瘟疫时期的乒乓旧梦
作者：沈嘉禄
沪语改写：丁迪蒙
朗读：李国琪
第一趟勒正规个乒乓台浪打乒乓球，是读一年级上体育课个搿一天，小朋友一个个排好队上阵，但绝大多数只有一个回合就拨体育老师斩下来。轮到我上场了，拿起球拍开球过网，遭到体育老师个拦截，乒乓球弹回来以后却再也没能力击退。一年级个小学生呀，人比球台高勿了多少，台面又像草原介辽阔，老里八早就拿我吓昏了。下课铃声响了，有两个同学可以搭老师打几只来回，拨认为是可造之才，选进了校队，我搭大多数同学一样，垂头丧气个走出了体育室。
但是，我搿个人从小就有廉耻之心，决心发愤苦练。放学以后，就搭几个要好同学拿课桌搬到操场浪拼成功一只球台桌，然后就侬推我挡杀脱一场。伊个辰光屋里穷，我个装备就是块光板，条件好个同学邪气神气，亮出长胶反贴，还有横拍选手用个专用板，摸也勿拨人家摸。球呢，大多数是八分洋钿一只个副牌，稍微好眼个盾牌要一角洋钿一只，勿当心踏瘪脱了，快点摆到茶杯里向，开水一泡，卟一声，瘪塘弹起来，小球就起死回生，又可以蹦蹦跳跳陪阿拉白相了。
当时，一只红双喜要两角洋钿，大开销，买勿起。勿像现在，文具店里侪是红双喜，一元一只算是便宜货了。
更加大个动力是来自二十八届世乒赛个捷报。伊个辰光每天夜到快点做功课，就守勒无线电旁边听解说，乒乓球勒台板浪个跳动声也听得邪气清爽。每趟中国选手取得关键一分，整条弄堂里就会得爆发出老大个欢呼声。最后，中国获得男、女团体世界冠军，庄则栋再次蝉联男单冠军，林慧卿、郑敏之获得女子双打冠军，庄则栋、徐寅生获得男子双打冠军。而徐寅生勒比赛当中搭裁判举手，示意对方打了只擦边球，应该判对方获胜，搿也体现了良好个体育道德。伊个报告录音几乎勒每只学堂侪播放过。
到了热天，阿拉还勒小菜场里找练球个地方。小菜场下半日收摊以后，就勒肉摊个水泥台面浪打。水泥台面硬，球个落点声音脆，反弹力也蛮强，但有点遗憾个是为了冲洗方便，台面做了点坡度，还有几只麻点，搿就让球的反弹线路发生勿可预测个变化，当然咾，也就更加有刺激。一直要打到天黑下来了，再拿好书包回转去。不过，听说徐寅生小辰光也是勒菜场里练球个，就凭搿点，阿拉侪认为自家搭世界冠军个距离勿算忒远。
二年级个辰光，学堂拿一只班分成功几个小组，放学以后按照小组活动。所谓活动，就是勒一道做功课，成绩好个帮差个，伊个辰光大家侪邪气天真，呒没有囥点个想法。我是小组长，任务之一就是出些怪题目，叫大家难过难过。我个小组里有个同学个爷是开肉铺个，小组活动就常庄勒伊个屋里。做好功课，就拿肉铺个排门板搭成功乒乓台，算是余兴活动，家长、老师也蛮支持个。每趟打出好球，就会得引起围观者个叫好声，阿拉搿眼小赤佬看看四周围，得意个样子勿亚于卸了牛肩骨个疱丁。但是，排门板也有缺点个，球假使落勒两块板个接缝浪，就有“逃球”，防不胜防。搿能样子苦练以后，我终于杀进校队，代表学堂男队参加了区里个比赛，最后还捞到了一个名次。
重新拾起球拍是我做了爷以后，有一趟，了解到儿子进中学了还勿会打乒乓，真个弄勿懂现在个基础教育勒忙点啥，来煞勿及拖好仔老婆儿子到小区个乒乓房去练球。练啊练啊，儿子勒我个连续大力扣杀之下心理崩溃，再也呒没招架之力，只好让我搭老婆重温旧梦。后首来，阿拉就经常勒乒乓房里练个一两个钟头，搭管理员也交了朋友，有辰光偶尔路过，手痒，就进去了，钞票没带可以欠勒海。可惜，前两天再去，搿家乒乓房因为入不敷出，已经关门谢客了。
今年春节以来，新冠肺炎疫情弄得大家人心惶惶，勿敢出去。宅勒屋里个日脚邪气无聊，平时饭后一个钟头个散步也被迫取消，老是勒阳台浪练腹卧撑有啥意思呢？前一抢，日本乒乓球世界冠军星野展弥不幸去世，享年83岁，搿位日本国手曾经勒1961年个世乒赛浪搭徐寅生一道上演了十二大板个世纪大扣杀，至今仍旧是让人津津乐道个乒坛佳话。第二天，媒体记者邪气有心，报道了一组体育界名人宅家健身个新闻，其中就有比星野展弥小一岁个老对手、国际乒联终身名誉主席徐寅生在家练乒乓球个消息。徐寅生屋里呒没球桌，伊用一种简易有效个“乒乓球神器”——弹力软轴乒乓球训练器。勒视频里向我看到，神器个全部秘密就是一根细细个、插勒防滑底盘中央个弹力钢杆，上端联接勒一只桔红颜色个乒乓球，徐老对牢乒乓球左右开弓，乒乓球出去以后总归会得回到伊个面前。搿个忒好了，老婆大人马上勒网浪下单，第二天到货，我花了两三分钟就组装好了，辟里啪拉一通对杀，邪气过瘾，一刻钟以后就出汗了，也用勿着担心乒乓球逃到柜子底下或者飞到窗外头去，每趟侪会乖乖叫弹回来。世界浪居然有得搿能介“讨打”个货色，也让人醉了。
朗读者
往期回顾：
图：网络 / 编辑：渺渺如胭