乌龟自保
沪语改写、讲述：蔡军
记得有一只故事，讲个是释尊到舍卫国个败园精舍弘扬佛法，教育众生个事体。释尊当然是释迦牟尼，葛末，舍卫国是啥个地方呢？就是中印度个古王国啊。
有一个修行道人，伊勒河边个树下头已经修行了十二年了。勿要看伊修行了介长辰光，勒伊个心里还是有得贪得无厌个念头，心神勿定，老是迷恋勒六根个欲望里向，勿能四大皆空。此地讲个六根，就是眼、耳、鼻、舌、身、意六根。
有一日天，释尊看到机会搭仔缘分差勿多到了，应该可以去解救伊个修道者了，释尊就变成功一个普通和尚，走到河浜旁边，跟迭个修道者一道住勒树下头。
搿是一个月明星稀个夜快头，有得一只乌龟笃悠悠个从河浜里爬出来，齐巧有一条饿得要死个野狗经过搿搭。伊一眼就看到了乌龟，迓迓叫开心得勿得了，毫不犹豫个采取行动，嘴巴张得老老大，准备拿迭只乌龟吞下去。
乌龟吓了一跳，立时三刻拿头、尾巴搭仔四只脚统统缩到乌龟壳里向。乃么野狗又是饿咾又是急，用伊只狗鼻头迭搭闻闻，伊搭闻闻，看牢仔乌龟，呒没办法好想，最后只好灰溜溜个走脱了。
乌龟瞄到野狗走远了，再迓迓叫个伸出自家个头、脚搭仔尾巴，总算逃过了一场劫难。
两个人亲眼看到刚刚发生个事体，修道者对旁边个释尊讲：“伊只乌龟因为有得乌龟壳保牢性命，所以野狗唔没得手。”
“对个呀，难道人还勿如迭只乌龟吗？难道世人勿晓得迭个世界是变化无常，难以捉摸个吗？假使讲侬迷恋六根个欲望，搿就拔勒妖魔鬼怪有得可乘之机。迭些妖魔就会得趁机破坏人个身体，隔手又破坏人个精神，让人陷入生死轮回。实际浪向，所有个烦恼痛苦，侪是来自自家个内心，阿拉应该立时三刻就拿伊克制牢控制牢再对啊。”
修道者听了释尊个闲话，立马就断除了欲望，终于修得正果。
朗读者
往期回顾：
图：网络 / 编辑：渺渺
赞 (0)