上海的三脚猫搭仔逍遥派是互为因果个生活态度
沪语朗读：王维杰
朗读者
上海的三脚猫搭仔逍遥派
原创：马尚龙
沪语改写、朗读：王维杰
有一手个上海人，勒以前还真个是勿少。老底子上海有几家男人店，虬江路是淘电子管晶体管元件个集大成市场，只有男人会得去个，买回来还要装唻。伊个辰光会装半导体个人勿在少数，会装电视机个多来稀，还有音响器材，照相器材，南京东路个航模，中央商场……，上海男人个零用铜钿用到啥地方去了？就到搿眼地方去了呀。勒最苍白个年代里，上海男人个爱好却一直延续勒海。
上海需要搿能个男人，凡是有技术含量个生活，侪是自家做个，既省了钞票，也体现了专业手艺，而且，交关辰光，花了钞票还买勿到比自家动手来得好。搿种男人还往往是多面手，唔没修勿好个物事。
欢喜拍照个男士，还要自家冲胶卷，印照片，放大照片。“D72”显影粉，照相纸买回来，拿条毯子遮牢窗们做暗房，就勒卫生间里DIY（自家动手）了。
可以证明当年小资情调依然迓呀教行个，是淮海路个两家照相器材商店，一家叫做艺美，一家叫做海影，生意交关好，里向总归有一群男人勒买照相纸，也勒交流冲印技巧。
假使讲白相照相个男人是小资，葛末，勒礼拜天揩脚踏车个就是大路货了。并勿是伊个辰光个男人一定比现在个男人勤劳、整洁，主要是勒保护自家屋里邪气贵重个固定资产呀。28寸脚踏车后轮胎有48根钢丝，一根根揩下来，蛮吃功夫个。讲揩车子，实际浪并勿止揩揩伊介简单，弹子盘要拆下来上上油，勿大灵光个零件么调脱眼。一个会保养脚踏车个人，伊个脚踏车看上去邪气亮，踏起来老轻巧，永远像新个一样。伊个年代，脚踏车——是一种能够摆了外头自然而然炫耀经济实力搭仔男人价值个物事。
前两年听说过搿能一个真实个故事。六十几岁个王书记还勒搭自家个丈人老头剃头发。“小王”迭个称呼，是伊个丈人、也就是伊当年个师傅几十年来对伊勿变个称谓，虽然后来由师徒关系发展到了翁婿关系，虽然勒单位里向，小王老八里早已经是老王了，而且还是王书记，但是，勒屋里向，伊永远是“小王”。
小王并勿是理发店个职工，剃头是伊青年时代个爱好。有小王搿能个理发爱好者，上海小青年也勿少个。老奇怪个是，勒上海，剃头作为一种职业是拨人看勿起个，学堂毕业啥人分配去做剃头师傅，勒同学搭仔邻里之间头也抬勿起来。但是作为一种业余爱好，作为一门实用个生活手艺，又是受到普遍尊重个。伊眼会剃头个小青年，先是搭自家个阿弟剃，省仔勿少剃头铜钿，因为剃得像是马桶口，阿弟们还饱受“马桶头”个嘲讽。后首来有眼水平了，就勒弄堂里向摆开阵势，关系好个邻居搭仔同学就来享受免费个服务，受尊重个地位也就显出来了。礼拜天个早浪向，弄堂口过街楼下头个一块风水宝地，老早就预留勒海，只等师傅出场。
小王进了单位跟了师傅，也就象大多数个师徒关系一样，一个敬师如父，一个爱徒如子。小王学会剃头以后，晓得师傅也是个做人家个人，乃么就上门帮师父剃头，三个礼拜一趟，逢年过节再加一趟，刮风落雨从勿脱班，后来还顺带便搭师傅个儿子剃头；师傅用勿着再到剃头店去排队剃头，每趟剃好头，师傅总归是照照镜子摸摸脑后头，讲小王个水平比剃头店高交关，师母也勒旁边应和。
师傅师母看小王人本份，勿吃香烟老酒，就有了拿囡儿嫁拨小王个意思。结婚以后，小王仍旧搭丈人小舅子剃头；有了儿子了还搭儿子剃头。再后来，大家生活条件侪好了起来，又搬了场；上海个弄堂里向就再也看勿到搭邻居免费剃头个年轻人了。小王个服务对象也就一个一个少下来了，最后就剩下来了丈人老头，搭仔已经做了党委书记个小王互相“勿放弃，勿抛弃”，照样是三个礼拜一趟，丈人还常庄炫耀：我个女婿现在是党委书记，还一定要告我剃头。
上海人有一手，在于上海人个生活热情高于革命热情。上海有勿少只顾自家生活个逍遥派，逍遥派是上海人欢喜自家动手个精神品质。逍遥派还有更实际个意思，伊拉是自得其乐个，乐在逍遥之中。伊拉学书法，学篆刻，学吹拉弹唱，学装半导体无线电，做家具，敲鱼缸，修脚踏车。有更加多个是偷偷叫自习数理化。后首来涌现出个一代艺术家、书法家、画家几乎侪是当年个逍遥派，还有，第一趟高考中状元个，逍遥派勿在少数。
上海男人有得学一技之长个心理，搿一技之长，可能是职业个一技之长，成为一名技术能手，也可能是生活个一技之长，搭阁楼，修自来水龙头，属于全能型个，也可能具有艺术个一技之长，吹口琴，吹笛子，拉手风琴，还懂一眼好莱坞、交响乐……嘎起三胡来，上至天文地理，下至鸡毛蒜皮，样样事体侪晓得一眼。搿种男人，有一个老奇特个称号：三脚猫。假使一个专业者被称为三脚猫，葛是贬称，但是一个业余者被称为三脚猫，葛就是对伊个肯定了。
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号