“顶替”（下）

沪语朗读：肖德生

“顶替”（下）

作者：胡伟祖

来源：朝花时文

改编：郭莉

朗读：肖德生

推荐：丁迪蒙

当然，也勿是所有家庭个“顶替”故事侪是顺风顺水个。有种家庭下乡子女多，可以“顶替”个只有爷娘两只位置，迭个辰光就要看迭个家庭个家风，也是考验伊拉兄弟姐妹个亲情了。 

我个同学阿三，一个阿姐勒勒黑龙江军垦农场，一个阿姐勒安徽插队。伊拉娘呒没工作，只有伊拉爷一只名额可以用来“顶替”，拨啥人呢？姐妹俩当然侪想回来，但是伊拉互相谦让。后来是拿工资个阿姐让拨了拿工分个妹妹，真是姐妹情深。

邻居小龙，勒勒市郊农场，伊个阿哥勒嘞江苏农村投亲插队。因为伊拉爷死得早，屋里也只有伊拉娘个一只可以“顶替”个机会。屋里向人侪讲让阿哥顶替，叫小龙勒农场等上调。小龙偏偏写了一封信拨阿哥，倾诉农场工作个艰辛，请求阿哥拿机会让拨伊。阿哥虽然也老想回上海，但还是毅然答应了弟弟个请求……

还有一眼“曲线”顶替个故事，过程就复杂交关了。

阿强，读书辰光学习成绩就邪气好，初中毕业到黑龙江插队。1977年恢复高考，伊考进当地一家师范学院。“顶替”政策一出台，屋里向人写信要伊退学回上海顶替爷。阿强是老想读书个，但是思念亲人想回上海个愿望更强烈。乃末依依不舍办了退学手续，回到生产队恢复知青身份，再申请办理“顶替”手续，总算户口迁回离开十年个上海——因为根据规定，只有还勒农村个知青，再好享受顶替政策。已经离开农村，去读大学或者已经上调到当地工矿企业个知青，是勿好享受顶替政策个。所以，交关已经读大学、上调个知青，又想办法退学辞职返回农村，再办手续，“曲线”顶替回城。

同事阿旺勒勒农村插队几年，搭土生土长个当地姑娘结婚，也有了小囡。“顶替”政策出台，伊跟老婆协商办理 “假离婚”，对外宣布恢复单身身份，“顶替”回上海工作。后首来再回去跟老婆办复婚手续。当时规定，跟当地青年成婚个知青也是勿好享受“顶替”政策个。所以当时已婚知青想出个极办法，办假离婚手续个实在勿少。不过，后来弄假成真，留下“孽债”个故事，也常庄听人讲起。

爷娘退休，子女“顶替”。搿种劳动就业制度勒嘞当时特定个历史条件下，为解决大批返城知青就业，解决社会待业青年工作问题，发挥了一定个积极作用。但是，搿种“子承父业”个就业制度，毕竟有违社会公平搭仔择优录用原则。1986年7月，国务院发布了国营企业劳动用工制度改革个四项规定，决定从1986年10月1号开始，国营企业招用工人，必须“面向社会，公开招收，全面考核，择优录用”，还要全部实行劳动合同制，从此，子女“顶替”爷娘工作个现象逐渐消失。“顶替”，迭个当年社会个热门话题，也终于淡出了社会语境……

精彩回放：
“顶替”（上）
甜酸苦辣说年货
有一种思念，勿联系，勿打扰
择校勿亚于择偶（三）
择校勿亚于择偶（二）
择校勿亚于择偶（一）
雪花的快乐
济南的冬天
夕阳无限好，句号
晨起慈心祝福

图片来自网络