女人与花朵
沪语朗读：周恋云
作者：楚秀月
沪语改写，诵读：周恋云
欢喜花草，像煞是女人个天性。我，也勿例外。
第一趟养花，是我十二岁个辰光。养个是一盆仙人掌，种勒屋里个一只破陶罐里。到今朝，我仍旧记得陶罐个样子，却已经记勿起当时为啥要养伊，又是啥地方来个花苗。
埃只种了仙人掌个破陶罐，拨摆勒天井里向，就摆勒房门边头，每日天读书放学回来，进出我侪看得见个。
仙人掌蛮好养个，除脱礼拜天老清早我记勒海到水缸里舀一大勺子水去浇浇伊之外，再也呒没其它个特殊养护，伊却是枝枝丫丫个发了交关，每一枝侪是一片一片个长上去，两三年里向，竟然像小树一样个高大、繁密，却是总归勿看见伊开花，我勿懂问题到底出勒阿里。最终呢，伊却是因为根部无法承受自重，勒某个大热天个下半天，勒太阳个暴晒当中倒下去了。我，倒也呒没特别个伤心，毕竟是勿曾看见过伊个花朵。
到了我读高中个辰光，调了一位班主任，30岁左右，刚生好小囡，皮肤勿算老白，却邪气光亮，两只眼睛乌黑个，邪气明亮，留勒大波浪个长发，披勒肩胛浪，又披到腰际；性格温和，女生男生侪老欢喜伊个。伊邀请阿拉去伊屋里去白相，院子勿大，靠墙种了一小片桑花，刚好开勒海，细细嫩嫩个花杆浪，五颜六色个花朵勒风当中轻轻叫个摇。伊搭阿拉泡茶，出去倒水，勿经意之间碰到了伸出来想摸摸伊发梢个花朵。伊个先生也勒屋里，一个长长大大个男人，立勒台阶浪，明亮个眼神追牢仔伊个背影走。有搿能一刻，我觉着阿拉个班主任搭搿些花有得相似之处，邪气美，蛮有北周诗人庾信个《春赋》当中“眉将柳而争绿，面共桃而竞红”个风范，让我勒目之不及之时，心里还止勿牢个牵记伊。我勿晓得是欢喜花多一点，还是欢喜花个主人更加多一眼。
忍勿牢问伊要了花种，来年个春天撒勒自家个后院，每日天放学勿回房间，先去看花是否有得出苗。搿个桑花开起来邪气漂亮，性情却是勿娇气个，一场雨之后，密密麻麻长出来一大片，慢慢叫个郁郁葱葱，到仔夏天，繁密个花开满了整个后院。长长个暑假，我学习个场所，因为迭些花个存在而移到了后院。坐勒花丛旁边，守牢姹紫嫣红，闻闻花香，交关辰光，花勒勒风中轻轻叫个抚摸我年轻而饱满个身体，埃种痒痒个感觉，像煞勒梦里向，像煞自家也变成了伊拉其中个一朵。
工作之后，到朋友屋里白相，朋友养个花有得十几盆，叠勒勒阳台浪，有一盆，让我一看到就邪气欢喜，肥厚个叶片浪纹路清晰，阳光下头显得油亮发光，忍勿牢想用手去摸，像啥迭能个叶片会拨自家带来温暖。最终，却呒没伸出手去，是对迭盆花心存敬畏，还是自尊心勒作怪，像啥侪有一些原因。立勒阳台浪向，我对牢埃些发亮个叶片看了老老长辰光，心里向暗暗叫下决心，以后自家也一定要养一盆迭能介个花。
结婚了，搭婆阿妈佮住勒二楼，后头就是厂里向个花圃。交关日脚个夜快头，我侪喜欢立勒阳台浪朝下头望。花圃里向呒没啥名贵个花，品种也邪气单一，但是我仍旧欢喜，只要看见埃些姹紫嫣红个颜色，我内心个愉悦就随牢沉沉个夜色弥漫开来。
花圃里也有得橡皮树个，也是养勒花盆里个，看到伊浓密而健康个样子，我一记头又想起了少女辰光自家曾经许过个愿，但是，回转身来，朝自家居住个狭小房间四面看看，只好轻轻叫个叹口气。真个是没办法再摆一盆又高又大个橡皮树了。
有自家个房子了，还没装修好，某一天，勒自由市场看见了卖花个，里向有橡皮树，立勒伊面想了交关辰光，最终呒没熬牢，十元洋佃买了一盆回来，一盆有得四棵，侪是邪气小个两三片叶子，用原装个塑料盆摆勒婆阿妈个阳台浪，搭伊眼旧个纸板箱、空瓶子咾啥扎勒一道，一个号头之后，再拿伊移勒新买个陶瓷花盆里，搬到了自家个新房间里。
为了迭盆花可以来到自家个身边，我经历了12年个时光，12年里向，我一直呒没忘记脱伊个存在，直到真正个拥有伊。
