灶披间里个七嘴八搭 / 开普饭

沪语朗读：曹兰珍

朗读者

灶披间里个七嘴八搭

原创： 沈嘉禄

来源：老有上海味道 2019.4.29

滬語改寫：郭莉

朗讀：曹蘭珍

推薦：丁迪蒙

灶披间，勿仅是上海人家家庭生活个重要基地，还是一只灵敏个信息集散地，或者叫信息发布中心。有多多少少小道消息是从搿搭散播出去个呀。

12号亭子间里阿跷打了伊拉晚爷一记耳光，结果晚爷拨送到医院就一脚去了；14号前客堂阿玲，勒勒厂门口拾到一个小囡，有三只脚，送到医院去医院也勿肯收，因为医院觉着迭个小囡是阿玲自家养出来个，看见勿正常，就打算拿搿只包裹去厾拨勒政府。结果没办法，阿玲只好拿小囡抱转来自家抚养；还有啥23号前厢房好婆，勒勒弄堂口拾到一只军用背包，里向有好几千块钞票唻！啥人晓得拿到银行一验，侪是假钞……

国际新闻也有勿勿少少：尼克松总统访问上海，勒勒国际饭店吃了一盆绿豆芽嵌肉丝；埃塞俄比亚个海尔塞拉西皇帝到上海来，伊个搿条大狼狗价值十万块哦；还有还有，为了让西哈努克亲王勒勒城隍庙吃一碗鸡鸭血汤，饭店里竟然杀了108只鸡……

当然咾，温馨個故事，也时时刻刻会得勒勒灶披间发生：李家阿嫂包荠菜肉馄饨，每家每户侪要送一碗；张家姆妈摊了草头饼，每家每户也侪有得尝尝個；张老伯伯孤老头子一个，睏勒床浪向两天呒没吃物事了，大家要紧熬了粥来餵伊吃；刘家屋里個饭焦脱了！哦哟，快点相帮端端开呀……

上海人，侪是一根藤浪结个瓜，藤烂脱了，瓜自然也就瘪脱了。当然，迭个并勿妨碍大家暗地里勒勒打量邻舍个家底，講勿定还暗暗叫别苗头：伊拉屋里过年吃点啥？囡儿回娘家，伊拉烧点啥個小菜？

等到煤球炉子慢慢叫消灭，大家侪用上了液化气以後，还要拿放钢瓶个小木橱锁脱。迭个也就是上海人个德性！搿有啥呢？儂看厨房间里向個水龙头，还勿是老早就锁好了？

再到后来，上海人家有了自家个独用厨房间，从三個平方开始一眼眼升级，到现在，七八个平方个厨房间是勿稀奇个。有種人还学外国人個腔调，开放式厨房、双门冰箱、老长老长个料理台，结果弄得油烟勒屋里向乱蹿，客厅里向個电视机、音箱侪老快就氧化了。一眼土豪屋里向个厨房间里，还装了大屏幕电视机、高保真音响，酒吧台是索介直接从五星级饭店去驳样仿造，搿能好像就觉着勒勒厨房间里吃早餐就特别有情调了。级别再高眼个土豪屋里，还分中餐、西餐两种厨房间，地方大得来可以跳舞。哈哈，现在上海人家个厨房间，真是邪气海威了！

但是啊，勿关侬有几化大个厨房间，好像呒没啥人家勒勒窗台浪向擺瓶鲜花个，咸鱼、咸肉倒是挂了勿少。要是屋里请了小保姆，葛末屋里個家主婆还要生份心，歇勿歇眼睛瞄脱一记，“养媳妇偷吃热豆腐”，搿句老话从来就勿是空穴来风哦。

唉！灶披间，厨房间。迭个，也是一只識得上海人家个独特窗口啊。