买裙记
沪语朗读：和沁
作者：高汉良
讲起伲迭个小外孙囡，我心里会笑出来嗰。小家伙刚刚满三岁，好白相得勿得了。皮肤么白白个，头发么卷卷个，看到我是亲热得来无没闲话讲，“ 外公 ! 外公! ” 叫得我骨节骨加酥酥个，骨头也轻了勿少。
上个礼拜，伊睏觉起来，眼睛眨发眨发，象大人一样告我讲：“外公，囡囡要去兜——马——路——”！咦，尬小年纪，拿能想得出要兜马路啊？我有眼弄勿懂。要么是阿拉“窝里相”教伊嗰？我老婆迭个人啊，年青辰光就是欢喜兜马路，后来囡吾大了，也欢喜跟子老娘兜马路。乃好，奈我小孙囡也要带“坏”脱了！
我搭伊讲，外公带侬去公园白相好伐？小鬼头勿肯，犟头掘脑就是要兜马路！好，好，兜马路就兜马路。走，祖孙两家头兜马路去哉！
辣淮海路浪东兜兜，西兜兜，我也无啥方向。穿过一条横马路，前头有一家服装店，囡囡要进去，好吧，一老一小手拉手朝里向走…… 琳琅满目嗰童装柜台侪是好看嗰小人衣裳，阿拉小鬼头勿肯走了，像煞有介事东看看，西看看，样子像外婆，又有点像伊拉娘，蛮好白相嗰。过了一息息，伊老尬三千，盯牢一件小连衫裙讲：“囡囡买！外公买……” 喔唷位，我迭格人买衣裳眼光从来勿好个，也无没一眼自信。小孙囡要个裙子到底好勿拉？价佃蛮鬼要两百多块来。我勿想买，小家伙勿放我走，我面孔稍微板一板，伊就哭出无拉：“外公坏! 外公坏!”。单独陪伊辣外头，我一时头浪有点弄勿落，只好放软挡：“囡囡乖，外公买拨侬好伐？”
付仔铜佃, 营业员笑喜喜告阿拉包好, 小姑娘开心刹了，一奔三丈高：“外公，外公，顶顶好！”外公嗰骨头又酥哉！
回到窝里，我搭仔老婆、囡吾讲：“小家伙今早敲我竹杠，帮伊到淮海路浪买了条裙子，好看倒蛮好看，让伊穿拔大家看看，嗲伐？”
老婆讲：“西边出太阳哉！”
阿拉小孙囡起劲得勿得了，马上穿拔伊拉看。
“啊？啊？……”
一下子，三格大人侪呆脱了！
“拿能噶短拉?” 买个辰光我确实无没看清爽。
囡吾辣边浪拉长仔声音唱我：“乃是好来，迭条裙子比超短裙还短，短到腰浪去来。”
老婆狠狠瞪了我一眼；
我自己也只有傻笑的份了；
小家伙倒蛮懂个，勿吵，勿闹，一声勿响走了……
往期回顾：
图：网络 / 编辑：渺渺