“绿皮”少年心
沪语朗读：郭健
作者：林筱瑾
沪语改写诵读：郭健
“呜呜----”汽笛声声，阿拉一眼人结束了勒新疆伊犁草原个旅程，坐勒12节清一色个软卧绿皮车厢专列浪，回上海了。绿皮火车从伊宁经过乌鲁木齐，穿过吐鲁番盆地搭仔茫茫个戈壁、沿牢河西走廊到黄土高原，又贴勒秦岭山脉一路朝黄淮平原飞奔。立勒绿皮车厢个走廊里向，窗门外头朝后头退个风光大片一眼一眼临近尾声了，内心里向有得交关个感叹呀；勒勒搿个方寸之间个长廊里，我追寻夜到九点钟最后个一眼夕阳，再远远叫看一眼黑洞洞个荒原浪向天边个亮光，车子浪碰着个人再谈得来，勿久也会得分开个，可能是再也见勿着面个了，下半日个阳光洒勒走廊里向，留下来我长长个影子搭仔寂寞，辰光勒一眼眼个过去，我个思绪也勒一眼眼个铺开……
小个辰光，我看见墨绿颜色高头镶勒亮黄颜色条子个绿皮火车，就觉着伊像一个钢铁巨人，白底黑字个车牌就是伊个眼睛，像煞伊看得到交交关关迁移个故事一样。记得六岁个辰光跟牢姆妈去福州探亲，乘了三十几个钟头，我一直是缩勒硬座位子浪勿大动个，日里向，小鼻头贴牢玻璃窗，盯牢外头个风景看；要进山洞了，火车就发出一声长长个叫声，就好像是从火车个丹田里向发出来个，振得耳朵也要聋脱了，随后呢，就是一阵飓风——“呜”，像要拿我掼进黑黜黜个山洞里去了；我还欢喜看到从对面开过来个火车，就勒两车交汇个辰光，有速度加快个感觉，搿个一刹那个感觉，就好像是一闪而过个科幻片；过桥个辰光，看到一眼眼后退个桥架，还有白茫茫晃动个河浜，我小小个心脏好像也跟勒海荡发荡发……“绿皮”火车就是有得搿种介个魅力。
记得，我读大三个辰光，暑假里向出去实习，目的地是离开屋里老老远个贵州个少数民族地区，勒火车浪向，一车子个年轻人，大家嘻嘻哈哈个轧勒热烘烘个车厢里，汗嗒嗒滴，衣裳个后背浪侪是盐霜。铁轨搭仔火车个金属撞击发出个声音，还有第一次失眠个感觉，搿所有个一切搭后首来苗岭个实习成果混勒一道，构成了我深刻个绿色回忆……
岁月就像是一首歌，现在，随牢科技个发展，上海通到苏州去个地铁也勿再是梦了，虹桥高铁个地下室可以直通航站楼个地下室，四、五个钟头个城际高铁就像升级版个地铁一样方便。相比之下，绿皮火车就变成功了慢生活个标志，虽然讲，车厢也恒温个，也邪气适意个，但是，内部个装饰搭仔设备个配置咾啥就已经过时了，因为速度慢，伊已经慢慢叫拨边缘化了。不过呢，像我搿能个普通老百姓，搿种介接地气个漫游，倒是蛮称我个心个。乃末，乘跑车咾啥叫做“拉风”，老早子热天介乘了“绿皮”火车浪向，开窗个辰光用力望上一抬，风一记头“嗡”进来了，也蛮“拉风”噢！搿感觉就像是七月里向吃啤酒，真是爽啊！
现在，要想回到老底子是勿可能个了。还算好，搿次个草原之行让我重温了“绿皮”个慢节奏生活。还有让我觉着惊喜个是，勒车厢搿条走廊里向，看得到有人勒做八段锦、跳广场舞；扶手个栏杆浪向，拨风吹起来个毛巾，又让我想起了当年勒宿舍外头飘个七彩旗；床个当中，有个小小个空间，搿是各类棋牌个阵地；我呢，还自备了一只焖烧杯，自家弄了一小碗八宝粥，来安慰安慰自家个胃……假使讲，新疆个草原之行是阿拉搿帮老少年七月个“诗搭仔远方”，葛末，“绿皮”火车，就是一部夏令营个集体房车。
经过了40多个钟头个长途旅行，长三角已经久违个清甜个绿意扑面而来，旅程快要结束了，交关人侪舍勿得离别，只好勒“绿皮”火车浪向慢慢叫个告别。
末脚几站个避让搭仔停顿之后，火车风尘仆仆个开进了邪气时尚个苏州站，老巧个是，迎面开过来了一部“和谐号”，“绿皮”老爷车粗放个质感，搭仔互联网时代子弹头个精致曲线并排勒轨道浪交叉，像煞是一位饱经沧桑个老农夫搭仔都市个年青才俊碰勒一道，互相行了注目礼，又好像是祖孙两代人勒勒各自奔忙。
我坐勒窗门口朝外头望过去，车身勒勒轻轻个摇晃，我个眼泪水也勒眼睛里向晃动……
图片来自网络
吴侬细语吟诗词歌赋
往期回顾：
“上海言话讲起来”旨在传播沪语，若有不当之处，敬请留言指正。
感谢您的支持转发，欢迎关注本公众号