故里春秋（二十五）
作者：朱海洪
沪语改写：边秦翌
沪语讲述：徐建青
黄楚九，浙江余姚人。十六岁个辰光，带了一本祖传个《七十二症方》，跟伊拉娘到上海来行医卖药。一开始摊头摆勒城隍庙个“春风得意楼”，也就是今朝个绿波廊前头，照勒书里向个药方卖药丸。赚了眼钞票之后，黄楚九开始搞事体唻，问人家借钞票勒勒法大马路，就是搿歇个金陵东路浪开勒一家中法药房，制造销售“艾罗补脑汁”。搿种物事，当然是骗人个呀。但是伊邪气高明，对人个心理邪气了解，勿惜工本广告宣扬“艾罗补脑汁”勿但可以治疗毛病，还可以让人更加聪明。乃末搿记成功了呀，产品畅销，获利丰厚。1907年，黄楚九搭仔夏粹芳合办了“五洲大药房”。1909年，黄楚九偶然弄到一只古方，叫做“诸葛行军散”，伊参考祖传个“七十二症方”，成功研制出西式包装个中药“龙虎人丹”。
黄楚九后首来跨界，进入娱乐业。1912年开出“新新舞台”；1917年7月14号创办“大世界”，成为名符其实个“海上有名人”。
因为欢喜吃酒、吃茶，1931年黄楚九勒勒浙江路开出一家“萝春阁”茶楼，还勒附近张罗起一家汏浴场，叫做“浴德池”。吃酒、品茶、搓澡，还能赚钞票，黄楚九潇洒成了黄大仙。
人勿开心，想吃酒；开心了，也想吃酒，所以黄楚九常常杯勿离手。黄汤一灌多么，黄大仙迷迷糊糊个就到“浴德池”搓澡、泡脚、睏过夜。第二天一早爬起来，笃悠悠到“萝春阁”吃吃茶，难板还会上楼听听书。
“萝春阁”是个附庸风雅个好地方，伊唯一个缺点就是呒没茶点供应。茶客要吃点心，只好派伙计到外头去买。茶楼附近弄堂里正好有得一只做生煎馒头个小摊头，看上去勿起眼，但是做出来个生煎馒头吃口邪气好，附近个人侪欢喜。有辰光，黄楚九从“浴德池”睏痴梦懂里出来，老规矩，先到摊头买一袋生煎，再边走边吃，到茶楼歇歇脚。
有一日，黄楚九去买生煎，看到生煎摊浪有人勒勒“吵相骂”。轧进去一听，原来是老板勒勒骂伙计：“馒头里向摆介许多肉做啥啦？”伙计还想解释“多摆眼肉”个好处。老板听勿进，讲伙计勒勒“拆家棚”，要回头伊生意。
黄楚九一看，就朝牢仔迭个伙计喊闲话了：“勿要烦了，侬勿要搭伊搞勿清爽了，侬到我此地来做生煎伐，我就喜欢肉多摆点。”
“将欲取之，必先予之”，黄楚九深通经商之道，顺手牵羊就拿搿位“生煎”师傅挖过来了，“萝春阁”也开始经营起了生煎馒头。
“萝春阁”个生煎除脱“肉多摆点”，还有得只窍槛，就是馅料里向摆肉皮冻。搿能介个生煎吃起来，一口下去一包汤，味道邪气好。生煎成了“萝春阁”茶楼个招牌点心。
一年之后，迭个“肉多摆点”个生煎师傅拿手艺传拨了自家个侄子唐妙泉，搿能再有了四川中路浪个“大壶春”。
唐妙泉个生煎店一开始勿是叫“大壶春”个，叫“大壸春”。壸比壶多一横，后首来拨白字先生读成壶，读顺口了就一直“壶”到底了。
将壸读成壶，实在勿能怪民间个白字先生，科考进身个士宦当中也有拿壸读成壶个呀。
清朝末年有个叫王庆个人，为了谋到一官半职，带了礼品去求见张之洞。张之洞正好用锡壶勒倒茶，看到王庆递上来个材料字迹歪歪扭扭、毫无文采，灵机一动，写了“鍚荼壸”（读音：楊途困）三个字问伊：
“你认得搿三个字伐？”
王庆讲：“张大人取笑小生了，锡茶壶三字我岂能勿识。”
张之洞讲：“侬看看仔细，呒没认错伐？”
王庆讲：“锡茶壶我常庄用，哪能可能认错呢。”
张之洞手一挥：“送客！”
第二天，张之洞发文拿迭个候补知府遣回原籍，而且还写了几句闲话：
“我书本为鍚荼壸，尔则念作锡茶壶。
三字各仅一笔少，音义显别形易误。
令尔再面十年壁，从此不读锡茶壶。”
“大壸春”变成“大壶春”，“生煎”个样子也开始像茶壶了。原来收口朝下个生煎馒头翻身而坐，变成功收口朝上；顶浪圈起来个皱褶就像只茶壶个盖头，肚皮圆鼓鼓个，勒勒又厚又脆个底座浪稳笃笃个一坐，锡茶壶，呒没错。
朗读者
往期回顾：
图：网络 / 编辑：渺渺