊喜个表情我猜大概是勒表扬我，可能伊拉呒没想到，眼门前搿个一面孔沧桑个老先生会有搿一手！我更呒没料到，伊拉竟然会做出“胜利”的手势，异口同声个讲：“武汉加油！中国加油！”旁边个游客侪笑了，连声“加油”！伊拉生硬个中国闲话搭我个洋泾浜英文有得一拼，属于数学里向个合并同类项。我马上也表扬了伊拉一句：Your Chinese is good！伊拉笑嘻嘻个回应我：Sir，your English is very good！搿句英文我是听得清清爽爽，假使我有勇气勒大庭广众之下高歌一曲，一定是：Thank you，You Raise Me Up！（谢谢，你们鼓舞了我！）

夜里，我拿勒公园里个 “直播”视频发到“我个英语我个班”个微信群，学姐学弟一片赞扬声，连得教阿拉英文个乐老师也表扬鼓励我，实际浪我是大姑娘上轿头一趟，谢谢大家，是㑚拨了我信心！