藤高椅浪个水渍
藤高椅浪个水渍
作者：吴翼民
修改诵读：高仁
审核推荐：丁迪蒙
像勒勒看温度表一样，人活到了老年阶段好比气温下降到摄氏零度，接下去就出现负值，即使自来水也要结冰了。有人形象化个讲，人越活得寿命长，会得越像幼年辰光个状态，就以智商打比方，八十几岁老人个智商搭十几岁小囡个智商相仿，其他饮食起居各方面也老像个，人越老，越像小囡腔调。无锡方言拿小囡称之为“老小”，也是一样的道理，小个像老个，老了就小了。基于搿能加个道理，阿拉对待老人就应该像对待小囡一样爱护，有常时相比小囡，老人理应得到更加多个关心。小囡勒勒成长，充满着希望；老人勒衰老，“无可奈何花落去”，何等凄凉啊！我伲做小辈个除脱物质浪个赡养，更加需要精神浪个赡养。
当今时代，物质赡养勒城市里大致浪已勿成问题，多数老人侪有得养老金个，“蜻蜓吃尾巴——自吃自”绰绰有余了。而我个长辈却有例外个情况，比方我个母亲搭之伯母，侪呒没社会工作岗位个履历，所以也呒没退休金个，后来又侪年迈孀居，统统靠小辈来赡养。我母亲多子女，日脚还好过点，伯母却是孤身一人，尽管伯父去世之前变卖了红木家生、首饰咾啥，为遗孀留下一笔遗产，但是能够应付得了多少日脚？所以伯母个余生由母亲搭阿拉兄弟姐妹统统包揽了，除脱一道过日脚，阿拉还贴补眼零用铜钿拨伊老人家用。老妯娌搭小辈之间其乐融融。
然而，即便是搿能，伯母个孤独感还是常桩会得产生，经常一家头关勒楼浪房间里“竹园乘凉”——靠一副宣和牌“打打五关”、“拆拆乌龟”打发辰光，要么就盯牢之伯父个遗像搭伊拉年轻辰光个靓丽照片发呆。母亲就经常让伊下楼来坐坐，勒客堂里搭左邻右舍一道讲讲闲话。伯母勒中年辰光，曾经当过居民小组长，搭里弄里个张师母李师母咾啥侪蛮熟悉，大家一道讲讲从前个经历就有了共同语言，偶尔讲到了邻居当中曾经发生过个事体，伯母搭母亲会一道欢畅个笑，邻居拉也跟牢之笑声勿停，迭个辰光我发现年迈个伯母起码年轻了十岁唻！
后来，伯母越来越老了，生活起居侪离不开人家服侍了，就经常会出现大小便失禁个情况。迭格是最让伊勿适意个了，伯母老人家出身勒大人家屋里，人又长得端庄清爽，一辈子呒没受过大个波折搭难过，哪能容忍得了勿可抗拒个衰老搭仔邋遢呢？伊经常会自怨自责，遮遮囥囥，拿大小便弄龌龊个裤子搭床单东塞西塞。我母亲比伯母小十岁，手脚还蛮麻利，看勒眼里，记勒心里，就勿动声色个拿伯母囥起来个龌龊裤子搭床单咾啥偷偷叫拿出来汏脱了，或者让我阿妹一道收作清爽了。迭个辰光我阿妹还有眼埋怨，母亲就让伊勿要响，千万勿要伤害了伯母个自尊。
伯母经常坐勒一只藤高椅浪消磨辰光，冷天介勒勒藤高椅浪垫一只棉垫子，热天勒勒藤高椅浪铺一张竹席，即便如此，藤高椅仍旧会得常庄拨伊撒湿脱。阿妹看到了会得哇啦哇啦叫：“哎呀呀，姆妹（苏州话对伯母的称谓）呀，倷……倷呐哼”……闲话还呒没讲光，母亲马上打断阿妹个闲话，讲：“啥个闲话，该个是姆妹勿当心泼翻脱个茶水呀。” 阿妹马上心领神会，接牢之母亲个话头叽叽咕咕个讲：“哎呀，姆妹哪哼会勿当心打翻了茶水呢？弄得藤高椅侪是水渍。”伯母也自己勒勒叽咕一番：“真是个，年纪一大就……就勿灵光哉，茶杯也……也拿勿稳哉。”
乃么，阿妹就服侍伯母拿撒湿脱个裤子换好，服持伊睏中覚去了，接下去，就拿伊个藤高椅搭坐垫冲刷晾晒干净。好之一段日脚以后，伯母仍旧会得经常发生“茶水打翻勒勒藤高椅浪”个事体个。阿拉兄弟姐妹也已经习以为常了。
伯母寿终正寝了，若干年以后，我个母亲也碰到了像伯母一样个情况，小辈们又重新拾起了“茶水打翻勒勒藤高椅浪”个讲法，母亲心里当然也是邪气清爽个，也受用了她传授拨阿拉儿女们个一片善意。
作者
往期回顾：
图：网络 / 编辑：渺渺如胭