一碗乡愁小德兴
沪语朗读：金子
朗读者
一碗乡愁小德兴
原创：老姜
来源：夜光杯
沪语改写：郭莉
诵读：金子
推荐：丁迪蒙
小德兴是一家面馆，开勒方浜中路广福寺边头，离我屋里只有三分钟路程。
小德兴只有一开间，进门是柜台，三分之一是灶台，几只方台子围勒旁边，顾客可以一边坐勒等吃，一边看大师傅下面、装碗。
面有两种，一种叫阳春面，一种叫葱油拌面。
阳春面鲜味道侪勒汤里，汤是密制个，隔夜就要拿肉骨头熬起来，一直熬到骨头看上去白塌塌，汤色也是浓白个再好。舀一勺放到刚刚下好个面条里，再挑一汋猪油、撒一把葱花，望一眼也要馋得侬涎唾水溚溚渧。葱油拌面窍门是油，油里向除了熬得焦枯个小葱，还有斩碎个虾米，上海人叫“开洋”。迭个油个香味，保证侬闻一闻胃口大开。
小德兴还卖馄饨，是搿种江南特有个小馄饨。皮子绝薄，肉馅跟葱花斩勒一道，师傅用一片小竹爿挑一眼眼，搨勒皮子浪，单手一捏，馄饨就成形了，从镬子里捞起来是半透明个，一口一只吞进肚皮，简直太适意了。
还有糯米汤团，像一只鸡蛋大小，分甜咸两种。甜个是豆沙心子，圆圆个；咸个是菜肉心子，圆圆个身体浪，拨师傅捏出一只尖尖个小耳朵，搿恁下勒镬子里便于识别。汤团皮子糯糯个，咬一口，勿是甜咪咪，就是咸滋滋，打耳光也勿肯放。
侪讲上海人会过日脚。伊歇辰光小德兴面条有二两、二两半、三两，价格精确到“分”，粮票也要精确到“钱”。拌面个葱油也分两种，一种是带辣个，一种是勿带辣个，不过要另外加三分洋钿。
小德兴生意还分“堂吃”搭仔“来家生”，所谓“家生”就是顾客自备钢种镬子或者搪瓷缸，买到屋里去吃，搿恁店堂里可以省出座位拨人家。
上世纪六十年代，上海市民经历了三年困难时期，还经历了更长个凭票供应个日脚，上馆子对多数人来讲侪是奢望。但是小德兴个阳春面八分一碗、小馄饨一角一碗，糯米汤团三分一只、一碗四只一角两分，毕竟还是属于大众消费个。
当然，就算是大众消费，对我来讲也勿是好想去就去个。只有感冒发寒热了，嘴巴里呒没味道，姆妈会塞八分洋钿让我到小德兴吃碗阳春面。难板吃饭呒没菜，姆妈也会拨我一角洋钿，买一碗小馄饨端回来，既是菜、又是汤。
后首来我离开上海十年，小德兴阳春面、小馄饨、糯米汤团就成了乡愁，尤其勒勒饥肠辘辘个后半夜。但是等我十年后回到上海，小德兴已经风光不再，取而代之个是肯德基、麦当劳。不过我心里还是牵记小德兴个面搭仔馄饨，就像现在上馆子，端上来个即便侪是山珍海味，心里想个，还是姆妈烧个烤麸，还有姆妈拿手个红烧肉一样。
往期回顾：
图片来自网络
欢迎关注本公众号