“顶替”（上）

沪语朗读：肖德生

朗读者

“顶替”（上）

作者：胡伟祖

来源：朝花时文

改编：郭莉

朗读：肖德生

推荐：丁迪蒙

老朋友聚会，几个老知青勿晓得哪能，突然之间讲到了当年“顶替”爷娘参加工作个事体。我自家虽然勿是顶替个，但是勒亲朋好友、同学、同事里向，顶替个实在是勿少，我勒单位里也看见过，就勒短短个两三个号头里向，一批老职工匆匆忙忙办理了退休退职手续，接下去，一批年龄勿算小个年轻人来顶岗上班了。当年闹闹猛猛个“顶替”风潮，阿拉搿一代人至今侪是记忆犹新个。

四十年前，“顶替”，是上海居民个一只邪气热门个话题。所谓“顶替”，就是讲爷娘退休之后，子女顶替岗位，到爷娘个原工作单位就业。迭个是计划经济时代个一项劳动就业制度，从上世纪50年代就有了，但是真正大规模个实施，是勒上个世纪个70年代末、80年代初。

当时，“文革”已经结束，各个领域侪要拨乱反正。下乡个知青只想快点回到城里向工作，应届中学毕业生搭仔历届待业青年又侪等分配工作，就业个形势邪气紧张。1978年6月，国务院颁发了相关文件规定，干部、工人退职退休以后，生活确实困难，多子女上山下乡、子女就业少个家庭，单位可以招收家庭里向一个符合招工条件个子女参加工作。文件一传达，顿时立刻勒社会浪引起了强烈个反响。因为欸歇辰光，交关家庭侪有子女上山下乡，当然也有眼人已经调进了工矿、企业；有眼人去做工农兵大学生了，或者已经勒恢复高考以后进了大学；也有眼人去参军咾啥，但毕竟侪是少数。另外，一眼病退、困退回来个知青也勒等待安排工作。屋里向只要有因为各种原因呒没上山下乡、呒没安排工作个“社会青年”；或者有1976届、1977届中学毕业个待业青年，家长侪愁得勿得了，勿晓得哪能解决小囡个就业问题。现在有了“顶替”政策，等于开辟了一条就业捷径，对爷娘还勒上班、又齐巧快要退休个家庭来讲，简直就是福音。

“顶替”政策具体实施，上海个企事业单位就闹猛煞了。符合条件个老职工纷纷交出退休申请报告，有子女勒外地农村个家长态度邪气迫切。可以享受到“顶替”政策个知青个个欢欣鼓舞，快点抓紧办理有关手续，开开心心回上海了。

我个堂房阿姐是六九届初中生，伊初中毕业分配辰光，正好是上山下乡“一片红”，只好到江西农村插队落户去。勒《解放日报》工作个伯伯本来就年龄过线，现在“顶替”政策一出台，伯伯顿时立刻办了退休手续，让女儿顺顺利利进了报社工作。

我阿妹当时勒市郊个星火农场，“顶替”政策出台，我爷娘还没到退休年龄。一年多以后，我娘可以办理退休手续了，妹妹倒勿高兴去“顶替”了，因为娘个单位是“里弄生产组”，属于集体所有制，福利待遇勿好，所以阿拉屋里就放弃了一只“顶替”名额。后首来，为了让阿妹早点回到市区来，我个爷办了提前退休个手续，终于让阿妹“顶替”进了全民所有制个纺织厂工作……

我个朋友阿凯搭上了上山下乡末班车，勒上海个市郊五四农场。做了一年，因为表现好，已经离开大田，做起了电工，还兼做拖拉机手。“顶替”政策出台，屋里向人要伊回上海“顶替”伊拉姆妈，伊像我阿妹一样，嫌比集体所有制单位，勿大高兴去。有一天，勒上海一家企业当头头个爷,突然之间到农场连队去寻到伊，讲已经搭伊办好了“顶替”手续，叫伊现在就回寝室整理物事，卡车就勒连部等伊勒海。就搿能，硬劲拿伊“押”回了上海市区。

精彩回放：
甜酸苦辣说年货
有一种思念，勿联系，勿打扰
择校勿亚于择偶（三）
择校勿亚于择偶（二）
择校勿亚于择偶（一）
雪花的快乐
济南的冬天
夕阳无限好，句号
晨起慈心祝福

图片来自网络