压路机开进了上海
来源：新民晚报
作者：薛理勇
沪语改写：荣梅
讲述：徐慧丽
1843年上海开埠以后，上海慢慢叫个从一个农耕社会个县城朝牢仔开放个大城市发展了，随牢仔城市面积个扩大搭仔城市人口个增加，城市道路个建设搭仔管理就显得越来越重要了。
开埠之前，上海主要个代步工具是轿子，所以对路面呒没啥个特别个要求。勒勒开埠交关年之后，城市个交通工具开始出现了独轮车、黄包车、马车唠啥。伊个辰光，还呒没充气个橡胶轮胎，车轮常庄是用外圈箍仔铁箍个硬木轮盘。独轮车是客货两用车，伊最重可以装大约摸500斤个物事，所以对路面就有得一定个要求了，路面忒软了么，车轮就会得陷进地面里向，假使用石板个硬路面呢，车轮个震动又忒大了。一直到19世纪个80年代，上海大多数个城市道路侪是用黄砂、石子、烂泥搿三样物事混了一道当做路面材料，埃个辰光还呒没沥青、水泥唠啥建筑材料粘合剂，碰到落雨个辰光，雨水就会得拿路面浪个烂泥搭仔黄砂冲脱，只挺下来一眼呒没啥个粘合力个砂石；假使是天气好再加上刮风呢，砂石又会得拨风吹脱，路面就拨破坏脱了。搿能介个道路，肯定会得有得交关人要讲闲话了呀，伊拉会得讲：上海每只租界里向个道路啊像煞是用石膏来做成功个，看上老平个，软绣天街，尤形繁缛，但是晴天介是尘土飞扬，落雨辰光就侪是烂污浆浆，再加上仔拨车子个轮盘轧过，假使呒没及时个修理，地面就会得高低勿平，邪气容易拿鞋子弄坏脱。为了确保城市交通畅通，租界当局只好寻得来邪气多个劳力，勿断来修理路面。
老底子上海筑路修路的施工手段基本浪有得两种，第一种是“夯工”，就是几个民工为一组，拿一块邪气大个夯石拎起来再落下去，用夯石个重力搭仔冲击力来拿路面夯夯实，搿种办法是最原始个筑路办法；第二种是用一块整块头个石料做成功一只老老大个“碾子” ，样子像只长长个圆筒，搿能介个圆筒肯定是邪气重个呀，只好让交关人一道像拉车子一样来拉迭只碾子，靠碾子个重量拿路面压压紧，迭个也是近代上海常庄用个筑路修路个方法。
上海是一只大城市，每年要筑路修路勿勿少，所以租界工部局每年用勒筑路、修路浪个费用邪气可观。1889年，工部局从英国爱夫林波特公司定购了几台蒸汽压路机，第二年蒸汽压路机就运到了上海，开始拿伊直接用到筑路搭仔修路工程。搿搭可以讲到一只故事唻。近代著名画家吴友如勒勒南京路“日升楼”吃茶，迭个“日升楼”是清代上海老老有名气个茶楼，全称叫做是“五云日升楼”，老底子就是勒勒现在南京路浙江中路口个“沈大成糕团店”此地，吴友如勒勒楼浪向看到迭个蒸汽压路机工作情况之后就画了一幅画，画个名字叫作“修街机器”，而且还特为勒勒配文里向感叹到：旧年仔(此地是指1890年)，从国外运到火机器一部，专门修理街道，先勒勒虹口搭仔黄浦滩试用，搿两天，勒大马路(也就是搿歇个南京路)搿搭也开始用起来了。用迭个机器，勿但省人工，而且功效也相当快。搿部机器个大小搭救火机器(就是当时辰光个消防车)差勿多，但需要一个人立勒高头摇动，来控制机器个进退搭仔快慢，伊侪是按照操作人个指令勒勒走个。
搿就是中国出现个第一台蒸汽压路机，到今朝已经有得一百多年历史了，幸亏有得吴友如个妙笔生花，让阿拉还可以看到老上海最早个蒸汽压路机个样子。
作者
朗读者
往期回顾：
图：网络 / 编辑：渺渺