妖娆杜鹃
作者：胡展奋
来源：新民晚报2020年5月11日
上海话改写：郭莉
朗读：王宇洲
就像一个又妖又作个女人，杜鹃花是勿大好服侍个。
我搿搭主要讲个是西洋杜鹃。最早拨伊迷惑应该是勒勒一次花展浪向。一片纷红骇绿，只见牡丹堂皇，月季雍容，山茶绚烂，不过最亮眼个还是杜鹃。
杜鹃也堂皇，也雍容，也绚烂，但伊还有众芳不及个一点——妖娆。
妖娆是啥？是一种咄咄逼人个美，凌厉而富于诱惑……如果是亮，就亮瞎侬；如果是烫，就烫煞侬；如果是辣，就是涮涮辣；如果是鲜，就是蛤蜊鲜；伊是侧锋棱威个皇象书法，伊是丹凤眼“豁豁”个亭子间嫂嫂，伊是张大千笔下个人物审美：麻、妖、骚。
看见我介欢喜，花商用优惠价一记头发拨我15盆，名字好听，花形花色更好看：紫佳人、红宝石、粉牡丹、绿袖子、白雪公主、美国火焰……
想勿到回到屋里，才晓得领回了一帮“作女人”。放勒伊前庭，伊勿好暴晒，一晒就会蔫脱；搬到伊后院，又勿好全阴，全阴伊勿会开花。伊需要阳光，但是阳光只能斜照。正像是温庭筠所讲个“斜晖脉脉”搿能。
三伏大热天里，还要搭凉棚，杜鹃怕高温；三九大冷天里，又怕低温，一到零下杜鹃就挂脱了。
搿种“作”，是要搭侬“同归于尽”个“作”。侬勿拨我作，我就挂脱、就撕票。
我养过月季，养过芍药，并勿是啥园艺方面个菜鸟，我晓得但凡万物生长，岂有勿靠太阳个？诗人所谓“近水楼台先得月，向阳花木易为春”，但是迭个对杜鹃完全无感，阳光对伊来讲，只好是“斜晖”，像陆放翁个“斜晖忽满廊”搿种节奏，赛过“蟋蟀要原配”一样，侬讲是勿是忒“作”了。
对盆土要求也“作”得来。要“湿润疏松肥沃酸性土”，问题是酸性土一般侪是贫瘠板结，啥人见过湖南江西个红土壤有肥沃个？市场浪向黄哈哈个“山泥”差勿多就是石头，侪要掺肥料掺营养土去做改造个。
但是肥太浓了，伊又焦脱了，落叶满地。我小学同学徐云良是养花高手，伊教我，杜鹃也欢喜吃荤，不过勿好用腥膻腻肥，伊是淑女，要“清补”，用啥呢？板要沤透个淘米水或者发过酵个豆饼水，还要经过稀释再用。赛过弄堂里小姐，买油条只吃半根；林黛玉吃大闸蟹，只要半只。
侪讲是杜鹃喜湿，盆土稍微干几日就会蔫脱，但是潮湿大了，叶子又侪搭仔下来，一副颓唐样子。迭个又是啥节奏啊？勿是讲伊是著名个“喜湿”植物么？云良勒勒电话伊面讲：“应该潮湿。但是排水不畅也勿来事，要又湿又透气。”唉！潮湿还要透气？要紧去看，果然浇水太勤块了，泥水淤积，集体烂根，没几日天又死脱一批。
直晒勿可以，全阴也勿可以；太干勿来事，太湿又勿来事；没肥料一副憔悴相，有肥料也一副憔悴相——作头势啊！侬柳眉一竖，要作到啥辰光才好勿作啊？
就搿能，我拨杜鹃作了3年，总算慢慢较摸熟了伊拉个脾性，喜阴好湿畏寒怕热，板要投其所好，才会应声解决，比如冬天“遇冰即挂”，葛末盆外头套只厚塑料袋保温也就可以了。
如今我花园里一片惊艳，杜鹃勿仅花期特别长，还会得“花开二度”，常庄是春天开过，秋天又开。搭伊搿种水灵、狡黠、妖娆相比，牡丹月季侪out了，侪是“老实花”。
要是有人问，搿能作个花，有啥好白相。葛末我就明讲吧：搞定作女，再算有成就。侬吃过河豚鱼刺身伐，迭个仔细想想，道理倒是也差勿多。
杜鹃个魅力就勒勒伊个“作”。唯其作，才妖娆，才亮瞎侬；才烫煞侬；才有蛤蜊鲜；才像丹凤眼来“豁豁”侬，才有侧锋棱威个皇象书法，才属于张大千笔下搿份“麻、妖、骚”个风情呢。
往期回顾：
图：网络 / 编辑：渺渺