沪剧艺术表演家袁滨忠

沪语朗读：屠峻

沪剧艺术表演家袁滨忠

作者：童自荣（刊于文汇报）

改编：郭莉

朗读：屠峻

推荐：丁迪蒙

四十年前，1967年12月28日，一个年仅36岁个男人匆匆走完了伊短暂个人生。伊个勒沪剧界里少有个天籁之音从此搭我伲诀别。

伊，就是上海沪剧表演艺术家袁滨忠先生。

提起袁老师，恐怕上海滩浪个老戏迷侪会得津津乐道。不过具体到我，一个搞外国电影配音个，搭沪剧是完全勿搭界个，哪能也会得有搿份雅呢？

其实，我是土生土长个上海人，上海人拨家乡剧种吸引是顺理成章个。事实浪，勒读高中，迷恋配音艺术之前，我也蛮欢喜评弹跟沪剧个，阿拉市西中学有个沪剧兴趣小组，我也参加个。

勒勒所有沪剧演员里向，我最欣赏个是两个人：王盘声搭仔袁滨忠。我对音乐比较敏感，而迭两位老师个嗓音潇洒、优美，用嗓子又介松弛,总归叫我听得来如痴如醉。

王盘声是老前辈了，解放前就已经红遍上海滩，袁滨忠则是后起之秀。勒当时个沪剧界，勒伊成长个大环境里，能介快走红，又能形成自家独特个流派，用“出类拔萃、绝无仅有”来形容也勿是过分个。埃个辰光，每趟散戏出来，剧场个进出口往往有交交关关狂热个中学生戏迷，侪想零距离看看袁老师个风采。假使伊到剧场去观摩其他戏曲个演出，一旦拨观众认出来了，场子里向就会乱得勿得了，弄得台浪向个戏也要演勿下去了。直到现在，我周围交关同龄朋友一提到袁老师，还是赞赏有加，可见伊个艺术魅力。

但是，我是从电台广播里向收听伊个演唱个，从也勿曾去现场欣赏过。我对伊个方方面面一直充满好奇，邪气想晓得伊个成长历程、艺术创作、情感轨迹，还有伊个生活磨难，所以，勒逐渐接触了几位有关人士以后，我今朝就来试试写搿眼浅表个文字。

先讲袁派。以我个工作体会，一个演员一生当中能有几个代表作已经勿容易了，要形成自家独特个流派更是邪气邪气难个。袁老师却能自成一派。葛末，啥叫袁派？袁派到底有啥特点呢？

筱文滨是艺术造诣极深个元老级前辈，袁滨忠呢，则是筱文滨个关门弟子。沪剧个调头总体是偏柔、糯、悠，带有江南水乡情调，沪剧个语音具有鼻音浓重个特点，韵味邪气独特。袁老师个唱腔，勒熟练运用沪剧老腔个基础浪向，用筱文滨老师个稳健、乡土气息浓个唱腔作为底蕴，吸收了师兄王盘声潇洒、飘逸个唱法，同时，学习了师兄邵滨孙个刚直、铿镪，除此之外，伊还善于向其他艺术剧种学习，从而形成了自家搿种阳刚搭仔柔美相济个、清亮、华丽个风格。伊个音域宽广，尤其是高音个辉煌，伊就引导唱腔“朝高里向走”。高亢激越，充满青春活力跟穿透力。伊善于打破沪剧行腔个局限，使演唱带有某种歌曲意味。搿能就勒根子浪保持了朴实个泥土气息，又自觉个搭城市文化相融合，表现出了与众勿同个时尚风味，所以伊个唱腔就像一阵风一样，赢得了众多戏迷个心。

袁老师小辰光家境贫寒，宁波爷娘拿伊送拨上海人做养子。从小就受到拨遗弃个伤痛。搿种凄苦、孤寂个经历，促成了伊对人生个勿寻常个体验

袁老师是勒上海中学读书个。迭是所历史悠久、教学质量极高、要求老严格个寄宿制学堂。曾经听袁夫人讲伊“读中学个辰光，写得一手好字，一手好文章”。迭眼言话让我大受启发。文化程度个深浅，对演员理解剧本、塑造角色会起到重要作用。袁老师本来是可以再读大学，将来成为学者或者工程师，结果，伊个养父让伊停了，拿伊送到老朋友筱文滨身边学唱沪剧，搿对袁滨忠来讲，是做梦也想勿到个。伊后来居然红遍上海滩，恐怕也正是应了埃句“无心插柳柳成荫”个俗话伐。

袁老师勒剧团里是挂头牌个，日里天、夜到演戏，还要通宵突击赶排新戏。有一趟，连牢几日天腹泻、没力气，但为了勿辜负观众，还是硬撑走上舞台。搿种精神为流派个形成搭仔成熟奠定了坚实个基础。

袁老师性格比较内向。但伊谦和、节俭，常庄千方百计省出眼铜钿接济养母搭仔勒宁波个生母。袁老师个婚姻原来因为“门不当户不对”而遭女方家长激烈反对。女方娘家相当富有，国内外侪有企业，威海路浪有整幢个洋房。但太太对爱情忠贞不渝，拎了只小皮箱就到袁老师住个小阁楼去了。当然，有了三个囡儿以后，女方爷娘也慢慢叫改变态度了。

邪气遗憾，袁滨忠生前呒没留下来艺术见解个文字，对伊个评述也勿多见。仅有个欣慰是，伊活勒热爱伊个无数戏迷个心里向。

图片来自网络