上海人搭新上海人
作者：张黎明
讲述：王浩峰
为啥搿两年勒拉上海会得出现“新上海人”搿个称呼，勒拉北京搭深圳广州咾啥呒没搿个讲法个。搿张标签勿晓得啥辰光拨啥人贴上去个？而且，还邪气拨勒拉上海并拥有上海户籍个外来人员所认同。
我勿禁要问：“其一，为啥要区分上海人搭新上海人？其二，为啥伊拉勿讲我从啥地方来，而勿大自信个自称我是新上海人？”
我考虑了蛮多辰光。可能虽然讲勿少外来人员对上海人存在或多或少个偏见，但是，伊拉从骨子里向还是蛮仰慕上海人个；或许伊拉存心觉着要搭老上海人区别开来，觉着自家无论从啥个地方来个，侪勿输拨上海人个；还可能想通过搿个称谓，来显示自家已经融入了上海搿座城市。
搿眼假使侪是客观存在个，也呒啥对搭错，侪是蛮有道理个，因为呒没一座城市像上海搿能海纳百川，侪是由勿断进来个移民组成个。侬讲难道邬达克就勿是上海人吗？我觉着伊是标准个上海人，伊留拨上海个文化遗产有得几个人及得上个？难道哈同勿是上海人吗？伊创造了勿少上海个第一。伊拉侪是深远影响上海到现在个人。
新上海人一般侪勿会讲上海闲话，一个是怕人家笑话，一个就是用大勿着，现在一般性个沟通与交流，基本浪侪讲普通话。搿个是老底子从来没有过个。原来，勿管侬从啥地方来，到了上海侪要学讲上海闲话，虽然，侪或多或少带来眼地方口音，但是，大家侪是搿能听懂并交流个。现在搿个现象勿大多了。大家侪用普通话交流了，包括上海人之间有辰光也是用普通话交流个，因而，啥地方来个辨识度也就消逝了。
从言谈举止浪向来看，现在到上海个新上海人勿少侪是海归或者名校毕业个精英，基本浪向侪是开过眼界个，对生活品质侪是有讲究个，穿着打扮侪是蛮洋气个，因此，外表浪向几乎是呒没办法区分上海人搭新上海人个。
为啥勒拉北京个外地人一般会得称自家为“北漂”，而到了上海就自称“新上海人”，勿尽外地人如此，勿少外国人也会得自称为“新上海人”，我想：搿个或许就是海派文化个包容，使伊拉产生了归属感个原因伐！勿仅仅是一本户口簿个缘故。或许也是伊拉对上海搿个第二故乡个无限眷恋个一种表现。
所以，我认为勿必纠结于新上海人搿个称呼，关键勒拉侬能勒拉上海搿座城市留下来点啥？想勿拨历史所遗忘，就要勿断个拨历史所牢记。比如，张文宏医生就是其中代表，勿管从伊个学术成就，还是伊个“三观”侪已经完全融入了上海搿座城市，并已经开始影响搿座城市了，所以，就是由于新上海人个勿断涌入，上海搿座城市再充满了活力，使搿座魔都越来越接近世界城市群个中心。
侬讲，我讲个有道理伐？
作者
朗读者
往期回顾：
图：网络 / 编辑：渺渺