东海大楼个书香（上）
沪语朗读：俞镝
东海大楼个书香（上）
作者：马尚龙（刊于新民晚报夜光杯）
改编：丁迪蒙
朗读：俞镝
新华书店。看到搿四个字，侬就几乎是本能个想到了好几家所熟悉个新华书店，而且，还有属于侬搭仔搿眼书店个个性化记忆搭仔故事。有一天经过南京东路个东海大楼，朋友脱口而出：南东新华书店，伊个辰光是远东第一大书店。话题立时立刻就转到了新华书店。还有南西，是勒南京西路石门一路口个，隔壁头是绿杨村饭店；还有，淮海路新华书店，隔壁是大同烤鸭；还有，静安寺新华书店，曹家渡新华书店，五角场新华书店……勒上海个每一个闹市区域，必定有一家新华书店，而且，侪是有得好几开间门面个。
四十多年前，有个女同学毕业分配到南东新华书店，搿是一个准上层建筑个职业。室内工作，冬暖夏凉，覅做体力生活，比较清闲，还可以看看书。女同学长也长得清爽适意，勒柜台里向一立，真个就像个公主样子。小方领个两用衫，袖子管浪套了副深藏青个袖套——搿就是书店个工作待遇了。因为女同学长得好看，就有一眼男同学常庄去搭讪，讲讲言话，真是惬意啊。还勒“文革”末期个书店，除脱仔毛选、样板戏一样个小说书，当然咾，还有《新华字典》，就呒没别个书了。
“忽如一夜春风来，千树万树梨花开。 ”1976 年，唐代诗人岑参搿一名句，一时间家喻户晓。春风来了，书店个女同学最深切个感受到了。因为书店一记头从冷门变成了热地，从大前门曲径通幽到了后门。
于是，新华书店就有了地标个意义，大家侪晓得了搿眼书店勒啥个路浪，但是，通常却是忽略了书店开勒啥个房子里向。其实，房子也是有来历个，有传奇个，甚至有八卦个。搿搭就讲讲“南东”伐。
“南东”勒东海大楼里向，搿个名分大家还是晓得个。但是追根溯源，到“慈淑大楼”，即使是上海人，晓得个也勿算多。慈淑大楼原来是哈同个产业。1956年，慈淑大楼拨市房地产局接管，改名东海大楼。原来个市商业一局、二局、工商局等机关进驻办公。远东第一大个书店也就此诞生。有网友回忆讲：第一次到搿家书店去个辰光还是小学生，搭弄堂里个同学一道去个，书店个一楼、二楼之间还有夹层。1993年，所有机关还有绣品厂、印刷厂侪撤离了，1996年，大楼大部分改建为东海商都。现在则是像交关商场流行个以门牌号取名，叫做353广场。老实讲，353搿种名字，除脱仔“369”记得牢，一眼也呒没个性个，哪能比得上“东海”，比得上“慈淑”呢？
所以，我更加愿意去讲讲东海时代新华书店个个性化故事。70 年代飓风个第一个风向标是恢复了高考。取消了整整十年个高考，勒77 年终于是恢复了。
也就是勒搿个辰光，“数理化自学丛书”勒新华书店卖了。几十万名考生侪有同样个意念，只要学了“数理化自学丛书”，就可以考进大学。学好数理化，走遍天下侪勿怕嘛！
新华书店个玻璃大门，就是勒搿一天早浪向拨排队个“飓风”吹破脱个。所有个店家，没一家像新华书店一样人轧人。伊个辰光已经是大热天，书店天花板浪个几只电风扇轻悠悠、慢悠悠个转，书店里向侪是一阵阵个汗酸臭。女同学着勒短袖子衬衫，汗水从额角头浪流下来。 17 本一套“数理化丛书”蛮重个，瘦瘦小小个伊一日天勿晓得要搬多少套。没几天，书侪卖光了，买勿到个人先登记。原先跑来讲言话白相个男同学，已经开后门从女同学手里买了“数理化自学丛书”，回去学了。搿是女同学第一次“刷”出了开后门个成就感。
后来也呒没几个人买了书而考上大学个。 77 年上海考生超过26 万，入学率是 5% ，考场个教室，好容纳考生 30 个，从概率浪讲，一只教室顶多只有一个考生可以考进大学个，几乎是呒没啥希望，但是搿丝毫勿能阻止考生亢奋个热情。高考就像是“流感”一样，击中了上海 26 万青年人搭仔伊拉个家庭，能够医好“流感”个就是考大学个书。
图片来自网络