啥人来搭逝去了个淮海路 “春江”生煎馒头讲声对勿起 / 开普饭

沪语朗读：边秦翌

朗读者

啥人来搭逝去了个淮海路

“春江”生煎馒头讲声对勿起

作者：马尚龙

沪语改写、诵读：边秦翌

指导：丁迪蒙

呒没几个人晓得淮海路搿个地方，就是如今一排生大门紧闭个地方，曾经有家名气老响个点心店，生煎馒头搭仔咖喱牛肉汤是伊个两大招牌。单开间门面，因为就勒法式弄堂——和合坊个正对面，附近个人就侪叫伊“和合坊”了。

现在，理所当然个老早就呒没了，也理所当然呒没啥人讲起伊了。晓得个人，老个老了，忘记脱个忘籍脱了，年纪轻个，还有近两年到上海落户个就免谈了。

搿爿点心店笡对过是淮海电影院——每家电影院个周围，总归会有点心店搭仔小个食品店，搿是四五十年前最高境界个小资情调了。搿家点心店邪气有名，特色是生煎馒头搭仔咖喱牛肉汤。看电影之前买眼零食，看好电影吃客生煎、一碗牛肉汤，是桩邪气体面个事体，初恋男女，吃客生煎，感情也就熟了。

当时，普通生煎馒头四只一角二分，搿家个生煎一角六，其中有淮海路个地段因素，更加有搿爿店独特个味道。据说，姚慕双、周柏春有个滑稽戏一段，就是从搿家店来个灵感：两个陌生吃客面对面坐勒海吃生煎，一个咬了一口，没想到汁水忒多，“哧”，一记头飚到对过吃客个面孔浪；闯祸个人连声对勿起，还拿出自家个绢头让对方揩。对方讲嫑紧，接过绢头，揩好以后勿还拨人家，捏勒手里。闯祸个人摒勿牢讲：侬手里向个绢头……对方反应老快：绢头是侬个，会得还拔侬个，不过侬还有只生煎呒没吃，讲勿定又飚过来，我好拿绢头“淌一记”。搿就是搿家生煎个口碑。

当时辰光，生煎咬一口有汁水个勿多，搿家生煎是一绝，经常会有吃好了生煎，烫伤了“天花板”个感觉。现在生煎有汁勿难，有大厨朋友讲，以前面粉差，现在面粉好，要多少汁就可以有多少汁。是个啊，现在个生煎咬一口勿是汁，是汤了呀，汤像瀑布一样个流。不过，我还是觉着当年生煎个汁比较有分寸，含蓄、恰到好处。

生煎馒头有堂吃，也有外卖。大人小孩勒店门外头排队，手里拿好16寸钢钟镬子搭仔买好个筹子，蓝个、红个、黄个，表示勿同数量。看店里两只法兰板铁镬子里，摆满了生煎，浇油，喷水，廿分钟出锅……比现在鼎泰丰做生煎好看得多，因为伊还有味道个体验。

因为搿家生意好、名气响，所以附近个人认定搿是全上海最好、最贵个生煎，交关人居然勿晓得“大壶春”，大壶春距离和合坊有三四里路，邪气远。至于金中嘛，又是生煎、又是咖啡，当然比勿上生煎配咖喱牛肉汤咾！

搿家小小点心店，勒上世纪九十年代追求“高雅淮海路”辰光，也就是勒造华亭伊势丹搭仔一百淮海店个辰光，拨“高雅”脱了。我勒《上海女人》中写到过搿爿店搭仔淮海路个市井文化关系。因为店面小，招牌也小，我从来呒没在意过伊个店招，就应该叫“和合坊点心店”伐。书出版以后，有读者写信拔我，讲伊个店名是“春江点心店”。说明“春江”关门真个蛮长辰光了，但是“一江春水”流勒勒上海人个心里。

至今还常庄看到网浪有回忆春江个：伊个辰光，上海每条马路大概侪可以看到生煎个影子。最有名个是淮海路浪个春江。十年动乱，上海人也呒没放弃吃生煎个爱好，心甘情愿个等半个钟头。说明当年个春江，已经有了地标意义，虽然只有一开间门面，虽然现在要寻张伊个“音容笑貌”个照片也寻勿着了。

地标个意义搭仔作用勒城市里侪是邪气重要个，地标个意义在于增加城市个人文色彩，地标个作用则是城市行走个指南。

春江是小门面、小地标，勒伊个西面头浪向，算得上是大开面、大地标了。伊个就是2008年已经谢幕个华亭伊势丹。之后有好几家商家粉墨登场，但是伊拉还呒没来得及形成地标意义，就已经惨淡退场了。

几乎所有人对搿个地标记忆停留勒华亭伊势丹，搿是有道理个。1993年华亭伊势丹“闪亮登场”了。从一篇当年个介绍文章里就可以感受到当年伊个地位——营业面积5400平方米，是时尚先锋个“代言人”。

兜淮海路，有几家百货店是勿能勿兜兜个，华亭伊势丹就是一家。搿个地方，历经几十年个沉寂、荒芜之后，突然之间有种“惯于长夜过春时”个春意盎然。

有得几十年个沉寂荒芜？是个呀。大凡有新地标挺立，总归有人去追溯伊个前世今生。华亭伊势丹前生，呒没商店，呒没民居，只是沿牢淮海路人行道约有一百米长个宣传广告牌，广告牌背后头是一大片荒芜之地，搭仔广告牌几十年肝胆相照。广告牌是市井叫法，更准确个说法是政治宣传牌，红色宣传口号是伊个主旋律。“文革”初期，则是闻名全上海个大字报平台。

或许因为搿百来米个广告牌邪气招摇，所以就有了个地标性意义个名字：广告牌。比方讲有人问，淮海电影院哪能走，就有人会讲，走到广告牌，马路对过就是。

葛为啥淮海路黄金地段会有搿能大一块空地荒芜几十年？

据说是要建一个红色纪念馆个，搭刘少奇个地下党活动有关。店拨拆脱了，还呒没来得及造“文革”就开始了，刘少奇打倒了，纪念馆也就勿造了。广告牌就成为了各路造反派大字报个重要阵地。后来个勿少书法家，就是勒搿能个大字报阵地浪练就了书法十八般武艺。

广告牌真正意义浪成为广告牌是勒1979年。“幸福可乐”广告曾经勒搿一年顶天立过，搿大概算得上是最早个山寨商品。