故里春秋（二十六）
作者：朱海洪
沪语改写：边秦翌
沪语讲述：卢咏梅
“大壶春”生煎采用传统个全发酵，面粉里向加了酵母，揉好之后醒发15分钟，擀皮包肉馅，包好之后第二趟醒发，大约摸半个钟头。唐妙泉个生煎比伊爷叔肉摆得还要多，但是肉皮冻勿放了；馅芯选用最好个前腿肉，配秘制酱油，肉馅味美而紧实弹牙，又因为是两次发酵，所以皮子又松又软，底又脆又香，就算馒头冷脱了，也勿会得瘪下去，卖相挺刮，邪气受茶客个欢迎。
行家讲“大壶春”是道地个本帮做法，属于“肉心帮”清水生煎。必过，也有吃客嫌避“大壶春”个生煎有眼干乎乎个，更加欢喜“萝春阁”个“汤心帮”混水生煎。皮薄卤多，一口下去，卤汁醇爽，润润个鲜香，勒勒嘴巴里里外外侪挥之勿去啊。
我呒没吃过“大壶春”，也呒没吃过“萝春阁”，但是有幸吃过一趟“友联”个“汤心帮”混水生煎。
“友联”勒勒西海电影院对过个新闸路浪。去“西海”看电影，常庄看到马路对过有人排长队买生煎。听人家讲“友联”个生煎吃口邪气好，我因为袋袋里向呒没多少钞票，再加上呒没耐心去排队等个一锅、两锅个，所以一直呒没尝过“友联”个味道。后首来有机会去品尝一趟，也是因为我表阿哥请客。
表阿哥是“文革”之前个老大学生，是我阿姨，也就是我姆妈个大阿姐个大儿子。伊拉屋里住勒石门二路，离阿拉屋里邪气近，两家人家常庄走动个。
表阿哥勒勒青岛个山东海洋学院读书，后首来考取了华东师范大学个研究生，回到了上海；因为成绩优异留校当了老师，一直到教授，伊是我至亲当中学历最高个一位。
有一趟，伊从青岛回上海休假，顺带便来望望我姆妈。看到我有一本《二十年目睹之怪现状》，伊欢喜得勿得了。埃本书已经破旧了，连封面也呒没个，拿上来就是作者“我佛山人”吴趼人个清代服饰像。我看到伊实在是欢喜，就送拨了伊。为了谢谢我个慷慨，表阿哥带我去了“友联”。
据说“友联生煎”是由三个朋友，勒勒抗战胜利之后联合开出来而得名个。勿要小看搿家小店只有一开间门面，只看到弄堂里向排勒老老长个队伍，一直排到新闸路浪，想吃伊拉生煎个人实在忒多。表阿哥勒勒外头排队，我到店里寻位子坐下来等。
“友联”生煎个工艺搭仔“萝春阁”个做法比较像。制作精细，拌入肉皮冻，重油馅多，外壳有软硬劲，底下一层又脆又香；咬破皮就是一口热乎乎个汤汁。混水生煎确实好吃。后首来个“小杨生煎”也是走“汤心帮”个路子。
上世纪末，吴江路浪开出一家“小杨生煎”。老板是个女个，叫杨利朋，是“知青”子女。诚信经营个生煎馒头邪气受上海市民个欢喜，一度拨评为上海名小吃。
2009年，“小杨生煎”连锁店开到了黄河路美食街浪。有辰光回老房子去会会老朋友，路过搿搭，常庄看到店门外头人多得勿得了，大家侪勒勒排队买生煎。难难板板，我也会耐勒兴致买一客，再来一碗咖喱牛肉汤，端到店堂楼浪去尝尝鲜。
“小杨生煎”个特点是个头比较大，一只只金灿灿个就象婴儿个小拳头。馅芯是纯精肉，皮薄馅多；汤汁浓郁再带眼甜味道；因为呒没发酵过，馒头皮像煞是烤出来个，吃起来酥酥脆脆；一口下去，还真个有眼当年“友联”生煎醇香爽口个味道。
可惜个是，红火了一抢，“小杨生煎”慢慢叫也勿大来三了。生煎是越来越小还勿去讲伊，肉馅子也松松散散了，汤汁已经呒没开始辰光个丰沛醇厚；馒头一冷，薄皮骨架就会得瘪下去，搭仔当初个圆润饱满相比，露出了小家巴气。
搿歇个“小杨生煎”店，已经看勿到老底子个熙熙攘攘，我也少了到店里去一饱口福个雅兴。
告咾有得一句闲话呶，叫做是“创业勿易，守成更难”。名家个老字号还真个勿是随便吹出来个！
往期回顾：
图：网络 / 编辑：渺渺