房子大了，养花个心就更加强烈了，常庄到花市里去兜兜，每趟侪会买眼花回转来，必过，勒花圃里开得邪气旺个花，一样个烂泥，一样个花盆，也按照养花人个关照浇水、施肥个，摆勒屋里却最多半个号头就败脱了，从此，只剩下来绿颜色个叶子，也再勿看见开花个动静。心里总归有眼难过个，也想了勿少办法，却并呒没起色。过勿了多少辰光，仍旧再到花圃里去买花。开几天九算几天伐，搿几天总归是养眼个，是开心个。
作为工薪阶层，化几十块洋佃买眼鲜花回转来，只开几日天就枯脱，还是有点肉痛个，但是，过节个辰光，总归是要买一束回来。玫瑰，月季，百合，阿里一种侪好，插勒玻璃个花瓶里，摆勒台子浪，立时三刻让屋里弹眼落睛了交关，也增添了过节个仪式感。所以，我每年要过个节日，也就比别人家多出来几天，只为心里安慰自家，是节日，就可以买花回来。
为了保持花色个鲜艳搭长久，会勒插花个水里向摆一点点盐，迭个方法我曾经勒网浪向查过，应该是有效果个。还摆过洋钉，搿勿晓得是啥人告诉我个，也勿晓是勿是有用，总归我是试过个。
蛮多辰光，花已经枯萎了，还舍勿得厾脱，拿伊当做干花来养，也为自家增添了勿少好心情。直到花枝根部腐烂，再心徐甘情勿愿个掼到垃圾桶里去。
因为爱花，肉痛花，我还拾过花。某个春天日脚个夜快头个，勒下班个路浪向，看见工人正好勒海更换道路两边个雏菊，换下来个花有交关还来勒好好个，就拨
乱七八糟个掼勒一边，心里勿免搭花惋惜起来了。花是有生命个，假使是人个闲话，心里向也会得有拨抛弃个痛伐！忍勿牢蹲下是去，一枝一枝个拾起来，一直拾到自家抱徐牢为止。到了楼下头，老里八早已经呒没力气上楼了，就仰岳起头来喊先生下来接我。伊看我迭能就笑了，打朋讲：我当是花仙子降临到阿拉屋里来了呢。回到屋里向，顾勿上吃饭，先拿所有好用个瓶子侪寻出来，安顿好了搿眼雏菊，再安心。
埃个几日天，下班转来，推门进房，房间里一片金黄色，到夜里向，灯灭脱之后，勒墨黜乌黑个房间里，我仍旧觉得着有得暖暖个光照勒自家。
收到过最大个一束花，是36岁生日个埃天。十几年过去了，我仍旧记得清清爽爽，中浪向11点多，快下班个辰光，接到电话，讲是花店个，有人订花拨我，让我到厂门口去拿。一路小跑奔过去，心里向一直勒猜想，啥人会得送花拨我呢？却是哪能也猜勿到。
当我看到36朵红到耀眼个玫瑰紧紧个围牢一枝粉白色个百合个花束个辰光，我个目光拨彻底吸引了，心勒伊个一刻也绽放开来。啥人送个花呢？我抑制牢喜悦个心情打电话问先生，伊否认，之后又来惹我，老实交待，花是啥人送侬个？我要晓得，还会得问侬伐？我个反问让伊呒没闲话好讲。
之后，抱花回去，走勒路浪，就像女王捧好仔王冠一样个骄傲，心里向邪气开心，暗暗叫想，勿关迭个花是啥人送个，总归是爱我个人，而拨人家爱，又是多少幸福个事体啊。直到阿妹打电话过来，问我是否收到惊喜，再晓得送花个人是伊。而接过花束伊个一刻个惊喜，成为了此生当中我永远勿能忘记脱个美好。
从此，我先生也晓得了我对花个痴迷，每年我生日个搿天，伊侪会买花回转来，红艳艳个玫瑰，勿是一束，只有一朵。每当伊拿埃个一枝玫瑰带回到屋里向个辰光，我内心就升腾起自家拨伊捧勒手心里个感觉。
读迟子建个《女人与花朵》，勒文章个末尾段，伊迭能写道：“我想花朵也许是女人个魂灵，而蜜蜂则是男人个魂灵。当蜜蜂嗡嗡个叫勒海从搿朵花又跳到另外一朵花浪个辰光，花还是静静叫个蹲勒原来个地方，一如既往个开放勒海。”细想深究，还真个有一定个道理，勿得勿承认，男人搭女人因为生理及思维个勿同而永远无法绝对个平等。女人个生命中，多了被动，多了等待。
近30年过去了，我仍旧记得阿拉埃位班主任个爱人看伊辰光个眼神，执着而深情。
女人有得像花一样个容颜，更加有易随岁月而凋谢个勿堪。但是，有爱侬个人一直陪伴勒身边，无论花开花落，又有啥个关系呢？
往期回顾：
图：网络 / 编辑：渺渺