小馄饨、菜肉馄饨搭仔素馄饨（三） / 开普饭

沪语朗读：千杯不醉

小馄饨、菜肉馄饨搭仔素馄饨（三）

作者：千杯不醉

改编：郭莉

朗读：千杯不醉

推荐：丁迪蒙

有一趟，微信群友嘎山湖，讲起馄饨。有个吃素个老兄请求群里能干个“茄人头”美眉做素馄饨拨大家吃。究竟啥个是素馄饨呢？伊勿讲，也呒没人接过话头，呒没人答应做来拨大家聚会辰光吃。估计大家侪勒嘞考究，搿只算啥物事呢？会得好吃伐。常识告诉阿拉，但凡面食，总归要有油有肉，要么菌菇海鲜咾啥，葛末食材好，口味佳。素馄饨没油没肉，是啥滋味呢？啥人晓得弄到后来，经过再三追问，甚至恳求，搿位仁兄再道出谜底：原来伊讲个“素馄饨”并勿是一般人想象个用蔬菜做馅子个馄饨，伊讲个实际浪是“虾仁馅馄饨”！哦哟阿爹拉个娘！搿真是七里缠勒八里！笑得我是肚皮痛煞，眼泪水也出来了，就是还呒没想通，伊凭啥讲虾仁馄饨就是素馄饨呢？是勿是呒没猪肉个馄饨馅子侪算素馄饨啊？当然也呒没人回答我。想想也是，凭啥人家勿好讲搿是素馄饨呢？弄得勿好，人家还觉着我少见多怪！思路完全可以宽点，脑洞也完全可以大眼嘛！

其实，我倒是吃过真正个呒没荤腥个素馄饨个，而且，真个邪气好吃。

当年阿姐下乡插队落户去了。屋里向尔奶常庄唉声叹气，牵记阿姐勒嘞乡下头吃辛吃苦，牵记伊会勿会生毛病，会勿会做生活辰光受啥个伤。尔奶的心思侪勒嘞对阿姐个牵记浪向，屋里向一日三餐也懒得动手，整天就搿能无精打采，嘴巴里叽叽咕咕，要我也跟插队个阿姐一样清苦，好像搿能再是姐妹甘苦同当。每日天中饭，尔奶就下眼面条，阿拉两介头吃饱算数。我对面条从来就是反感透反感透个，小辰光一碗面条堆勒眼面前，我是一根根一面数一面嗍，慢吞吞个就是咽勿下去。一直吃到面条勒碗里向涨出来了，烂污糟糟更加吃勿下去。现在日朝吃面条，哪能办啊？终于有一天，尔奶又讲中浪向吃面条个辰光，我大声拒绝了：覅！尔奶为难个看着我，搓搓手讲，葛末吃啥呢？我讲我勿关，反正我就是勿要吃面条！尔奶讲：煎只荷包蛋拨侬配面条好伐？“覅！”我还是犟到底：“我勿要吃面条！”尔奶最后只好讲：搿能吧，侬去买半斤馄饨皮来，屋里向呒没肉了，只有几棵青菜搭仔一眼豆腐干，我做素馄饨拨侬吃。啊哈！我开心得来接过钞票飞奔下去，到粮店去买馄饨皮，生怕去晏了，皮子卖光了。

尔奶个素馄饨，真个真个是邪气好吃！伊拿青菜勒开水焯好斩碎，还泡发了一眼香菇木耳金针菜，搭仔五香豆腐干一道斩好，还加了眼小虾皮，馅子勒嘞镬子里加盐加糖用重油炒过个，勒嘞每个人一个号头只有半斤油个时代，重油是啥个概念啊！馅子碧绿生青，又撒了眼胡椒粉，面条哪能好跟伊比啊？尔奶勒搿面炒，我勒嘞边头老早已经闻得涎唾水嗒嗒渧了。至于裹馄饨，我是邪气来事个，从小就拨尔奶教出来了。有一趟到常州去探亲，小婶婶听尔奶言话，中浪向裹馄饨招待我，馅子端出来，我也汏手帮忙。小婶婶想勿到我迭个上海小姐裹馄饨动作飞快，还是馅子十足个元宝馄饨，样子只只饱满好看，穷讲我好唻！我当然听得焐心得意了，尾巴差眼翘到天浪，我还算是低调，收敛牢自家个哦！

《都门杂咏》里向有搿能几句：“包得馄饨味胜常，馅融春韭嚼来香。清汤润物休嫌淡，咽后方知滋味长。”伊讲个是韭菜馅子个馄饨，对我来讲，尔奶个素馄饨，再真是胜过天堂个绝佳美食，滋味长啊！

小馄饨、菜肉馄饨、素馄饨，侪是我心里所爱，勿贵，勿贱。如今我身勒海外，看一篇美食杂文，勒嘞勿经意之间，陈年旧事侪到了眼前。亲人、旧事，就像退色个影集，又像是青灯黄卷，一页页拨风吹起来了。迭眼事体，连带我对天堂亲人个思念，淡淡个，又是持久个，总归叫侬忘记勿脱。