摆渡去奉贤
原创： 孔明珠
沪语改写：高仁
讲述：洪瑛
看黄浦江水滔滔不绝，峥嵘岁月弹指一挥间。
黄浦江是上海个母亲河。100多年来浦东、浦西两岸，无论是人还是车辆个交通，一直侪是靠轮渡船来解决个，乘船过江，上海人称之为乘市轮渡，或者叫伊“摆渡”。直到1971年，黄浦江下头第一条打浦桥隧道建成通车，再缓解了两岸之间公共交通个压力。
国家改革开放之后，黄浦江浪向一座座大桥像彩虹能介个飞架两岸，地下隧道增加，使得黄浦江浪轮渡交通个需求量大幅度降低。通过网浪查询以后晓得，到目前为止，上海个过江轮渡线路还保留勒18条。交关人欢喜乘船，相比飞机或者火车，船勒水浪向开，汽笛一声叫，江水荡开了涟漪，船慢慢叫朝前开，俯瞰江面，会得产生一种浪漫个情怀，对岸个新鲜感引起人个各种想象，一个“渡”字或许可以解开交关生活当中个难题。
我18岁还勿到个辰光，曾经下乡到奉贤个农场去，每隔两三个号头，会得轮到我休探亲假，可以回上海一趟。我屋里住勒虹口区，从四川北路虬江路出发，乘21路电车调15路到徐家汇，再调徐闵线，路浪向需要一个多钟头再到闵行渡口。迭格辰光个市轮渡有得两组船对开，一只是专门载人个客渡船，另外一只是车渡线，专门摆渡汽车个，车渡船邪气大，大小车子可以装十几部，勒我眼睛里就好像是航空母舰一样。
农场里劳动蛮辛苦个，回去探亲是桩老开心个事体，轻装上阵，跳跳蹦蹦。回农场个辰光，会得拖之大包小包，包里向侪是欢喜看个书，戒馋痨个零食搭仔干煎咸带鱼、辣酱咾啥个小菜，还是一只哭出乌拉个面孔。闵行渡口个对过是西渡口，当时是上海郊区奉贤县。我蹲个星火农场是呒没直达个班车个，勒西渡乘奉贤个公交车，经过南桥到钱桥，下车调一部到星火农场场部个车子，一塌刮子一个多钟头，再步行半个钟头回到连队。我是欢喜一家头走个，半日天里向，顶欢喜勒市轮渡浪向个一段辰光，迭个是两段枯燥无聊个长途汽车之后松筋骨、望野眼个适意享受。
轮渡票是一只红颜色个圆形塑料牌子，厾到筹码箱里。乘客走过通往摆渡船个微微晃动个浮桥，浮桥浪个乘客越来越多，我个头发拨风吹乱脱了，一歇歇功夫，汽笛响了，摆渡船已经靠岸，接牢之“当当当”，像催命一样个铃声，大家蜂拥而入，老年人抢座位，年轻人抢靠窗个栏杆，我轧到船头浪，欢喜迎风舒展个适意。从闵行渡口到西渡口个轮船浪，其实只有短短个五六分钟辰光，我个思绪却像煞脱缰个野马一样，奔腾勿歇呀。
勒搿条船浪最刻骨铭心个记忆，是勒1972年9月18号，我搭勒星火农场一道个三阿姐，收到父亲病危个消息，勒同一班开往闵行个摆渡船浪碰着，姐弟两家头惊恐相望，勿相信迭个噩耗。从18岁到25岁，我每年有五六趟往返勒上海、奉贤之间，勒摆渡船浪，有过多少趟伤心难过，又有多少趟握紧之拳头，立下决心要到农场去好好叫劳动，努力改造世界观，争取人生前途。
四十多年过去唻，今朝勒黄浦江浪，闵行到奉贤已经有了一座斜拉桥闵浦二桥，除脱仔通汽车，地铁5号线也从桥面浪通过，由莘庄启程过奉贤南桥，终点站就勒奉贤新城。葛末，一直勒我脑子里打转，让我伤感难过个黄浦江西闵轮渡线，现在勿晓得还勒辣伐？
目前疫情稍许好转了，我终于下定决心。趁黄梅天里个一个落雨天，上半日10点钟，步行到东平路衡山路816路起点站，车厢里只有我一家头。移开窗玻璃，面孔浪觉着一阵风凉，偶然有几滴小雨飘进来，体感老适意个。进入闵行地区，一只只邪气熟悉个站名跳进眼睛，莘庄、颛桥、北桥、沪闵路东川路……还看见了闵行法院个高大建筑。用脱1个钟头三刻钟，乘到底了。勒闵行滨江花园大道下车，马路宽畅，地面拨雨水冲得清清爽爽，拨称为上海西南部个外滩，真是漂亮呀！一眼看到了闵行渡口，赤刮勒新个门面，舒适个候船区域。原来勒建造闵浦二桥个辰光，老渡口向西移动了大约摸200米，搿搭是新造个。原来要过江个汽车侪要摆渡个，闵浦二桥通车以后，车轮渡就自然取消了，只剩下来两岸对开个客渡船，票价2元，还是原来个牌子。熟悉个“上海市轮渡公司”几个字，已经蛮旧了。候船个大多数是开电动车个，有老人运货个，也有一家门带之小囡回娘家去个，车流当中，有开电动车着鲜黄颜色工作装个“美团”快递小哥，要拿两盒浦西订购个奶油蛋糕送货上门，我问伊，浦东呒没“美团”个？伊讲，有个，搿一单个客人指定要浦西个店里买个，所以要送过去。
轮渡勒慢慢叫靠近浮桥，我眼眶里含勒眼泪水，看见船工拿起像手臂把介粗个麻绳圈套到河岸边个桩子浪，熟练个兜几圈，打只麻花结，船体就稳稳个靠岸了。乃么“呜——”回声响起，拦牢人个铁栅栏门慢慢叫拉开，接下去呢，就是“当当当……”，催促个铃声响起来了。顺牢之人流进入摆渡船，搭四十年之前一样，老少个几只位子眼睛一眨就坐满了，开电动车个抢到下船出口个起跑线边浪停好，做好随时冲出去个样子。我勒船头浪寻到一块蛮清爽个玻璃窗，透过窗口，去拍江面浪个船。开出去五六分钟以后，熟悉个一幕又出现了，“呜呜”“当当”声响起，大家蜂拥而出，只有我，还勒拉笃悠悠个东张张西望望，想寻到留勒脑海当中个模模糊糊个青春印记。使我邪气失落个是，搭闵行渡口一样，西渡口老街浪向搿些蹲勒地浪卖菜搭仔土产个小商贩侪看勿见了，地浪向清清爽爽，临水个小街、小镇特有个湿嗒嗒，浓郁个鱼腥气侪消失了。
2010年建成通车个闵浦二桥，桥面个上层是双向四车道城市快速路，下层是双线轻轨。5号线西渡站个站台勒桥浪向，乘自动扶梯进站，跨江回到市中心。
看黄浦江水滔滔不绝，峥嵘岁月弹指一挥间。
作者
朗读者
往期回顾：
图：网络 / 编辑：渺渺